Ɛstɛɛ 1:1-22
1 Asierisi* blɛ su yɛ sa ng’ɔ o yɛ’n juli-ɔ. Asierisi sɔ’n, ɔ sieli nvlenvle ya kun ablaɔn-nin-nso (127).+ I famiɛn diwlɛ’n fɛ i Ɛndi lele fa ju Etiopi.*
2 Kɛ Asierisi trɛnnin i famiɛn bia’n su Sizi+ m’ɔ ti famiɛn klɔ’n* su lɔ’n,
3 m’ɔ dili afuɛ nsan’n, ɔ yoli maan i sran dandan mun nin i sufuɛ’m be kwlaa be dili cɛn dan kpa. Pɛɛsi+ sonja nin Medi+ sonja mun, nin sran dandan mun, ɔ nin nvlenvle’m be siefuɛ’m be bɛli i ɲrun lɛ.
4 Ɔ fɛli i famiɛn diwlɛ’n nun aɲrunɲan ninnge kpakpa mun, nin i kwlalɛ dan’n, ɔ nin ɲrun m’ɔ le i’n fa kleli be. Ɔ yoli sɔ cɛn kpanngban, ɔ dili cɛn ba ya kun ablaɔcuɛ (180).
5 Kɛ cɛn sɔ’m be sinnin’n, famiɛn’n yoli maan be kwlaa nga be o Sizi m’ɔ ti famiɛn klɔ’n su lɛ’n be dili cɛn, cɛn ba nso. Be nga be le ɲrun-o, be nga be leman ɲrun-o, be kwlaa be yiali famiɛn’n i sua’n i awlo klun’n nun lɔ.
6 Be yoli awlo klun’n i klanman kpa. Be fali lɛn tannin, nin tannin mɔ be fali jese kplɔkɔɔ be yoli’n, ɔ nin tannin ble. Be fali tannin tanmue kpakpa mun nin jese ɔkwlɛ kankan be fa trali be ase, kpɛkun be fa cicili sika nga wie mun. Be fali mablu be yoli sua ja mlomlo wie mun, kpɛkun be siesieli bia tɛnndɛn wie mɔ be fali sika ɔkwlɛ nin sika yoli’n. Be siesieli bia sɔ mun karo mɔ be fali pɔɔfiri nin mablu ufue nin nakli, ɔ nin mablu ble tritri be yoli’n su.
7 Be suli duvɛn’n sika ɔkwlɛ klowa’m be nun. Ɔ le klowa kun nin i wafa. Duvɛn nga famiɛn’n mannin’n, ɔ sɔnnin kpa. Nga famiɛn’n kwla man’n, ɔ mannin.
8 Be kpɛli nzan’n i nɔnlɛ’n i su mmla. Yɛle kɛ be mianman sran fi.* Afin famiɛn’n seli i awlo lɔ junman difuɛ’m be kɛ maan sran kun yo nga i bɔbɔ klo’n.
9 Famiɛn’n i yi* Vasti+ kusu yiali bla’m be kɛ be ko di cɛn Famiɛn Asierisi i famiɛn sua’n nun lɔ.
10 Cɛn nso su’n, kɛ Famiɛn Asierisi nɔnnin duvɛn mɔ i klun jɔli kpa’n, ɔ seli i awlo lɔ junman difuɛ nso mɔ be mɛntɛn i’n, mɔ be yɛle Meuman, Bizta, Aabona,+ Bigta, Abagta, Zetaa, ɔ nin Kaakasi be kɛ
11 be fa famiɛn’n i yi Vasti be bla famiɛn’n i ɲrun. Kɛ ɔ́ bá’n, maan ɔ wlɛ i famiɛn kle’n, naan ɔ wa fɛ i klanman’n kle nvlefuɛ mun nin sran dandan mun. Afin bla’n ti klanman dan.
12 Sanngɛ famiɛn’n i yi Vasti w’a kplinman su le kɛ ɔ́ yó like nga famiɛn’n sinnin i awlo lɔ junman difuɛ’m be lika seli i kɛ ɔ yo’n. I sɔ’n ti’n, famiɛn’n fali ya dan, i awlɛn kpɛli i klun.
13 I sin’n, famiɛn’n kannin ndɛ’n kleli ngwlɛlɛfuɛ mɔ be si sa siesie’n (kɛ famiɛn’n fɛ i ndɛ mun kɔ be nga be si mmla’n nin be nga be siesie ndɛ titi’n be ja su kɛ ngalɛ’n sa.
14 Pɛɛsi nin Medi lɔ sran dandan nso+ mɔ be mantan famiɛn’n, mɔ be le atin kɔ i wun lɔ’n, mɔ be le ɲrun kpa famiɛn diwlɛ’n nun’n, be yɛle Kaasena, Setaa, Admata, Taasisi, Merɛsi, Maasena, yɛ Memukan).
15 Famiɛn’n usali kɛ: “?Kɛ nga mmla’n fa kan’n sa’n, ngue yɛ ɔ fata kɛ e fa yo min yi Vasti-ɔ? Afin w’a kplinman su kɛ ɔ́ yó like nga min bɔbɔ Famiɛn Asierisi n sinnin min awlo lɔ junman difuɛ’m be lika n seli i kɛ ɔ yo’n.”
16 Kɛ ɔ yoli sɔ’n, Memukan seli famiɛn’n nin i sran dandan’m be kɛ: “Nán famiɛn’n i ngunmin yɛ i yi Vasti yoli i sa-ɔ,+ sanngɛ sran dandan’m be kwlaa, nin Famiɛn Asierisi i nvle’n nunfuɛ’m be kwlaa yɛ ɔ yoli be sa-ɔ.
17 Afin bla’m be kwlaa bé wá tí sa nga famiɛn’n i yi’n yoli’n nun, yɛ bé yó be wun’m be finfin. Bé sé kɛ: ‘Famiɛn Asierisi seli kɛ be fɛ i yi Vasti be wɔ i ɲrun lɔ, sanngɛ i waan ɔ kɔman.’
18 Cɛn kunngba sɔ’n nun’n, kɛ Pɛɛsi nin Medi sran dandan’m be yi’m bé wá tí sa nga famiɛn’n i yi’n yoli’n nun’n, bé kán klé famiɛn’n i sran dandan mun. I sɔ’n yó maan aɲinyiɛ su tranman lɛ kun, yɛ ɔ́ kpɛ́ ndɛnngan ba.
19 Sɛ ɔ ti famiɛn’n i klun su’n, maan famiɛn’n kpɛ mmla kun, yɛ maan be klɛ i Pɛɛsi nin Medi mmla mɔ be kwlá nunnunman be’n be nun.+ Mmla sɔ’n ti’n, Vasti su kwlá baman Famiɛn Asierisi i ɲrun wa kun. Yɛ maan famiɛn’n fa famiɛn bla uflɛ mɔ i kpa trɛ i’n, ɔ kaci i.
20 Kɛ famiɛn’n i famiɛn diwlɛ m’ɔ cɛnnin’n i nunfuɛ’m be kwlaa bé wá tí mmla nga famiɛn’n kpɛli’n, bla’m be kwlaa, be nga be le ɲrun-o, be nga be leman ɲrun-o, bé bú be wun’m be sran.”
21 Ndɛ sɔ’n yoli famiɛn’n nin i sran dandan’m be fɛ. Ɔ maan famiɛn’n niannin nga Memukan kannin’n su yoli.
22 Ɔ klɛli fluwa ɔli nvlenvle ng’ɔ sie be’n be kwlaa be nun.+ Ɔ niannin wafa nga nvle kun nunfuɛ’m be klɛ ndɛ’n i su yɛ ɔ klɛli-ɔ, yɛ ɔ klɛli ndɛ’n be aniɛn’n nun. Fluwa sɔ’n se kɛ yasua kwlaa ng’ɔ le bla’n, i yɛ ɔ fata kɛ ɔ sie i awlobo’n niɔn,* yɛ i nvlefuɛ’m be aniɛn liɛ’n yɛ ɔ fata kɛ ɔ kan-ɔn.
Ja ngua lɔ ndɛ mun
^ Atrɛkpa’n, Zɛɛzɛsi klikli’n i ndɛ yɛ be kan-ɔn, ɔ ti Dariisi Dan’n i wa (Dariisi Istaspu).
^ Annzɛ “Kisi.”
^ Annzɛ “famiɛn sua’n”, “sua fleiin’n.”
^ Annzɛ “be tanndanman sran ɲrun.”
^ Ebr., “Famiɛn Bla.”
^ Annzɛ “ɔ yo i awlobo’n su sran dan.”
