Ɛstɛɛ 4:1-17
4 Kɛ Maadose+ tili ndɛ sɔ’n,+ ɔ titili i wun tralɛ’m be nun, ɔ wlali bajɛ tralɛ, yɛ ɔ fali nzuɛn guɛli i wun. I sin’n, ɔ ɔli klɔ’n i afiɛn lɔ, ɔ mɛnnin i nɛn’n su sunnin sunlɛ kpa.
2 Ɔ ɔli lele ko jrannin famiɛn’n i anuan’n i ɲrun lɛ, afin sran fi leman atin fɛmɛn i wun bajɛ tralɛ wluman lɔ.
3 Nvle kwlaa+ nga famiɛn’n i ndɛ’n nin i mmla’n juli lɛ’n, Zifu’m be wla boli be wun dan kpa, be cili nglɛmun,+ be sunnin yɛ be boli awuyomo. Be nun sunman be lali bajɛ su, ɔ nin nzuɛn nun.+
4 Kɛ Ɛstɛɛ i sufuɛ bla mun nin i junman difuɛ mun* be kannin ndɛ’n be kleli i’n, i wla boli i wun dan. I sin’n, ɔ fali tralɛ ko mannin Maadose naan ɔ wla fa kaci bajɛ tralɛ’n, sanngɛ w’a sɔman nun.
5 Kɛ ɔ yoli sɔ’n, Ɛstɛɛ flɛli Ataki m’ɔ ti famiɛn’n i junman difuɛ’m be nun kun’n, mɔ famiɛn’n sieli i kɛ ɔ nian Ɛstɛɛ i lika’n. Ɛstɛɛ seli i kɛ ɔ ko usa Maadose sa ng’ɔ juli mɔ i ti yɛ ɔ yo sɔ’n.
6 Ɔ maan Ataki fiteli ko wunnin Maadose i wun klɔ’n i gua’n su lɔ, famiɛn’n i anuan’n i ɲrun lɛ.
7 Maadose kannin sa kwlaa ng’ɔ juli i su’n i ndɛ kleli i. Ɔ boli sika+ nga Aman waan ɔ́ fá gúɛ i famiɛn’n i ninnge kpakpa’m be guawlɛ’n nun naan be nunnun Zifu mun’n+ i nuan kleli i.
8 Fluwa nga be klɛli su mmla kɛ be nunnun Zifu mun, mɔ be boli i jɔ Sizi lɔ’n,+ ɔ fali kun mɛnnin i. I waan ɔ fa kle Ɛstɛɛ, ɔ yiyi nun kle i naan ɔ se i+ kɛ ɔ wɔ famiɛn’n i sin naan ɔ srɛ i kɛ ɔ si be aunnvɔɛ, yɛ maan i bɔbɔ kɛn i nvlefuɛ’m be ti ndɛ famiɛn’n i ɲrun.
9 Ataki sɛli i sin, ɔ wa kannin ndɛ nga Maadose kannin’n kleli Ɛstɛɛ.
10 Ɛstɛɛ kusu sunmannin Ataki naan ɔ ko se Maadose kɛ:+
11 “Famiɛn’n i sufuɛ’m be kwlaa nin nvle nga famiɛn’n sie be’n be nunfuɛ’m be si kɛ yasua annzɛ bla kwlaa nga b’a flɛmɛn i m’ɔ wlu famiɛn’n i awlo’n i klun lɔ’n,+ ɔ fata kɛ be kun i. Mmla kunngba nga be di su’n yɛ ɔ o lɛ-ɔ. Sɛ á wún kɛ ɔ́ ká nguan nun’n, nn famiɛn’n w’a fɛ i famiɛn dilɛ kpɔnman mʼɔ ti sika ɔkwlɛʼn w’a tinngɛ i ɲrun.+ Kusu min cɛn ba ablasan (30) yɛ, be nin-a flɛman min kɛ n wɔ famiɛn’n i ɲrun lɔ.”
12 Kɛ be kannin ndɛ nga Ɛstɛɛ kannin’n be kleli Maadose’n,
13 i waan be ko se Ɛstɛɛ kɛ: “Nán bu i kɛ kɛ mɔ a o famiɛn’n i awlo lɔ’n ti’n, bé kún Zifu onga mun naan ɔ liɛ’n á ɲán ɔ ti.
14 Afin sɛ a muan ɔ nuan blɛ kɛ nga sa nun’n, Zifu’m be ti ɲanlɛ nin be delɛ’n ɔ́ fín lika uflɛ.+ Sanngɛ a nin ɔ si i osu’n nunfuɛ mun amún wú. ?I kpa’n, sɛ sa nga i ti yɛ maan a kacili famiɛn bla’n nin-o, wan yɛ ɔ si nun-ɔn?”+
15 Yɛ Ɛstɛɛ seli Maadose kɛ:
16 “Kɔ naan ko yia Zifu nga be o Sizi wa’n be kwlaa naan amun ci nglɛmun+ be man min. Nán amun di like, yɛ nán amun nɔn like fi lele cɛn ba nsan,+ kɔnguɛ nin wia nun. N kusu, e nin min junman difuɛ bla mun é wá cí nglɛmun wie. Kannzɛ mmla’n manman min atin bɔbɔ’n, ń má kɔ́ famiɛn’n i ɲrun lɔ. Sɛ ɔ fata kɛ n wu’n, n ko wu.”
17 Ɔ maan Maadose ɔli, ɔ yoli like kwlaa nga Ɛstɛɛ seli i kɛ ɔ yo’n.
Ja ngua lɔ ndɛ mun
^ Ebr., “eniki mun.” Nian Ndɛ’m be bo tulɛ lika’n nun lɔ.
