Ɛsdrasi 8:1-36
8 Famiɛn Atazɛɛzɛsi blɛ su’n, be klɛli be nga be nin min fin Babilɔnin lɔ bali’n, ɔ nin be si’m be awloboawlobo’m be su kpɛnngbɛn’m be dunman. Be yɛ:+
2 Gɛɛsɔmun, ɔ fin Fineasi i osu’n nun.+ Daniɛli, ɔ fin Itamaa i osu’n nun.+ Atisi, ɔ fin Davidi i osu’n nun.
3 Zakari, ɔ nin i sin yasua ya kun ablenun (150) mɔ be klɛli be dunman’n, be fin Sekania nin Parɔsu be osu’n nun.
4 Zeraya i wa Elio-Enai, ɔ nin i sin yasua ya nɲɔn (200), be fin Paati-Moabu i osu’n nun.+
5 Zaaziɛli i wa Sekania, ɔ nin i sin yasua ya nsan (300), be fin Zatu i osu’n nun.+
6 Zonatan i wa Ebɛdi, ɔ nin i sin yasua ablenun (50), be fin Adɛn i osu’n nun.+
7 Atali i wa Zesaya, ɔ nin i sin yasua ableso (70), be fin Elamun i osu’n nun.+
8 Misɛli i wa Zebadia, ɔ nin i sin yasua ablaɔcuɛ (80), be fin Sefatia i osu’n nun.+
9 Zeyiɛli i wa Abdiasi, ɔ nin i sin yasua ya nɲɔn blu-nin-mɔcuɛ (218), be fin Zoabu i osu’n nun.
10 Zosifia i wa Selomiti, ɔ nin i sin yasua ya kun ablesiɛn (160), be fin Banin i osu’n nun.
11 Bebai i wa Zakari, ɔ nin i sin yasua ablaɔn-nin-mɔcuɛ (28), be fin Bebai i osu’n nun.+
12 Akatan i wa Zoanan, ɔ nin i sin yasua ya kun blu (110), be fin Azgadi i osu’n nun.+
13 Elifelɛti, nin Zeiɛli, nin Semaia, ɔ nin be sin yasua ablesiɛn (60), be fin Adonikamun i osu’n nun,+ be yɛ be ti be kasiɛn’n niɔn.
14 Zabudi nin Utai, ɔ nin be sin yasua ableso (70), be fin Bigvai i osu’n nun.+
15 N yiali be nzue ba ng’ɔ sonji kɔ Aava+ lɔ’n i wun lɔ, e boli nanmue lɛ cɛn ba nsan. Sanngɛ kɛ n nianniannin nvlefuɛ mun nin Ɲanmiɛn ɲrun jranfuɛ’m be nun’n, m’an wunman Levifuɛ wie fi.
16 Ɔ maan n yiali Eliezɛɛ, nin Ariɛli, nin Semaia, nin Ɛlnatan, nin Zaribu, nin Ɛlnatan, nin Natan, nin Zakari, nin Mesulamun mɔ be dun yasua’m be ɲrun mmua’n. Kpɛkun n yiali Zoiaribu, nin Ɛlnatan mɔ be ti like klefuɛ’n.
17 I sin’n, n sunmannin be Ido i sin, ɔ ti be nga be o lika nga be flɛ i kɛ Kasifia’n be ɲrun dinfuɛ. N seli be kɛ be ko se Ido nin i niaan bian nga be di junman Ɲanmiɛn sua’n nun’n,* mɔ be o Kasifia lɔ’n be kɛ be blɛ e sran naan be wa di junman e Ɲanmiɛn’n i sua’n nun.
18 Kɛ mɔ Ɲanmiɛn i sa kpa’n wo e su’n ti’n, be blɛli e sran ngwlɛlɛfuɛ kun, ɔ fin Mali+ m’ɔ ti Levi i anunman’n, mɔ i kusu ti Izraɛli i wa’n i osu’n nun. Be flɛ i kɛ Serebia,+ ɔ nin i mma mun nin i niaan yasua mun yɛ be bali-ɔ, be ti yasua blu-nin-mɔcuɛ (18).
19 Yɛ Asabia, ɔ nin Zesaya m’ɔ ti Merarifuɛ’n,+ ɔ nin i niaan yasua mun nin be mma mun, be ti yasua ablaɔn (20).
20 Ɲanmiɛn sua’n nun junman difuɛ* nga Davidi nin i sran dandan’m be sieli be kɛ be uka Levifuɛ mun’n, mɔ be klɛli be kwlaa be dunman’n, be ti sran ya nɲɔn ablaɔn (220).
21 I sin’n, n seli kɛ e ci nglɛmun Aava nzue ba’n i wun lɛ, naan e kan e wun ase e Ɲanmiɛn’n i ɲrun, naan ɔ kle e atin, naan kɛ é tú ajalɛ’n, sa fi w’a juman e nin e mma mun e su, naan e ninnge’m b’a fiman e sa.
22 Kɛ ɔ yo naan n se famiɛn’n kɛ ɔ man e sonja, nin nnɛn kpanngɔ su fufuɛ naan be sasa e atin’n su’n, ɔ kunnin min ɲannzuɛn. Afin e seli i kɛ: “E Ɲanmiɛn’n i sa kpa’n wo be nga be kunndɛ i’n be su.+ Sanngɛ be nga be kaci be sin be si i’n, ɔ yi i wunmiɛn’n nin i ya’n be nglo kle be.”+
23 Ɔ maan sa sɔ’n ti’n, e cili nglɛmun yɛ e srɛli e Ɲanmiɛn’n. Kpɛkun ɔ tili e srɛlɛ’n.+
24 Yɛ n fali Ɲanmiɛn ɲrun jranfuɛ’m be su kpɛn blu-nin-nɲɔn (12), be yɛle Serebia, nin Asabia,+ ɔ nin be niaan yasua blu.
25 I sin’n, n sunnzunnin sika, nin sika ɔkwlɛ, nin ninnge nga famiɛn’n, nin i afɔtuɛ manfuɛ mun, nin i awlo lɔ sran dandan mun, ɔ nin Izraɛlifuɛ nga be o lɛ’n be kwlaa be mannin m’ɔ ti e Ɲanmiɛn’n i sua’n i liɛ’n.+
26 Ninnge nga n sunnzunnin mɔ n fa wlali be sa nun’n mun yɛ: Sika talan* ya nsiɛn ablenun (650), sika ninnge ya kun (100) m’ɔ kwla ju talan nɲɔn’n, ɔ nin sika ɔkwlɛ talan ya kun (100),
27 ɔ nin sika ɔkwlɛ kpongbo ba kanngan ablaɔn (20) m’ɔ kwla ju dariki* akpi kun’n (1.000), nin aaba like nɲɔn. Be fali aaba jrɛiin yɛ be yoli be-ɔ, be ti ɔkwlɛ mianmian kpa, be ti klanman kɛ sika ɔkwlɛ sa.
28 Kpɛkun n seli be kɛ: “Amun ti Zoova liɛ klonglo,+ yɛ ninnge nga’m be ti Ɲanmiɛn liɛ klonglo, yɛ sika nin sika ɔkwlɛ’n be ti be klunklo like mɔ be fa mannin Zoova m’ɔ ti amun nannan’m be Ɲanmiɛn’n.
29 Amun sie be kpa lele naan amun a sunnzun be Ɲanmiɛn ɲrun jranfuɛ’m be su kpɛn mun, nin Levifuɛ mun, nin famiɛn’n i awlo lɔ sran dandan mun, nin Izraɛlifuɛ’m be si’m be awlobo kpɛn’m be ɲrun Zerizalɛmun lɔ.+ Amun sunnzun be Zoova i sua’n nun lɔ sua ba’m be nun.”*
30 Ɲanmiɛn ɲrun jranfuɛ mun nin Levifuɛ’m be fali sika’n, nin sika ɔkwlɛ’n, ɔ nin ninnge nga be sunnzunnin be fa wlali be sa nun’n, naan bé fá kɔ́ Zerizalɛmun lɔ, e Ɲanmiɛn’n i sua’n nun lɔ.
31 I agualiɛ su’n, anglo klikli’n i cɛn ba blu-nin-nɲɔn’n (12) su’n,+ e jasoli Aava nzue ba’n+ i wun lɛ e ɔli Zerizalɛmun. E Ɲanmiɛn’n i sa’n trannin e su, ɔ deli e e kpɔfuɛ mun nin be nga be bu sa sran’m be ɲrun atin’n su’n be sa nun.
32 Kɛ e juli Zerizalɛmun lɛ’n,+ cɛn nsan sinnin.
33 Kpɛkun cɛn nnan’n su’n, e sunnzunnin sika’n nin sika ɔkwlɛ’n, ɔ nin ninnge mun e Ɲanmiɛn’n i sua’n nun lɔ,+ yɛ e fa be mannin Ɲanmiɛn ɲrun jranfuɛ Iri i wa Meremɔti,+ nin Fineasi i wa Eleazaa m’ɔ nin i be o lɛ’n, ɔ nin Zesua i wa Zozabadi,+ nin Binii i wa Noadia mɔ be ti Levifuɛ mɔ be o be wun lɛ’n.+
34 Be kali ninnge’m be kwlaa yɛ be sunnzunnin be. Be klɛli be kwlaa be nɔnnin’n i nuan fluwa kun nun.
35 Be nga be sali be sin’n, be yili tɛ nga kɛ bé yí’n be yra nnɛn’n i kɔlikɔli’n be mannin Izraɛli Ɲanmiɛn’n. Izraɛlifuɛ’m be kwlaa be mannin nannin tola blu-nin-nɲɔn (12),+ nin bua ɲin ablangwlan-nin-nsiɛn (96),+ nin bua ba yasua ableso-nin-nso (77), ɔ nin boli yasua blu-nin-nɲɔn (12),+ naan be fa yi sa tɛ’n i ti tɛ. Be fali nnɛn sɔ’m be kwlaa be yili tɛ nga kɛ bé yí’n be yra nnɛn’n i kɔlikɔli’n be mannin Zoova.+
36 I sin’n, e fali ndɛ nga famiɛn’n kannin mɔ be klɛli’n+ e mannin famiɛn’n i janunfuɛ mun, nin Nzue’n i bue kun lɔ*+ siefuɛ mun, be kusu be suannin nvlefuɛ mun be bo, yɛ be suannin Ɲanmiɛn Kpli i sua’n i kplanlɛ junman’n i bo.+
Ja ngua lɔ ndɛ mun
^ Annzɛ “Netinimun mun.” Ebr., “be nga be fa be mannin’n.”
^ Annzɛ “Netinimun.” Ebr., “be nga be fa be mannin’n.”
^ Annzɛ “kan be di like lɛ’n.”
^ Annzɛ “Efrati’n i bue kun lɔ.”
