1 Famiɛn Mun 20:1-43
20 Cɛn kun’n, Famiɛn Bɛnin-Adadi+ m’ɔ ti Siri+ famiɛn’n yiɛli i sonja’m be kwlaa, ɔ nin famiɛn ablasan-nin nɲɔn (32) nin be nnɛn kpanngɔ nin be kakaklolo mun. Kpɛkun ɔ ɔli ko boli nanmue+ Samari+ klɔ’n i wun lɛ naan ɔ nin lɔfuɛ’m bé kún alɛ.
2 I sin’n, ɔ sunmannin sran wie mun klɔ’n nun lɔ, Famiɛn Akabu+ m’ɔ ti Izraɛli famiɛn’n i sin, naan be ko se i kɛ: “Ndɛ nga Bɛnin-Adadi kan’n yɛ:
3 ‘Ɔ sika’n nin ɔ sika ɔkwlɛ’n, ɔ nin ɔ yi mun nin ɔ mma’m be nun nglanman kpafuɛ’m be ti min liɛ.’”
4 Izraɛli famiɛn’n tɛli i su kɛ: “Min min, wɔ mɔ a ti famiɛn’n, kɛ nga a fa kannin’n sa’n, n ti wɔ liɛ, yɛ min sa nun ninnge’m be kwlaa be ti wɔ liɛ.”+
5 I sin’n, be nga be sunmannin be’n, be bali ekun kpɛkun be seli kɛ: “Ndɛ nga Bɛnin-Adadi kan’n yɛ: ‘N seli wɔ kɛ: “Fa ɔ sika’n nin ɔ sika ɔkwlɛ’n, ɔ nin ɔ yi mun nin ɔ mma mun man min.”
6 Sanngɛ ainman dɔ kɛ nga sa su’n, ń má súnman min sufuɛ mun ɔ sin lɔ, bé kó níannían ɔ sua’n nin ɔ sufuɛ’m be sua’m be nun kpa, yɛ ɔ ninnge kpakpa kwlaa nga be wun be lɔ’n bé fá.’”
7 Ɔ maan Izraɛli famiɛn’n flɛli mɛn’n nun kpɛnngbɛn’m be kwlaa, kpɛkun ɔ seli be kɛ: “Amun yaci, amun bɔbɔ be nian, bian nga kunndɛ kpa kɛ ɔ́ fá ɲrɛnnɛn yí e su. Ɔ dun mmua seli min kɛ n fa min yi mun, ɔ nin min mma mun nin min sika’n nin min sika ɔkwlɛ’n n mɛn i. N kusu m’an seman kɛ ń fá mɛ́nmɛ́n i.”
8 Kpɛnngbɛn’m be kwlaa nin nvlefuɛ’m be kwlaa be seli i kɛ: “Nán tie i ndɛ’n, yɛ nán kplin ng’ɔ kan’n su.”
9 Ɔ maan ɔ seli be nga Bɛnin-Adadi sunmannin be’n be kɛ: “Amun ko se min min m’ɔ ti famiɛn’n kɛ: ‘Like kwlaa nga a dun mmua seli min kɛ n yo’n, ń má yó. Sanngɛ nga liɛ’n n su kwlá yoman.’” Kɛ ɔ yoli sɔ’n be ng’ɔ sunmannin be’n, be ɔli ko kannin ndɛ’n kleli i.
10 Bɛnin-Adadi ko seli i kɛ: “Sɛ Samari lɔ ndutre’n yi be nga be su min su’n be tinuntinun be sa buɛ kun’n, maan ɲanmiɛn’m be tu min fɔ kekle kpa!”*
11 Izraɛli famiɛn’n tɛli su kɛ: “Sran ng’ɔ wlɛ i alɛ ninnge’n, ɔ fataman kɛ ɔ di i nuan kɛ sran ng’ɔ yi i alɛ ninnge’n sa.’”+
12 Kɛ bé kán ndɛ sɔ’n bé klé i’n, nn ɔ nin famiɛn’m be o be tannin sua’m be nun lɔ* be su nɔn nzan. Ɔ ka lɛ seli i sufuɛ’m be kɛ: “Amun siesie amun wun naan amun nin be ko kun!” Ɔ maan be siesieli be wun naan be nin be kó kún.
13 Sanngɛ Ɲanmiɛn nuan ijɔfuɛ kun ko wunnin Famiɛn Akabu+ m’ɔ ti Izraɛli famiɛn’n i wun, ɔ seli i kɛ: “Ndɛ nga Zoova kan’n yɛ: ‘?A wun sran kpanngban nga mun? Andɛ’n, ń má fá be ń wlá ɔ sa nun. I liɛ’n á wá sí kɛ n ti Zoova.’”+
14 Akabu usali kɛ: “?Wan lika yɛ á sín-ɔn?” Ɔ tɛli i su kɛ: “Ndɛ nga Zoova kan’n yɛ: ‘Ń sín sran dandan nga be o mɛn’n i akpasuaakpasua’m be su’n be ukafuɛ’m be lika.’” Akabu usali kɛ: “?Wan yɛ ɔ́ bó alɛ’n i kunlɛ bo-ɔ?” Ɔ tɛli i su kɛ: “Wɔ-ɔ!”
15 Akabu kali sran dandan nga be o mɛn’n i akpasuaakpasua’m be su’n be ukafuɛ mun, be ti sran ya nɲɔn ablasan-nin-nɲɔn (232). I sin’n, ɔ kali Izraɛli yasua’m be kwlaa, be ti sran akpi nso (7.000).
16 Kɛ mindi juli’n yɛ be fin klɔ’n nun fiteli-ɔ, kɛ ɔ́ yó sɔ’n nn Bɛnin-Adadi nin famiɛn ablasan-nin-nɲɔn (32) nga be bɛli i ukalɛ’n be o tannin sua’m be nun lɔ,* be su nɔn nzan, nzan’n w’a ti be kpa.
17 Kɛ sran dandan nga be o mɛn’n i akpasuaakpasua’m be su’n be ukafuɛ’m be fin klɔ’n nun fiteli’n, Bɛnin-Adadi ka lɛ sunmannin sran wie mun kɛ be ko nian. Sran sɔ’m be wa seli i kɛ: “Yasua wie’m b’a fin Samari klɔ’n nun b’a fite.”
18 Yɛ ɔ seli be kɛ: “Sɛ wɛtɛɛ su yɛ be ba’n an tra be, nán an kun be. Sɛ kusu alɛ su yɛ be ba’n an tra be, nán an kun be.”
19 Sanngɛ kɛ sran dandan nga be o mɛn’n i akpasuaakpasua’m be su’n be ukafuɛ mun, ɔ nin sonja nga be su be su’n be kwlaa be fin klɔ’n nun fiteli’n,
20 sran kun kun i sran liɛ, sran kun kun i sran liɛ. Ɔ maan Sirifuɛ’m be wanndili,+ yɛ Izraɛlifuɛ’m be suli be su. Sanngɛ Famiɛn Bɛnin-Adadi m’ɔ ti Siri famiɛn’n ɔ fuli nnɛn kpanngɔ kun su, kpɛkun ɔ nin i nnɛn kpanngɔ su fufuɛ’m be wanndili.
21 Izraɛli famiɛn’n ɔli ko kunnin be nga be o nnɛn kpanngɔ nin kakaklolo’m be su’n. Ɔ kwlali Sirifuɛ mun tɛtɛ kpa.*
22 Kɛ ɔ cɛli kan’n, Ɲanmiɛn nuan ijɔfuɛ’n+ ɔli Izraɛli famiɛn’n i wun lɔ, ɔ seli i kɛ: “Kɔ ko buabua ɔ wun naan bu like nga á yó’n i akunndan.+ Afin kɛ afuɛ ng’ɔ́ bá lɔ’n bó i bo’n, Siri famiɛn’n wá fá alɛ wlá ɔ sin.”+
23 Siri famiɛn’n i sufuɛ’m be seli i kɛ: “Be Ɲanmiɛn’n ti oka’m be su Ɲanmiɛn. I sɔ’n ti yɛ be kwlali e-ɔ. Sanngɛ sɛ e nin be e ko kun alɛ lika kpɛtɛkplɛɛ kun nun’n, é kwlá be.
24 Asa ekun’n, yo like nga: Yi famiɛn’m+ be kwlaa naan fa famiɛn’n i janunfuɛ wie mun sie be osu.
25 Kpɛkun fa* sonja wie mun, maan be nuan ju kɛ sonja nga be wuli’n be sa. Yɛ maan nnɛn kpanngɔ nin kakaklolo’m be nuan ju kɛ laa liɛ’n sa. Maan e nin be e ko kun lika kpɛtɛkplɛɛ kun nun, i liɛ’n é kwlá be.” Ɔ fali be afɔtuɛ’n su, ɔ niannin nga be kannin’n su yoli.
26 Kɛ afuɛ’n boli i bo’n, Bɛnin-Adadi yiali Sirifuɛ mun, kpɛkun ɔ ɔli Afɛki+ naan ɔ nin Izraɛlifuɛ’m bé kó kún.
27 Be yiali Izraɛlifuɛ’m be kusu, be mannin be aliɛ nin ninnge wie mun. Kpɛkun be ɔli naan be nin Sirifuɛ’m bé kó yía. Izraɛlifuɛ’m be boli be nanmue Sirifuɛ’m be ɲrun ndɛnman su lɛ. A wun be sa-ɔ, ɔ waan boli akpasua kanngan nɲɔn yɛ be gua lɛ-ɔ. Sanngɛ Sirifuɛ’m be liɛ’n, be tru lika wunmuan’n nun.+
28 I sin’n, Ɲanmiɛn Kpli i sran’n ɔli Izraɛli famiɛn’n i wun lɔ, ɔ seli i kɛ: “Ndɛ nga Zoova kan’n yɛ: ‘Sirifuɛ’m be seli kɛ: “Zoova ti oka’m be su Ɲanmiɛn, ɔ timan lika kpɛtɛkplɛɛ nun Ɲanmiɛn.” I sɔ’n ti’n, ń má fá sran kpanngban nga mun ń wlá ɔ sa nun.+ I liɛ’n, amún wá sí jrɛiin kɛ n ti Zoova.’”+
29 Be bue nɲɔn’n be kali be nanmue’n nun lɛ lele cɛn nso. Cɛn nso’n su’n be boli alɛ’n i kunlɛ bo. Izraɛlifuɛ’m be kunnin Siri sonja nga be nanti be ja’n be nun sran akpiakpi ya (100.000) cɛn ba kun nun.
30 Be onga’m be wanndi ɔli Afɛki,+ be wluli klɔ’n nun. Sanngɛ talɛ’n bu guali sran akpiakpi ablaɔn-nin-nso (27.000) nga be kali lɛ’n be su. Bɛnin-Adadi wanndili wie, ɔ ɔli klɔ’n nun lɔ. Kpɛkun ɔ ko fiali sua ba kun nun.
31 Ɔ maan i sufuɛ’m be seli i kɛ: “Nian, e tili i kɛ Izraɛli famiɛn’m be ti famiɛn mɔ be si aunnvɔɛ-ɔ.* Yaci, maan e fa bajɛ e ci e afiɛn, yɛ e fa ɲanman e cici e ti naan e ko wun Izraɛli famiɛn’n i wun. Atrɛkpa’n, ɔ́ yáci e nguan nun.”+
32 Ɔ maan be fali bajɛ cili be afiɛn, yɛ be fali ɲanman cicili be ti. Kpɛkun be ɔli Izraɛli famiɛn’n i sin, be seli i kɛ: “Ɔ sufuɛ Bɛnin-Adadi waan: ‘Yaci, yaci min nguan nun.’” Ɔ tɛli su kɛ: “?Ɔ te o nguan nun? Min niaan bian-ɔn.”
33 Sran sɔ’m be wunnin kɛ be kwla ɲan be ti, naan be kwla lafi ndɛ ng’ɔ kan’n su. Be seli i kɛ: “Bɛnin-Adadi ti ɔ niaan.” Ɔ tɛli be su kɛ: “Amun wɔ ko fɛ i bla.” Ɔ maan Bɛnin-Adadi ɔli Akabu wun lɔ, kpɛkun Akabu fɛ i fuli i kakaklolo’n nun.
34 Bɛnin-Adadi seli i kɛ: “Klɔ nga min si fali be ɔ si sa nun’n, ń má fá mán wɔ. Kpɛkun á kwlá táka ɔ gua diwlɛ mun* Damasi lɔ, kɛ nga min si fa yoli i Samari lɔ’n sa.”
Akabu tɛli i su kɛ: “Kɛ mɔ e nin wɔ e nuan w’a sɛ su* kɛ nga sa’n, ń má yaci ɔ nun á kɔ́.”
Kɛ ɔ nin i be nuan sɛli su kɛ ngalɛ’n sa, kpɛkun ɔ yacili i nun ɔli.
35 Zoova maan Ɲanmiɛn nuan ijɔfuɛ’m be mma’m*+ be nun kun seli i wiengu kun kɛ: “Yaci, fin min like.” Sanngɛ bian’n w’a kplinman su kɛ ɔ́ fín i like.
36 Ɔ maan ɔ seli i kɛ: “Kɛ mɔ w’a faman Zoova i nuan ndɛ’n su’n ti’n, kɛ á jáso min wun wa cɛ’n, asɔmɔli kun wá kún wɔ.” Kɛ ɔ jasoli i wun lɛ m’ɔ́ kɔ́’n, asɔmɔli kun ko tɔli i su kunnin i.
37 Ɔ wunnin sran uflɛ yɛ ɔ seli i kɛ: “Yaci, fin min like.” Ɔ maan bian’n finnin i like, kan ɔ finnin i like lɛ’n kpukeli.
38 I sin’n, Ɲanmiɛn nuan ijɔfuɛ’n ɔli, ɔ ko minndɛli famiɛn’n atin’n nuan lɛ. Ɔ fali tannin kɛtɛli i ɲin naan b’a wunmɛn i wlɛ.
39 Kɛ famiɛn’n sín’n, ɔ kpan seli famiɛn’n kɛ: “Ɔ sufuɛ’n ɔli kan alɛ’n ti kekle lɔ’n. Kpɛkun bian kun bali, ɔ fali yasua kun mannin min, ɔ seli min kɛ: ‘Nian bian nga su. Sɛ ɔ mlin’n, á sín i osu á wú,+ annzɛ á yí sika talan kun.’*
40 Kɛ ɔ sufuɛ’n i ɲin o ninnge wie’m be su m’ɔ́ yó’n, yasua’n ɔli.” Izraɛli famiɛn’n seli i kɛ: “Kɛ bé dí ɔ jɔlɛ kɛ ngalɛ’n sa, ɔ bɔbɔ a kleli like ng’ɔ fata kɛ be fa yo wɔ’n.”
41 Kɛ ɔ yoli sɔ’n, ɔ yili tannin ng’ɔ kɛtɛ i ɲin’n ndɛndɛ. Izraɛli famiɛn’n wunnin i wlɛ kɛ Ɲanmiɛn nuan ijɔfuɛ’m be nun kun-ɔn.+
42 Ɔ seli famiɛn’n kɛ: “Ndɛ nga Zoova kan’n yɛ: ‘Kɛ mɔ a yacili sran nga n seli wɔ kɛ a kun i’n i lɛ m’ɔ wanndili ɔ sa nun’n ti’n,+ á sín i osu á wú,+ yɛ ɔ nvlefuɛ’m bé sín i nvlefuɛ’m be osu.’”+
43 Kɛ ɔ yoli sɔ’n, Izraɛli famiɛn’n ɔli i awlo Samari+ lɔ. Kɛ ɔ́ kɔ́ nn w’a fa ya, i sa sin bubuli i.
Ja ngua lɔ ndɛ mun
^ Ebr., “maan amuin’m be tu min fɔ yɛ be uka su bɔbɔ.”
^ Annzɛ “kpata’m be bo lɔ.”
^ Annzɛ “kpata’m be bo lɔ.”
^ Annzɛ “ɔ kunnin be kunlɛ kpa.”
^ Ebr., “ka.”
^ Annzɛ “be klo sran dan.”
^ Annzɛ “á kwlá fá akpɔ wie mun.”
^ Annzɛ “y’a tra aenguɛ.”
^ “Ɲanmiɛn nuan ijɔfuɛ’m be mma mun.” Atrɛkpa’n, be su kan suklu kun mɔ be kle Ɲanmiɛn nuan ijɔfuɛ’m be like lɔ’n i ndɛ, annzɛ Ɲanmiɛn nuan ijɔfuɛ’m be anuannzɛ kun-ɔn.
