Ɛsdrasi 5:1-17
5 I sin’n, Ɲanmiɛn nuan ijɔfuɛ Aze,+ ɔ nin Ido+ i anunman Zakari+ be kannin Izraɛli Ɲanmiɛn m’ɔ o be sin’n i nuan su ndɛ’n be kleli Zifu nga be o Zida nin Zerizalɛmun lɔ’n.
2 Ɔ maan Sealtiɛli i wa Zorobabɛli,+ ɔ nin Zozadaki i wa Zesua,+ be boli Ɲanmiɛn sua’n m’ɔ o Zerizalɛmun lɔ’n i uflɛ kplanlɛ bo.+ Ɲanmiɛn nuan ijɔfuɛ’m be jrannin be sin yɛ be suannin be bo.+
3 Blɛ sɔ’n nun’n, Tatenai m’ɔ sie Nzue’n i bue kun lɔ lika’n,* nin Setaa-Bozinai, ɔ nin be wiengu junman difuɛ mun be wa toli be, kpɛkun be usali be kɛ: “?Wan yɛ ɔ mannin amun atin kɛ amun kplan sua nga naan amun wie waka nga’m be siesie-ɔ?”
4 Be seli be ekun kɛ: “Amun bo be nga be su kplan sua’n be dunman mun kle e.”
5 Sanngɛ Ɲanmiɛn niannin Zifu kpɛnngbɛn’m be su,*+ ɔ maan lele naan b’a klɛ sa sɔ’n i su ndɛ b’a ko man Dariisi naan i kusu w’a tɛ su’n, b’a kwlá jranman be junman’n.
6 Tatenai m’ɔ sie Nzue’n i bue kun lɔ lika’n, nin Setaa-Bozinai, nin i wiengu junman difuɛ mun, famiɛn’n i janunfuɛ mɔ be o Nzue’n i bue kun lɔ’n, be klɛli fluwa ko mannin Famiɛn Dariisi.
7 Be klɛli sa nga be wunnin i’n i su ndɛ ko mɛnnin i. Be klɛli i kɛ:
“Famiɛn Dariisi,
“Maan ɔ wun jɔ wɔ fɔuun!
8 E waan é bó su é klé famiɛn’n kɛ e ɔli Zida mɛn’n nun lɔ, Ɲanmiɛn Kpli i sua’n nun lɔ, yɛ e wunnin kɛ be su fa yɔbuɛ dandan mɔ be kondoli be bali lika sɔ’n nun lɛ’n bé kplán sua’n, be su fa waka mun bé wláwlá talɛ’m be nun. Junman’n kɔ i ɲrun ndɛndɛ kpa, afin nvlefuɛ’m be mian be ɲin be di junman’n.
9 Ɔ maan e usali be kpɛnngbɛn’m be sa. E usali be kɛ: ‘?Wan yɛ ɔ mannin amun atin kɛ amun kplan sua nga naan amun wie waka nga’m be siesie-ɔ?’+
10 Asa ekun’n, e usali be dunman naan é bó su é klé wɔ. E yoli sɔ naan y’a kwla klɛ be nga be ti be ɲrun dinfuɛ’n be dunman.
11 “Ndɛ nga be kan kleli e’n yɛ: ‘E ti Ɲanmiɛn’n m’ɔ sie nglo nin asiɛ’n i sufuɛ, e su kplan sua mɔ be kplannin w’a cɛ’n i uflɛ. Izraɛli famiɛn dan kun yɛ ɔ kplannin sua sɔ’n niɔn.+
12 Sanngɛ e nannan’m be klɔklɔli Ɲanmiɛn m’ɔ o nglo lɔ’n,+ ɔ maan ɔ fali be wlɛli i Nebikadnezaa+ m’ɔ ti Babilɔnin famiɛn’n, m’ɔ ti Kaldefuɛ’n i sa nun. I yɛ ɔ bubuli sua nga-ɔ,+ kpɛkun ɔ trali nvlefuɛ mun ɔli Babilɔnin.+
13 Sanngɛ kɛ Sirisi m’ɔ ti Babilɔnin famiɛn’n kacili famiɛn’n, i afuɛ klikli’n nun’n, ɔ mannin atin kɛ be kplan Ɲanmiɛn sua nga i uflɛ.+
14 Asa ekun’n, sika ɔkwlɛ kpongbo nin sika kpongbo nga Nebikadnezaa fali be Ɲanmiɛn sua’n nun Zerizalɛmun lɔ’n, m’ɔ fa be ɔli Babilɔnin amuin sua’n nun’n,+ Famiɛn Sirisi fali be fiteli. Be fali ninnge sɔ mun mannin bian kun mɔ be flɛ i kɛ Sɛsibazaa*+ mɔ Sirisi sieli i siefuɛ’n.+
15 Sirisi seli i kɛ: “Fa ninnge nga mun, ko sie be Ɲanmiɛn i sua ng’ɔ o Zerizalɛmun lɔ’n nun. Yɛ maan be kplan Ɲanmiɛn sua’n i uflɛ i osu laa’n nun.”+
16 Ɔ maan Sɛsibazaa sɔ’n bali, ɔ wa wlali Ɲanmiɛn sua m’ɔ o Zerizalɛmun lɔ’n i bo ase.+ Kɛ ɔ fɛ i lɛ lele andɛ’n be te kplan sua sɔ’n, be nin-a wiemɛn i kplan.’+
17 “Siɛn’n, sɛ ɔ ti famiɛn’n i klun su’n, maan be niannian kan famiɛn’n sie i ninnge kpakpa’m be lɔ Babilɔnin lɔ’n, naan be nian sɛ Famiɛn Sirisi mannin atin sakpa kɛ be kplan Ɲanmiɛn sua m’ɔ o Zerizalɛmun lɔ’n i uflɛ-o.+ Yɛ ajalɛ kwlaa nga famiɛn’n fɛ i ndɛ sɔ’n su’n, maan be bo su kle e.”
Ja ngua lɔ ndɛ mun
^ Annzɛ “Efrati’n i bue kun lɔ’n.”
^ Ara., “be Ɲanmiɛn’n i ɲinma’n trannin be su.”
^ Atrɛkpa’n i yɛ be flɛ i Zorobabɛli Ɛsd 2:2 nin 3:8 be nun’n niɔn.
