Ɛsdrasi 3:1-13
3 Anglo nso’n su’n,+ Izraɛlifuɛ mun* mɔ be o be klɔ’m be su’n, be nuan yoli kun yɛ be yiali Zerizalɛmun lɔ.
2 Zozadaki i wa Zesua,+ ɔ nin i wiengu Ɲanmiɛn ɲrun jranfuɛ mun, nin Sealtiɛli+ i wa Zorobabɛli+ nin i niaan bian mun be kplannin Izraɛli Ɲanmiɛn’n i tɛ yiwlɛ’n. Be yoli sɔ naan be kwla yi tɛ su, kɛ nga be fa klɛli i Moizi m’ɔ ti Ɲanmiɛn Kpli i sran’n i Mmla fluwa’n nun’n sa.+
3 Kannzɛ bɔbɔ srɛ kunnin be nvle nga be mantan be lɛ’n+ be wun’n, sanngɛ be kplannin tɛ yiwlɛ’n i osu laa’n nun. Be yili tɛ nga kɛ bé yí’n be yra nnɛn’n i kɔlikɔli’n tɛ yiwlɛ’n su be mannin Zoova, be yili nglɛmun nun liɛ’n nin nnɔsua nun liɛ’n.+
4 I sin’n be dili Kpata Bo Tranlɛ Cɛn’n kɛ nga be fa klɛli’n sa.+ Yɛ cɛn kwlakwla be nian tɛ nga kɛ bé yí’n be yra nnɛn’n i kɔlikɔli’n i nuan ng’ɔ fata kɛ be yi’n su yɛ be yi-ɔ.+
5 I sin’n, be yili tɛ nga kɛ bé yí’n be yra nnɛn’n i kɔlikɔli’n m’ɔ fata kɛ be yi i titi’n,+ ɔ nin tɛ nga be yi be anglo le kun’n,+ ɔ nin tɛ nga be yi be Zoova i cɛn’m be kwlaa be dilɛ’n nun’n,+ ɔ nin tɛ nga sran’m be klun klo su be yi be man+ Zoova’n.
6 Kɛ ɔ fɛ i anglo nso’n su i cɛn ba klikli’n su’n,+ kannzɛ bɔbɔ be nin-a wlaman Zoova i sua’n i bo ase’n, sanngɛ be boli tɛ nga kɛ bé yí’n be yra nnɛn’n i kɔlikɔli mɔ be yi be man Zoova’n i yilɛ bo.
7 Be mannin yɔbuɛ sɛfuɛ mun+ nin ajuin difuɛ’m+ be sika, yɛ be mannin Sidɔnfuɛ mun nin Tirfuɛ’m be aliɛ, nin nzan nin ngo naan be ko fa sɛdri waka Liban lɔ be sin jenvie’n su be bla Zope,+ kɛ nga Sirisi m’ɔ ti Pɛɛsi famiɛn’n mannin be atin kɛ be yo’n sa.+
8 Kɛ be sali be sin Ɲanmiɛn Kpli i sua’n nun lɔ Zerizalɛmun lɔ’n, i afuɛ nɲɔn su’n i anglo nɲɔn su’n nun’n, Sealtiɛli i wa Zorobabɛli, nin Zozadaki i wa Zesua, nin i niaan bian onga mun, ɔ nin Ɲanmiɛn ɲrun jranfuɛ mun, nin Levifuɛ mun, ɔ nin be kwlaa nga be trali be ɔli mɔ be sali be sin Zerizalɛmun’n,+ be boli junman’n i dilɛ bo. Be fali Levifuɛ nga be le afuɛ ablaɔn (20) annzɛ afuɛ ablaɔn tra su’n be kɛ be nian Zoova i sua’n nun lɔ junman’n su.
9 Ɔ maan Zesua, nin i mma mun nin i niaan bian mun, ɔ nin Kadimiɛli nin i mma mun, nin Zida i mma mun be bo yoli kun be niannin be nga be di junman Ɲanmiɛn Kpli i sua’n nun lɔ’n be su, be nin Enadadi i mma mun+ nin be mma liɛ mun, nin be niaan bian mun mɔ be ti Levifuɛ’n yɛ be dili junman sɔ’n niɔn.
10 Kɛ sua kplanfuɛ’m be wlali Zoova i sua’n i bo ase’n,+ i sin’n Ɲanmiɛn ɲrun jranfuɛ’m be nin be wun junman dilɛ tralɛ, nin be sa nun awɛ mun,+ yɛ Levifuɛ nga be ti Azafu i mma mun’n be kusu be nin be sa nun sɛnbali mun, be wa jranjrannin be manmannin Zoova, kɛ nga Famiɛn Davidi m’ɔ ti Izraɛli famiɛn’n kleli kɛ be yo’n sa.+
11 Ɔ maan be boli jue tolɛ bo,+ be manmannin Zoova yɛ be lɛli i ase, “afin ɔ ti kpa, klolɛ dan m’ɔ fa klo Izraɛli’n ɔ wieman le.”+ I sin’n, nvlefuɛ’m be kwlaa be mannin be nɛn’n su kekle kpa be manmannin Zoova, afin b’a wla Zoova i sua’n i bo ase.
12 Ɲanmiɛn ɲrun jranfuɛ’m be nun sunman, Levifuɛ mun, nin awlobo kpɛn mun, kpɛnngbɛn nga be wunnin Ɲanmiɛn sua laa liɛ’n,+ kɛ be wunnin kɛ be su wla Ɲanmiɛn i sua’n i bo ase’n, be sunnin kekle kpa. Kɛ ɔ́ yó sɔ’n, nn be onga’m bé kpán aklunjɔɛ kpanlɛ kekle kpa.+
13 Ɔ maan be aklunjɔɛ kpanlɛ’n nin be sunlɛ’n i kwlaa sanngannin nun. Kɛ mɔ nvlefuɛ’m be kpan kekle kpa’n ti’n, be ti be nɛn’n mmua kpa lɔ.
Ja ngua lɔ ndɛ mun
^ Ebr., “Izraɛli i mma mun.”
