1 Be Ɲoliɛ 17:1-27
17 Kɛ Davidi wa trɛnnin i bɔbɔ i sua’n* nun cɛ’n, ɔ seli Ɲanmiɛn nuan ijɔfuɛ Natan+ kɛ: “Sua nga n tran nun yɛ’n, sɛdri waka+ yɛ be fa kplannin-ɔn. Kusu nn Zoova i aenguɛ’n i alaka’n wo tannin sua nun.”+
2 Natan tɛli Davidi su kɛ: “Like nga ɔ awlɛn o su kɛ á yó’n, yo. Afin Ɲanmiɛn Kpli jin ɔ sin.”
3 Sanngɛ kɔnguɛ sɔ’n nun’n, Ɲanmiɛn kan ndɛ kleli Natan. Ɔ seli i kɛ:
4 “Kɔ ko se min sufuɛ Davidi kɛ: ‘Ndɛ nga Zoova kan’n yɛ: “Nán wɔ yɛ á kplán sua nga n ko tran nun’n niɔn.+
5 Kɛ n fali Izraɛlifuɛ mun n fiteli’n lele mɔ w’a fa ju yɛ’n, n nin-a tranman sua kpakpa nun sa le. Sanngɛ tannin sua nin kpata bo yɛ n tu trannin sa lelele-ɔ.*+
6 Nán andɛ sa yɛ e nin Izraɛlifuɛ’m be kwlaa e sɔli ajalɛ tulɛ-ɔ. ?Sanngɛ jɔlɛ difuɛ nga n sieli be Izraɛlifuɛ’m be su naan be nian min sran’m be lika’n, n seli be nun kun sa le kɛ ngue ti yɛ w’a faman sɛdri waka w’a kplanman sua kun w’a manman min-ɔn?’”’
7 “Kan ndɛ nga kle min sufuɛ Davidi. Se i kɛ: ‘Ndɛ nga Zoova m’ɔ ti sonja’m be su kpɛn’n kan’n yɛ: “Kɛ ń kó fá wɔ’n, nn a su nian bua’m be lika, be didiwlɛ’n nun lɔ. Kpɛkun n sieli wɔ Izraɛli m’ɔ ti min nvle’n i su kpɛn.+
8 Lika kwlaa nga á kɔ́’n, e nin wɔ-ɔ.+ Yɛ ń kún ɔ kpɔfuɛ’m be kwlaa ɔ ɲrun lɛ.+ Ń yó maan ɔ dunman’n fú kɛ asiɛ’n su sran dandan’m be liɛ’n sa.+
9 Ń wá mán Izraɛlifuɛ mɔ be ti min sran’n be lika kun. Lɛ yɛ bé trán-ɔn. Yɛ like fi su kleman be yalɛ kun. Klunwifuɛ’m be su kleman be ɲrɛnnɛn kun kɛ laa’n sa.+
10 Jɔlɛ difuɛ nga n fa be n sieli Izraɛli m’ɔ ti min nvle’n su’n+ be blɛ su yɛ be sɔli be ɲrɛnnɛn klelɛ-ɔ. Sanngɛ ń yó maan ɔ kpɔfuɛ’m be kwlaa bé ló sa kplɔkɔɔ ɔ bo lɛ.+ Asa ekun’n, n se wɔ kɛ: ‘Zoova yó maan famiɛn dilɛ’n su tuman ɔ osu’n nun le.’*
11 “‘“Kɛ a ko wu mɔ be ko sie wɔ kɛ be fa sieli ɔ nannan mun sa’n, ń fá ɔ osu’n nunfuɛ kun, yɛle kɛ ɔ wa yasua’m be nun kun,+ naan ɔ sin ɔ ja nun naan ɔ di famiɛn. Yɛ ń yó maan i famiɛn dilɛ’n táka kpa.+
12 I yɛ ɔ́ wá kplán sua kun mán min-ɔn.+ Yɛ ń yó maan i famiɛn dilɛ’n táka kpa, kpɛkun ɔ́ ká lɛ tititi.+
13 Ń káci i si, yɛ ɔ́ káci min wa.+ Ń kló i titi. N su yimɛn i ase+ kɛ nga n fa yili sran nga a sinnin i osu’n i ase’n sa.+
14 Ń fɛ́ i síe min awlo’n nin min famiɛn diwlɛ’n su tititi,+ kpɛkun i famiɛn dilɛ’n ká lɛ tititi.”’”+
15 Natan ko kannin ndɛ kwlaa sɔ’n, ɔ nin sa ng’ɔ wunnin i aolia nun’n i kwlaa kleli Davidi.
16 Kɛ ɔ yoli sɔ’n, Famiɛn Davidi ko trannin ase Zoova ɲrun lɛ naan w’a se kɛ: “?Ɲanmiɛn Zoova, wan yɛle min? ?Yɛ min awlo’n ti i liɛ sɛ ti yɛ a yoli like kwlaa sɔ’n mannin min-ɔn?+
17 Ɲanmiɛn, a bu i kɛ like nga a yo mannin min’n ti kaan. Kpɛkun a kan sa nga bé wá jú min mɔ n ti ɔ sufuɛ’n min awlo’n nun cɛn wie lele’n,+ i ndɛ ekun kle min. Asa ekun’n, Ɲanmiɛn Zoova, a yo min kɛ sran dan kun m’ɔ nin ayɛ yilɛ fata’n* sa.
18 A si min mɔ n ti ɔ sufuɛ’n min kpa liɛ su. A yoli maan n ɲannin ɲrun. ?Ɔ maan ngue ndɛ yɛ n bɔbɔ Davidi mɔ n ti ɔ sufuɛ’n, ń kɛ́n i ekun-ɔn?+
19 Zoova, min mɔ n ti ɔ sufuɛ’n nin akunndan nga a buli ɔ klun lɔ’n* ti’n, a yoli sa dandan kwlaa sɔ mun fa kleli kɛ a ti dan.+
20 Zoova, sran fi nin wɔ sɛman.+ Ɲanmiɛn uflɛ fi nunman lɛ, saan wɔ.+ Ndɛ kwlaa nga e tili’n kle sɔ weiin.
21 ?Yɛ asiɛ’n su nvle benin yɛ ɔ ti kɛ Izraɛli m’ɔ ti ɔ nvle’n sa-ɔ?+ Ɲanmiɛn Kpli, a ko kpɔli be ti naan be kaci ɔ liɛ.+ Yɛ a yoli sa dandan mun, nin sa sroesroe mun. Ɔ maan ɔ dunman’n fuli.+ Ɔ sran mɔ a ko kpɔli be ti Ezipti lɔ’n ti’n, a kannin nvlenvle wie’m be bo.+
22 A fali Izraɛlifuɛ mun yoli ɔ nvle mlɔnmlɔnmlɔn.+ Yɛ Zoova, ɔ kusu a yoli be Ɲanmiɛn.+
23 Siɛn’n, Zoova, like nga a seli kɛ á yó mán min mɔ n ti ɔ sufuɛ’n nin min osu’n nunfuɛ mun’n, maan ɔ kpɛn su tititi. Yɛ yia ndɛ nga a kannin’n i nuan.+
24 Maan ɔ dunman’n tran lɛ tititi yɛ be mɛnmɛn i+ tititi, yɛ maan sran’m be se kɛ: ‘Zoova m’ɔ ti sonja’m be su kpɛn’n, ɔ ti Izraɛli i Ɲanmiɛn. Ɔ ti Ɲanmiɛn Izraɛli lɔ.’ Yɛ maan n bɔbɔ Davidi mɔ n ti ɔ sufuɛ’n, min awlo’n taka kpa ɔ ɲrun.+
25 Afin wɔ mɔ a ti min Ɲanmiɛn’n, a yili like nga a klo kɛ á yó’n i nglo kleli min mɔ n ti ɔ sufuɛ’n. A seli kɛ á yó maan famiɛn dilɛ’n su tuman min osu’n nun le.* I sɔ’n ti yɛ min mɔ n ti ɔ sufuɛ’n, n ɲannin wunmiɛn n srɛli wɔ kɛ nga sa-ɔ.
26 Zoova, wɔ yɛ a ti Ɲanmiɛn Kpli’n niɔn. A seli kɛ á yó ninnge kpakpa sɔ mun mán min mɔ n ti ɔ sufuɛ’n.
27 I sɔ’n ti’n, yra min mɔ n ti ɔ sufuɛ’n, min awlo’n su, yɛ maan ɔ ka ɔ ɲrun lɛ tititi. Afin ɔ bɔbɔ Zoova a yrɛli i su, yɛ muae trán nun tititi.”
Ja ngua lɔ ndɛ mun
^ Annzɛ “i famiɛn sua’n.”
^ Atrɛkpa i bo’n yɛ: “N fɛ i kan min tannin sua’n wo lɛ’n n kɔ lika uflɛ, yɛ n fɛ i tranwlɛ kun nun n kɔ uflɛ nun.”
^ Ebr., “Zoova kplán sua kun mán wɔ.”
^ Annzɛ “sran dan kun.”
^ Annzɛ “ɔ klun sa’n.”
^ Ebr., “Zoova kplán sua kun mán min.”
