1 Famiɛn Mun 9:1-28
9 Kɛ Salomɔn wieli Zoova i sua’n, nin famiɛn’n i sua’n+ be kplan’n nin like kwlaa nga i bɔbɔ Salomɔn i awlɛn o su kɛ ɔ́ yó’n,+ i yo cɛ’n,
2 Zoova yili i wun nglo kleli Salomɔn i kpɛ nɲɔn su, kɛ ng’ɔ yili i wun nglo kleli i Gabaɔn lɔ’n sa.+
3 Zoova seli i kɛ: “N tili ɔ srɛlɛ’n, ɔ nin kpatalɛ mɔ a kpatali min kɛ n si wɔ aunnvɔɛ’n. N fali min dunman’n n sieli sua nga a kplannin’n su mlɔnmlɔn+ naan ɔ yo min liɛ klonglo,* yɛ min ɲinma’n nin min awlɛn’n bé trán lika nga su tititi.+
4 Ɔ kusu’n, sɛ a nin min nanti kɛ nga ɔ si Davidi nin min fa nantili’n sa’n,+ sɛ a tu ɔ klun nanti seiin’n+ naan a yo sa kpa’n,+ sɛ a yo like kwlaa nga n se wɔ kɛ a yo’n,+ yɛ sɛ a fa min mmla nin min ndɛ’m be su’n,+
5 ń yó maan ɔ famiɛn dilɛ’n táka kpa Izraɛli nvle’n nun tititi, kɛ nga n kan kleli ɔ si Davidi’n sa. N seli i kɛ: ‘Ɔ osu’n nun’n, bé ɲán sran tititi naan ɔ tran Izraɛli famiɛn bia’n su.’+
6 Sanngɛ sɛ amun nin amun mma mun an kaci amun sin si min, naan amun a nantiman min mmla nga n fa mannin amun nin ndɛ nga n kan’n be su’n, naan amun ko su ɲanmiɛn uflɛ naan amun koto be bo’n,+
7 ń núnnún* Izraɛlifuɛ mun mɛn nga n fa mannin be’n i nun,+ yɛ sua nga n yoli i sanwun mɔ min dunman’n wo su’n, ń yí i min ɲrun lɛ.+ Nvle’m be kwlaa bé yó Izraɛlifuɛ’m be finfin,*+ yɛ bé srí be.
8 Yɛ sua nga búbú sekeseke.+ Be kwlaa nga bé sín lɛ’n, bé níɛn i siin be nuan m’ɔ́ bó be wun’n ti, bé bó feliman yɛ bé sé kɛ: ‘?Ngue ti yɛ Zoova yoli nvle nga nin sua nga be sɔ-ɔ?’+
9 Yɛ bé tɛ́ be su kɛ: ‘Kɛ mɔ be yacili be Ɲanmiɛn Zoova m’ɔ fali be nannan mun Ezipti mɛn’n nun fiteli’n ti-ɔ. Be fali be wun wlali ɲanmiɛn uflɛ’m be sa nun, be kotoli be bo, yɛ be sɔli be. I sɔ’n ti yɛ Zoova fali ɲrɛnnɛn kwlaa nga yili be su-ɔ.’”+
10 Salomɔn fali afuɛ ablaɔn (20) fa kplannin sua nɲɔn mun, yɛle kɛ Zoova i sua’n nin famiɛn’n i sua’n.+
11 Blɛ sɔ’n nun’n, Iramun+ m’ɔ ti Tir famiɛn’n mannin Salomɔn i sɛdri waka nin zenevrie waka, ɔ nin sika ɔkwlɛ kpanngban, kɛ ng’ɔ fa kleli’n sa.+ Yɛ Famiɛn Salomɔn mannin Iramun klɔ ablaɔn (20) Galile mɛn’n nun lɔ.
12 Ɔ maan Iramun fɛli i Tir lɛ ɔli klɔ nga Salomɔn fa be mɛnnin i’n be nianlɛ, sanngɛ i klun w’a jɔman be su.*
13 Ɔ seli kɛ: “?Min niaan bian, ngue klɔ mun yɛle nga a fa be mannin min yɛ’n?” Ɔ maan lele nin andɛ’n, be flɛ be kɛ Kabulu Mɛn.*
14 Iramun fali sika ɔkwlɛ talan* ya kun ablaɔn (120) ko mannin famiɛn’n.+
15 Be nga Famiɛn Salomɔn miannin be kɛ+ be kplan Zoova i sua’n,+ ɔ nin i bɔbɔ i sua’n,* ɔ nin Milo Cenjeʼn*+ nin Zerizalɛmun i wun talɛ’n, ɔ nin Azɔɔ+ nin Megido+ nin Gezɛɛ’n+ be su ndɛ wie mun yɛ.
16 (Faraɔn m’ɔ ti Ezipti famiɛn’n ɔ bali wa fali Gezɛɛ, ɔ fali sin wɔli klɔ’n nun, ɔ kunnin Kanaanfuɛ+ nga be tran lɔ’n. Kpɛkun ɔ fali klɔ’n cɛli i wa bla+ m’ɔ ti Salomɔn i yi’n, bian m’ɔ jɛli i’n ti.)
17 Salomɔn kplannin Gezɛɛ nin Bɛti-Orɔn ng’ɔ o Ngua lɔ’n,+
18 ɔ nin Baalati,+ yɛ Tamaa, m’ɔ o aawlɛ flɛnnɛn’n nun mɛn’n i afiɛn lɔ’n,
19 ɔ nin klɔ kwlaa nga be sie i ninnge’m be su’n, nin kakaklolo klɔ mun,+ nin nnɛn kpanngɔ su fufuɛ’m be klɔ mun. Like kwlaa nga Salomɔn klo kɛ ɔ́ kplɛ́n i Zerizalɛmun, nin Liban, ɔ nin lika kwlaa ng’ɔ di famiɛn ju lɛ’n, ɔ kplannin.
20 Amɔɔfuɛ mun nin Ɛtifuɛ mun nin Perizifuɛ mun nin Ivifuɛ mun nin Zebisifuɛ+ mɔ be nunman Izraɛlifuɛ’m be nun’n,+ be nun wie’m be kali lɛ.
21 Be osu’n nunfuɛ nga be kali nvle’n nun’n, yɛle kɛ be nga Izraɛlifuɛ’m b’a kwlá nunnunman be’n be osu’n nun sran mun’n, Salomɔn fali be wlali plɔtrɔ junman’n nun kɛ kanga sa. Lele nin andɛ’n be te yo sɔ.+
22 Sanngɛ Salomɔn w’a faman Izraɛlifuɛ wie fi w’a yoman kanga.+ Afin wie’m be ti i sonja, wie’m be ti i sonja’m be su kpɛn,* wie’m be ti i kakaklolo mun nin i nnɛn kpanngɔ su fufuɛ’m be su kpɛn.
23 Salomɔn i junman sunianfuɛ’m be su kpɛn’m be ti sran ya nnun ablenun (550), be ti junman difuɛ’m be su kpɛn.+
24 Faraɔn i wa bla’n+ jasoli Davidi Klɔ’n+ su lɔ, ɔ ɔli i bɔbɔ i sua nga Salomɔn kplan mɛnnin i’n nun lɔ. I sin’n, Salomɔn kplannin Milo Cenjeʼn.*+
25 Afuɛ kwlaa nun’n, Salomɔn yi tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ kpɛ nsan+ tɛ yiwlɛ ng’ɔ kplan mannin Zoova’n su.+ Asa ekun’n, ɔ yo maan sin wunsrɛn fin tɛ yiwlɛ ng’ɔ o Zoova ɲrun’n su fite. Ɔ maan ɔ wieli sua’n i kplan.+
26 Asa ekun’n, Famiɛn Salomɔn yoli mmeli wie mun Ɛziɔn-Gebɛɛ+ lɔ. Klɔ sɔ’n wo Elɔti i wun lɛ, Jenvie Ɔkwlɛ’n i nuan lɛ, Edɔmun mɛn’n+ nun lɔ.
27 Iramun sunmɛnnin i sran wie mɔ be si jenvie’n su junman di kpa’n, mmeli sɔ’m be su lɔ+ naan be nin Salomɔn i sufuɛ’m be ko di junman.
28 Be ɔli Ofii+ be ko fali sika ɔkwlɛ talan ya nnan ablaɔn (420) lɔ be fa blɛli Famiɛn Salomɔn.
Ja ngua lɔ ndɛ mun
^ Ebr., “ɔ yo sanwun.”
^ Ebr., “bé fá be kpɛ́ flɛn.”
^ Ebr., “yí.”
^ Ebr., “be timan kpa i ɲrun.”
^ Be kwla se ekun kɛ “Mɛn m’ɔ timan like fi’n.”
^ Nian Ndɛ’m be bo tulɛ lika’n nun lɔ.
^ Annzɛ “famiɛn sua.”
^ Yɛle kɛ, sonja’m be su kpɛn’m be ukafuɛ’m be sunianfuɛ mun.
^ Nian Ndɛʼm be bo tulɛ likaʼn nun lɔ.
