Fluwa klikli nga Pɔlu klɛli Korɛntifuɛ mun’n 2:1-16
2 I sɔ’n ti’n, aniaan mun, kɛ n ɔli amun wun lɔ mɔ ń kán Ɲanmiɛn i like m’ɔ ti fiawa’n+ i ndɛ ń klé amun’n, m’an kanman ndɛ dandan,+ yɛ m’an ijɔman kɛ n si ngwlɛlɛ dan sa.
2 Afin i nun nga n wo amun wun lɔ’n, m’an faman amun ɲin m’an siemɛn i like uflɛ fi su, saan Zezi Klisi, ɔ nin i kunlɛ mɔ be kunnin i waka’n su’n i ngunmin su yɛ n fali amun ɲin n sieli-ɔ.+
3 Ɔ maan kɛ n wo amun wun lɔ’n, n leman wunmiɛn, srɛ kun min, kpɛkun min wun usuusu min dan.
4 Yɛ min ijɔlɛ’n nin Ɲanmiɛn ndɛ’n mɔ n kannin’n, w’a yoman kɛ ngwlɛlɛfuɛ’m be ndɛ mɔ be kɛn i klanman’n sa. Sanngɛ min ndɛ’n yili Ɲanmiɛn i wawɛ’n nin i tinmin’n be nglo.+
5 I liɛ’n, amun su faman amun wla guɛmɛn i klɔ sran’m be ngwlɛlɛ’n su, sanngɛ amún fá gúa Ɲanmiɛn i tinmin’n su.
6 Be nga b’a tin’n be afiɛn yɛ e kan ngwlɛlɛ ndɛ-ɔ.+ Sanngɛ nán mɛn* nunfuɛ’m be ngwlɛlɛ’n i ndɛ yɛ e kan-ɔn. Asa ekun’n, nán mɛn siefuɛ mɔ be su tranman lɛ kun’n be ngwlɛlɛ’n i ndɛ yɛ e kan-ɔn.+
7 Sanngɛ like mɔ Ɲanmiɛn fa fiali’n,+ mɔ yɛle Ɲanmiɛn i ngwlɛlɛ’n m’ɔ ti fiawa’n i ndɛ yɛ e kan-ɔn. Kwlaa naan w’a yi mɛn’n ɔ fa sie mannin e naan e ɲan ɲrun.
8 Ngwlɛlɛ sɔ’n, mɛn* siefuɛ’m be nun kun sa w’a kwlá simɛn i.+ Afin sɛ ɔ ti kɛ be sili i’n, nn b’a kunman e Min m’ɔ le ɲrun’n.*
9 Sanngɛ ndɛ nga be klɛli’n kpɛnnin su sɛsɛsɛ. Be klɛli i kɛ: “Sran ɲinma w’a wunmɛn i, yɛ sran su w’a timan naan se kɛ ɔ́ bú ninnge nga Ɲanmiɛn fa sieli be nga be klo i’n be akunndan.”+
10 Afin e yɛ Ɲanmiɛn fɛli i wawɛ’n+ yili ninnge sɔ’m be nglo kleli e-ɔ.+ Afin Ɲanmiɛn wawɛ’n niannian like kwlaa nun kpa, ɔ niannian Ɲanmiɛn i ninnge nga be bo ti kploun kpa bɔbɔ’n be nun kpa wie.+
11 ?Sɛ w’a yoman kɛ sran kun bɔbɔ yɛ ɔ si i klun akunndan’n, wan cɛ yɛ ɔ kwla si i-ɔ? I wafa kunngba’n, sran fi siman ninnge nga be ti Ɲanmiɛn liɛ’n, saan Ɲanmiɛn wawɛ’n yɛ ɔ si be-ɔ.
12 Nán mɛn nunfuɛ’m be akunndan’n yɛ e bu-ɔ. Sanngɛ Ɲanmiɛn wawɛ’n yɛ ɔ kle e atin-ɔn.+ Ɔ maan e kwla si ninnge nga Ɲanmiɛn mannin e klun ufue su’n.
13 Asa kusu’n, kɛ é kán ninnge sɔ’m be ndɛ’n, nán klɔ sran’m be ngwlɛlɛ’n yɛ e fa kan-ɔn.+ Sanngɛ ndɛ ng’ɔ fin Ɲanmiɛn wawɛ’n yɛ e fa kan-ɔn.+ Ɔ maan e fa Ɲanmiɛn i ndɛ mun e yiyi ninnge nga be ti Ɲanmiɛn liɛ’n be nun.
14 Sanngɛ sran nga ninnge nga klɔ sran konvi sɔ be’n yɛ be lo i’n, ɔ sɔman ninnge nga be fin Ɲanmiɛn wawɛ’n be nun, afin ɔ bu be finfin like. Asa kusu’n, ɔ kwlá siman be, afin Ɲanmiɛn wawɛ’n yɛ maan be kwla wun ninnge sɔ’m be wlɛ-ɔ.
15 Sran nga Ɲanmiɛn wawɛ’n sie i’n, ɔ kunndɛ sa’m be ngbɛsungbɛsu’n kwlaa.+ Sanngɛ i liɛ’n sran fi kwlá dimɛn i jɔlɛ.
16 Afin “?Wan yɛ ɔ si akunndan nga Zoova* bu’n naan w’a se kɛ ɔ́ klé i ngwlɛlɛ-ɔ?”+ Sanngɛ e liɛ’n, akunndan nga Klisi bu’n i wie yɛ e bu-ɔ.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “b’a kunmɛn i waka’n su.”
^ Nian Ndɛ’m be bo tulɛ lika’n nun lɔ.
