Ɛsdrasi 9:1-15
9 Kɛ e yoli ninnge sɔ mun’n, sran dandan’m be ɔli min wun lɔ kpɛkun be seli min kɛ: “Izraɛlifuɛ mun nin Ɲanmiɛn ɲrun jranfuɛ mun, nin Levifuɛ mun b’a yiman be wun nvle kun nga mun be nunfuɛ’m be nun. Be yo tete ninnge+ nga Kanaanfuɛ mun, nin Ɛtifuɛ mun, nin Perizifuɛ mun, nin Zebisifuɛ mun, nin Amɔnfuɛ mun, nin Moabufuɛ mun, nin Eziptifuɛ mun,+ ɔ nin Amɔɔfuɛ’m+ be yo’n wie.
2 Be bɔbɔ be jali nvle sɔ’m be nun bla wie mun, yɛ be fali wie mun mannin be mma yasua mun.+ Siɛn’n, nvle ng’ɔ ti Ɲanmiɛn liɛ klonglo’n i nunfuɛ’m+ b’a sanngan nvle kun nga’m be nunfuɛ’m be nun.+ Sran dandan mun nin famiɛn’n i janunfuɛ mun yɛ be dun mmua yoli sa tɛ sɔ’n niɔn.”
3 Kɛ n tili ndɛ sɔ’n, n titili min wun tralɛ’m be nun, n tutuli min ti ndrɛ’n nin min akanza’n wie, yɛ n trannin ase min wla m’ɔ boli min wun dan’n ti.
4 I sin’n, be nga be bu Izraɛli Ɲanmiɛn’n i ndɛ’n i like dan’n,* be yiali min wun lɛ. Afin be nga be sali be sin’n be nin Ɲanmiɛn b’a nantiman klanman. Kɛ ɔ́ yó sɔ’n, nn n ti ase, awlabɔɛ’n w’a kun min kpo. N kali sɔ lele Ɲanmiɛn i nnɔsua nun ble annzɛ i wun su like manlɛ blɛ’n juli.+
5 Kɛ n trannin awlabɔɛ nun lele mɔ ble annzɛ i wunsu like mɔ be fa man Ɲanmiɛn’n i manlɛ blɛ’n juli’n,+ n jasoli, ɔ nin min wun tralɛ titiwa’n, n kotoli kpɛkun n mannin min sa’m be su nglo min Ɲanmiɛn Zoova i ɲrun.
6 Yɛ n seli kɛ: “Ee, min Ɲanmiɛn, ɲannzuɛn kun min dan, n kwlá manman min ti’n su n nianman wɔ bɔbɔ. Ee, min Ɲanmiɛn, e fɔnlɛ’m b’a yo dan e ti su, yɛ e sa tɛ’m b’a fu lele b’a ju ɲanmiɛn su lɔ.+
7 Kɛ ɔ fɛ i e nannan’m be blɛ su lele andɛ’n, e sa tɛ’n w’a yo dan.+ E fɔnlɛ’m be ti’n, e nin e famiɛn mun nin e Ɲanmiɛn ɲrun jranfuɛ mun e tɔli nvle kun nga’m be famiɛn’m be sa nun. Be fali tokofi kunnin e,+ be trali e ɔli,+ be fɛnnin e bo ninnge mun,+ yɛ e ɲin guali ase, kɛ nga andɛ’n e te o nun yɛ’n sa.+
8 Sanngɛ blɛ kpe kan nga nun’n, e Ɲanmiɛn Zoova, a yoli e ye. A yoli maan e nun wie’m be ɲannin be ti. A mannin e fiawlɛ kun* ɔ lika m’ɔ ti ɔ liɛ klonglo’n nun,+ naan e ɲrun’n kpaja. E Ɲanmiɛn, a yoli sɔ naan blɛ mɔ e o kanga nun’n e ɲan wunmiɛn kan.
9 Kannzɛ bɔbɔ e ti kanga’n,+ sanngɛ e Ɲanmiɛn, w’a yiman e ase e kanga blɛ sɔ’n nun. A kleli kɛ a klo e dan, afin a yoli maan Pɛɛsi famiɛn’m be yoli e ye,+ naan e ɲan wunmiɛn e kplan wɔ mɔ a ti e Ɲanmiɛn’n ɔ sua’n,+ naan e siesie i lika nga be sacili’n be ye, naan e ɲan yɔbuɛ talɛ kun* Zida nin Zerizalɛmun wa.
10 “?Sanngɛ siɛn’n, e Ɲanmiɛn, é sé sɛ? Afin e yacili ɔ mmla
11 mɔ a sinnin ɔ sufuɛ Ɲanmiɛn nuan ijɔfuɛ’m be lika fa mannin e’n. A seli kɛ: ‘Mɛn nga amun su ko fɛ i lɛ’n ti fiɛn, afin be nga be tran nun’n be ninnge nga be yo’n ti fiɛn, be tete ninnge nga be yo mɔ i ti’n mɛn’n w’a yo fiɛn’n, w’a yi mɛn’n piɛ.+
12 I sɔ’n ti’n, nán amun fa amun mma bla mun man be mma yasua mun, yɛ nán amun fa be mma bla mun man amun mma yasua mun.+ Nán amun kunndɛ le kɛ be di fɔundi annzɛ be ɲan be wun,+ kɛ ɔ ko yo naan amun a ɲan wunmiɛn naan amun a di mɛn’n i nun ninnge kpakpa mun’n ti. Kpɛkun amún fá mɛn’n, yɛ ɔ́ yó amun mma’m be liɛ tititi.’
13 E ayeliɛ tɛ’n nin sa tɛ dan mɔ e yoli’n, be ti yɛ sa kwlaa nga’m be tɔli e su-ɔ. E Ɲanmiɛn, e sa tɛ’m be nuan like ng’ɔ nin e fata’n, nɛ́n i yɛ a fa mannin e-ɔ.+ A kplinnin su kɛ e nga e o wa yɛ’n e ɲan e ti.+
14 ?Ɔ fata kɛ e nin be nga be yo tete sa kɛ nga sa’n e ja e afiɛn bla naan e fɔn ɔ mmla mun ekun?+ Sɛ e yo sɔ’n, á fá e wun ya dan kpa, yɛ á núnnún e mlɔnmlɔn, sran fi su kaman lɛ.
15 Ee Zoova, Izraɛli Ɲanmiɛn, a ti sa nuan su sɛsɛ yofuɛ,+ afin e nun wie mun e kali nguan nun lele andɛ. E o ɔ ɲrun wa nin e sa tɛ’n. E sa tɛ’n ti’n, e nin ɔ ɲrun jranlɛ fataman.”+
Ja ngua lɔ ndɛ mun
^ Ebr., “be nga Izraɛli Ɲanmiɛn’n i ndɛ’n ti’n be usu’n.”
^ Ebr., “kpɛngbɛ kun.”
^ Annzɛ “be wun sasalɛ talɛ kun.”
