1 Be Ɲoliɛ 19:1-19
19 Kɛ i osu cɛli kan’n, Nasasi m’ɔ ti Amɔnfuɛ’m be famiɛn’n wa wuli. Kpɛkun i wa’n sinnin i osu kacili famiɛn.+
2 Yɛ Davidi seli kɛ: “Ń má yí i nglo kɛ n klo+ Nasasi i wa Anun, afin i si yili i nglo kɛ ɔ klo min.” Ɔ maan Davidi sunmannin sran naan be ko fɔnvɔ i, i si m’ɔ wuli’n ti. Sanngɛ kɛ Davidi i sufuɛ’m be juli Amɔnfuɛ’m+ be mɛn’n nun lɔ naan bé fɔ́nvɔ Anun’n,
3 Amɔnfuɛ’m be sran dandan’m be seli Anun kɛ: “?A bu i kɛ ɔ si i sran bulɛ ti yɛ Davidi sunmannin sran naan be wa fɔnvɔ wɔ-ɔ? E nvle’n i nun niannianlɛ nin i kpla nianlɛ, ɔ nin ɔ tulɛ ti yɛ i sufuɛ’m be bali ɔ wun wa-ɔ.”
4 Yɛ Anun trali Davidi i sufuɛ mun-ɔn. Ɔ yili be akanza’n,+ yɛ ɔ kpɛkpɛli be wun tralɛ’n i lika ng’ɔ kata be bondrɛ’n su’n. Kpɛkun ɔ kannin be bo.
5 Kɛ Davidi tili sa nga be fa yoli i sran mun’n, ɔ sunmannin sran ndɛndɛ naan be ko kpa be atin, afin be guali be ɲin ase tɛtɛ kpa. Famiɛn’n seli be kɛ: “Amun ka Zeriko+ lɛ. Maan amun akanza’n fu ka naan amun a ba.”
6 I sin’n, Amɔnfuɛ’m be wunnin i wlɛ kɛ b’a fɔkɔ Davidi i awlɛn dan. I sɔ’n ti’n, Anun nin Amɔnfuɛ’m be yili sika talan akpi kun (1.000)* naan be ko fa kakaklolo nin nnɛn kpanngɔ su fufuɛ mun Mezopotamin,* nin Aramun-Maaka, nin Zoba+ lɔ be bla.
7 Kɛ be mannin sika’n, be mannin be kakaklolo akpiakpi ablasan-nin-nɲɔn (32.000), yɛ Maaka lɔ famiɛn’n nin i sran’m be bali be ukalɛ wie. Be wa boli be nanmue Medeba+ i ɲrun lɛ. Amɔnfuɛ’m be kusu be fin be klɔ’m be nun fiteli, be yiali, kpɛkun be ɔli alɛ kunlɛ.
8 Kɛ Davidi tili i sɔ’n, ɔ sunmannin Zoabu+ nin sonja’m be kwlaa naan be nin be ko kun. Safuɲrɛn mun bɔbɔ be ɔli wie.+
9 Yɛ Amɔnfuɛ’m be fiteli-ɔ. Be ko jranjrannin klɔ’n i anuan’n nun lɛ sɛsɛsɛ naan bé kún alɛ. Kɛ ɔ́ yó sɔ’n, nn famiɛn nga be bali’n, be o be liɛ blo lɔ lika gbawun kun nun.
10 Kɛ Zoabu wunnin kɛ be nga be bɛ i su naan be nin bé kún’n, be nun wie’m be fin i ɲrun lɔ, yɛ wie’m be fin i sin lɔ’n, ɔ kpali Izraɛli safuɲrɛn’m be nun wie mun. Kpɛkun ɔ siesieli be sɛsɛsɛ naan be nin Sirifuɛ’m be kun.+
11 Yɛ ɔ yacili sonja onga mun i niaan bian Abisai+ i sa nun naan ɔ siesie be sɛsɛsɛ naan be nin Amɔnfuɛ’m be kun.
12 Kpɛkun ɔ seli i kɛ: “Sɛ Sirifuɛ’m+ be sa su ti min’n, bla wa uka min. Sɛ kusu Amɔnfuɛ’m be sa su ti wɔ’n, ń kó úka wɔ.
13 Maan e jran kekle, yɛ e yo yakpafuɛ+ naan e kpli e nvle’n nunfuɛ mun nin e Ɲanmiɛn’n i klɔ’m be ti. Yɛ Zoova kusu, i liɛ ng’ɔ klo kɛ ɔ́ yó’n, ɔ́ wá yó.”
14 Zoabu nin i sonja’m be wunngeli lɔ naan be nin Sirifuɛ’m bé kún. Sanngɛ Sirifuɛ’m be wanndili i bo.+
15 Kɛ Amɔnfuɛ’m be wunnin kɛ Sirifuɛ’m be wanndili’n, be kusu be wanndili i niaan bian Abisai i bo, kpɛkun be wluli klɔ’n i klun lɔ. I sin’n, Zoabu sɛli i sin Zerizalɛmun.
16 Kɛ Sirifuɛ’m be wunnin kɛ Izraɛlifuɛ’m b’a kwla be’n, be sunmannin sran naan be ko yia Sirifuɛ nga be o kan Nzue’n*+ sin lɔ’n. Sofaki m’ɔ ti Adadezɛɛ i sonja’m be su kpɛn’n yɛ ɔ dun be ɲrun mmua-ɔ.+
17 Kɛ be kan kleli Davidi’n, ɔ yiayiali Izraɛlifuɛ’m be kwlaa ndɛndɛ. Yɛ ɔ kpɛli Zurdɛn’n, kpɛkun ɔ wunngeli be wun lɔ. Ɔ siesieli i sonja mun naan be nin be ko kun. Davidi siesieli i sonja mun naan be nin Sirifuɛ’m be yia nun. Kpɛkun Sirifuɛ’m be nin i be kunnin.+
18 Sanngɛ Sirifuɛ’m be wanndili Izraɛlifuɛ’m be bo. Davidi kunnin Sirifuɛ’m be kakaklolo su fufuɛ akpi nso (7.000), nin be sonja nga be nanti be ja nun’n akpiakpi ablanan (40.000). Asa ekun’n, ɔ kunnin Sofaki m’ɔ ti be sonja’m be su kpɛn’n.
19 Kɛ Adadezɛɛ i sran’m be wunnin kɛ Izraɛlifuɛ’m b’a kwla be’n,+ be nin Davidi be siesieli be afiɛn ndɛndɛ. Kpɛkun be kacili i sufuɛ.+ Kɛ ɔ yoli sɔ’n, Sirifuɛ’m be waan be ukaman Amɔnfuɛ’m be kun mlɔnmlɔnmlɔn.
