Ɛsdrasi 7:1-28
7 I sin’n, Famiɛn Atazɛɛzɛsi+ m’ɔ ti Pɛɛsi famiɛn’n i blɛ su’n, Ɛsdrasi*+ bali. Ɔ ti Seraya i wa,+ i kusu ti Azaria i wa, Azaria ti Ilkia i wa,+
2 Ilkia ti Salɔmun i wa, Salɔmun ti Zadɔku i wa, Zadɔku ti Aitubu i wa,
3 Aitubu ti Amaria i wa, Amaria ti Azaria i wa,+ Azaria ti Merayɔti i wa,
4 Merayɔti ti Zeraya i wa, Zeraya ti Uzi i wa, Uzi ti Buki i wa,
5 Buki ti Abisia i wa, Abisia ti Fineasi i wa,+ Fineasi ti Eleazaa i wa,+ Eleazaa ti Aarɔn m’ɔ ti Ɲanmiɛn ɲrun jranfuɛ’m be su kpɛn’n i wa.+
6 Ɛsdrasi sɔ’n fin Babilɔnin bali. Ɔ ti fluwa klɛfuɛ, ɔ si Moizi i Mmla+ nga Zoova m’ɔ ti Izraɛli Ɲanmiɛn’n fa mannin’n, i kpa.* Famiɛn’n mɛnnin i like kwlaa ng’ɔ srɛli’n, afin i Ɲanmiɛn Zoova i sa’n o i su.
7 Kɛ Atazɛɛzɛsi kacili famiɛn’n, i afuɛ nso’n su’n, Izraɛlifuɛ wie mun, Ɲanmiɛn ɲrun jranfuɛ mun, nin Levifuɛ mun,+ nin jue tofuɛ mun,+ nin anuan sunianfuɛ mun,+ nin Ɲanmiɛn sua’n nun lɔ junman difuɛ mun*+ be bali Zerizalɛmun.
8 Kɛ famiɛn’n trannin famiɛn bia’n su’n i afuɛ nso’n su i anglo nnun’n su’n, Ɛsdrasi bali Zerizalɛmun.
9 Anglo klikli’n i cɛn ba klikli’n su’n, ɔ jasoli Babilɔnin lɔ. Anglo nnun’n su’n i cɛn ba klikli’n su yɛ ɔ juli Zerizalɛmun lɔ-ɔ. Afin i Ɲanmiɛn’n i sa kpa’n o i su.+
10 Ɛsdrasi buɛbuɛli i wun* naan w’a suan Zoova i mmla’n naan w’a nanti su,+ naan w’a kle Izraɛlifuɛ mun Ɲanmiɛn i nuan ndɛ’n nin i afɔtuɛ mun.+
11 Ɛsdrasi ti Ɲanmiɛn ɲrun jranfuɛ nin fluwa klɛfuɛ,* ɔ si Zoova i nuan ndɛ’n nin i mmla’m be kpa. Fluwa nga Famiɛn Atazɛɛzɛsi klɛ ko mɛnnin i’n yɛ:
12 * “Min bɔbɔ Atazɛɛzɛsi+ mɔ n ti famiɛn’m be famiɛn’n, min yɛ n klɛ ndɛ nga n man Ɛsdrasi m’ɔ ti Ɲanmiɛn ɲrun jranfuɛ nin Ɲanmiɛn m’ɔ o nglo lɔ’n i fluwa klɛfuɛ’n* niɔn. Maan ɔ wun jɔ wɔ kpa fɔuun.
13 N seli kɛ be kwlaa nga be tran min mɛn’n nun mɔ be ti Izraɛlifuɛ’n, be nin be Ɲanmiɛn ɲrun jranfuɛ mun, nin Levifuɛ mɔ be klo kɛ bé kɔ́ Zerizalɛmun’n, be kwla kɔ.+
14 Afin famiɛn’n nin i afɔtuɛ manfuɛ nso mun b’a sunman wɔ kɛ a ko nian sɛ Zidafuɛ mun nin Zerizalɛmunfuɛ mun be nanti Ɲanmiɛn i mmla m’ɔ o ɔ sa nun’n i su-o.
15 Asa ekun’n, fa sika nin sika ɔkwlɛ nga famiɛn’n nin famiɛn’n i afɔtuɛ manfuɛ mun be klun klo su be fa mannin Izraɛli Ɲanmiɛn’n mɔ i sua’n o Zerizalɛmun lɔ’n,
16 ɔ nin sika nin sika ɔkwlɛ nga á ɲɛ́n i Babilɔnin klɔ’n su’n, ɔ nin ninnge nga nvlefuɛ mun nin Ɲanmiɛn ɲrun jranfuɛ mun be klun klo su be mannin naan be fa kplan be Ɲanmiɛn’n i sua’n Zerizalɛmun lɔ’n.+
17 Fa sika sɔ’n to nannin tola,+ nin bua ɲin,+ nin bua ba,+ nin ble annzɛ i wunsu like mɔ be fa man Ɲanmiɛn’n,+ nin nzan mɔ be fa man Ɲanmiɛn’n.+ To be ndɛndɛ yɛ fa be kɔ tɛ yiwlɛ m’ɔ o ɔ Ɲanmiɛn’n i sua m’ɔ o Zerizalɛmun lɔ’n nun.
18 “Yɛ sika’n nin sika ɔkwlɛ’n i onga’n, maan a nin ɔ niaan mun amun fa yo like kwlaa nga amun klo kɛ amún yó m’ɔ ti amun Ɲanmiɛn’n i klun su’n.
19 Kpongbo kwlaa nga be fa mannin wɔ m’ɔ ti ɔ Ɲanmiɛn’n i sua’n nun lɔ junman dilɛ liɛ’n, fa be ko sie i Ɲanmiɛn ɲrun Zerizalɛmun lɔ.+
20 Like uflɛ kwlaa nga be miɛn i wun Ɲanmiɛn sua’n nun lɔ mɔ be se ɔ kɛ a fa man’n, fɛ i famiɛn’n i ninnge kpakpa’m be nun.+
21 “Min bɔbɔ Famiɛn Atazɛɛzɛsi, n seli ninnge kpakpa’m be sunianfuɛ nga be o Nzue’n i bue kun lɔ’n* be kwlaa kɛ, like kwlaa nga Ɛsdrasi+ m’ɔ ti Ɲanmiɛn ɲrun jranfuɛ nin Ɲanmiɛn m’ɔ o nglo lɔ’n i mmla klɛfuɛ’n srɛ amun’n, amun fa mɛn i ndɛndɛ.
22 Sɛ bɔbɔ ɔ usa sika talan* ya kun (100), nin ble kɔɔ ya kun (100)* nin duvɛn bati ya kun (100)*+ nin ngo bati ya kun’n (100),+ amun fa mɛn i. Njin’n+ i liɛ’n i kwlaa nga i sa miɛn i wun’n amun fa mɛn i.
23 Like kwlaa nga Ɲanmiɛn m’ɔ o nglo lɔ’n+ se kɛ be yo i sua’n nun lɔ’n, maan be tu be klun be yo i ndɛndɛ. I liɛ’n, ɔ su faman famiɛn’n i mɛn’n nin i mma’m be wun ya.+
24 Asa kusu’n, ń sé amun kɛ Ɲanmiɛn ɲrun jranfuɛ mun, nin Levifuɛ mun, nin jue tofuɛ mun,+ nin anuan sunianfuɛ mun, nin Ɲanmiɛn sua’n nun junman difuɛ mun,*+ ɔ nin be kwlaa nga be di Ɲanmiɛn sua’n i kplanlɛ junman’n wie’n, ɔ fataman kɛ be su be bɔbɔ be ti lapo, annzɛ be ninnge’m be ti lapo,+ yɛ kɛ bé tú ajalɛ’n, ɔ fataman kɛ be mian be kɛ be yi sika.
25 “Ɛsdrasi, ɔ kusu fa ngwlɛlɛ mɔ Ɲanmiɛn mannin wɔ’n,* fa sie jɔlɛ difuɛ’m be ukafuɛ mun nin jɔlɛ difuɛ mun naan be di be nga be o Nzue’n i bue kun lɔ’n, be kwlaa nga be si ɔ Ɲanmiɛn’n i mmla mun’n be jɔlɛ. Yɛ be kwlaa nga be siman Ɲanmiɛn i mmla mun’n, ɔ fata kɛ amun kle be.+
26 Sran kwlaa ng’ɔ nantiman ɔ Ɲanmiɛn’n i mmla’n su’n, annzɛ ɔ nantiman famiɛn’n i mmla’n su’n, ɔ fata kɛ be tu i fɔ ndɛndɛ. Wienun-ɔn, bé kún i, annzɛ bé kɛ́n i bo, annzɛ bé fú i alamannin, annzɛ bé wlɛ́ i bisua.”
27 Maan be manman e nannan’m be Ɲanmiɛn Zoova! Afin ɔ suli famiɛn’n i bo kɛ ɔ yo Zoova i sua m’ɔ o Zerizalɛmun lɔ’n i klanman.+
28 Ɔ kleli kɛ ɔ klo min dan, afin ɔ yoli maan famiɛn’n+ nin i afɔtuɛ manfuɛ mun,+ ɔ nin i awlo lɔ sran dandan mɔ be le kwlalɛ’n be kwlaa be yoli min ye. Ɔ maan n ɲannin fanngan,* afin min Ɲanmiɛn Zoova i sa o min su. Yɛ n yiali Izraɛlifuɛ nga be le ɲrun’n* naan be nin min wɔ.
Ja ngua lɔ ndɛ mun
^ I bo’n yɛ: “Ukalɛ.”
^ Ebr., “ɔ si Mmla’n i klɛ kpa.”
^ Annzɛ “Netinimun mun.” Ebr., “be nga be fa be mannin’n.”
^ Ebr., “siesieli i awlɛn’n.” Annzɛ “fuali kpa i awlɛn’n nun lɔ.”
^ Ebre nun’n, fluwa klɛfuɛ nga be kɛn i ndɛ wa’n ɔ klɛ Mmla’n nin Ɲanmiɛn ndɛ’n i bue wie mun.
^ Ebre nun’n, fluwa klɛfuɛ nga be kɛn i ndɛ wa’n ɔ klɛ Mmla’n nin Ɲanmiɛn ndɛ’n i bue wie mun.
^ Annzɛ “Efrati’n i bue kun lɔ’n.”
^ Annzɛ “Netinimun mun.” Ara., “be nga be fa be mannin’n.”
^ Ara., “ɔ Ɲanmiɛn’n i ngwlɛlɛ m’ɔ o ɔ sa nun’n.”
^ Annzɛ “n wlali min wun fanngan.”
^ Ebr., “kpɛn mun.”
