1 Samiɛli 14:1-52
14 Cɛn kun’n, Saili i wa Zonatan+ seli sran ng’ɔ trɛ i alɛ ninnge’m be nun’n kɛ: “Bla, maan e kpɛ lika nga naan e to Filistifuɛ’m be sonja nga be o bue kun lɔ’n be lɔ.” Sanngɛ w’a boman su w’a klemɛn i si.
2 Kɛ ɔ́ yó sɔ’n, nn Saili o grenadie waka ng’ɔ o Migrɔn’n i bo lɔ, Gibea+ i tiwa lɛ. Ɔ nin yasua ya nsiɛn (600) yɛ be o lɔ-ɔ.+
3 (Yɛ Aia ɔ wlali efɔdu’n.+ Ɔ ti Aitubu+ i wa, i kusu ti Ikabɔdu+ i niaan bian, i kusu ti Fineasi+ i wa, i kusu ti Eli+ i wa. Eli yɛ ɔ yoli Zoova ɲrun jranfuɛ Silo+ lɔ’n niɔn.) Sran fi siman kɛ Zonatan w’a ɔ lika.
4 Lika nga Zonatan waan ɔ́ sín lɛ naan w’a to Filistifuɛ’m be sonja’m be lɔ’n, yɔbuɛ nɲɔn mɔ be ti kɛ sran je sa’n, be o i bue nɲɔn’m be su. Be flɛ kun kɛ Bozɛzi, yɛ kun suan Sene.
5 Yɔbuɛ sɔ’m be nun kun ti mlomlo. Ɔ o nglo lɔ bue liɛ’n su, Mikimasi i ndɛnman su lɛ. Yɛ kun wo ngua lɔ bue liɛ’n su, Geba i ndɛnman su lɛ.+
6 Zonatan seli sran ng’ɔ trɛ i alɛ ninnge’m be nun’n kɛ: “Bla, maan e kpɛ lika nga naan e to sonja sɔ mɔ b’a wlaman be klɛn’n+ be lɔ, sɛ Zoova jrán e sin-o. Afin Zoova liɛ’n, sɛ i waan ɔ́ fá sran kpanngban annzɛ sran kaan sa fá dé i sran mun’n, like fi kwlá tɛnndɛnmɛn i ɲrun.”+
7 Sran ng’ɔ trɛ i alɛ ninnge’m be nun’n tɛli i su kɛ: “Like nga ɔ awlɛn o su kɛ á yó’n, yo. Lika nga a klo kɛ á kɔ́’n, kɔ. Lika kwlaa nga á kɔ́’n, e nin wɔ-ɔ.”
8 Yɛ Zonatan seli kɛ: “Maan e kpɛ lika nga naan e wɔ sonja sɔ’m be wun lɔ naan be wun kɛ e o lɛ.
9 Sɛ be se e kɛ: ‘Amun jran lɛ naan e to amun lɔ’n,’ i liɛ’n, é jrán e osu’n nun lɛ, e su toman be lɔ.
10 Sanngɛ sɛ be se kɛ: ‘Amun fu naan amun to e wa’n,’ i liɛ’n, é fú é tó be lɔ, afin i sɔ’n ti nzɔliɛ kun m’ɔ kle kɛ Zoova wá fá be wlá e sa nun-ɔn.”+
11 Be nɲɔn’n be fali be wun kleli Filistifuɛ’m be sonja mun. Filistifuɛ’m be seli kɛ: “Amun nian! Ebre’m be su fin kunman nga be fiali be nun’n be nun fíte.”+
12 Kpɛkun sonja sɔ’m be seli Zonatan nin i sran ng’ɔ trɛ i alɛ ninnge’m be nun’n kɛ: “Amun fu e wun wa, é wá klé amun ngwlɛlɛ!”+ Yɛ Zonatan seli i sran ng’ɔ trɛ i alɛ ninnge’m be nun’n kɛ: “Su min su, afin Zoova wá fá be wlá Izraɛli i sa nun.”+
13 Yɛ Zonatan fɛli i sa nin i ja yɛ ɔ fu ɔli be wun lɔ-ɔ. Sran ng’ɔ trɛ i alɛ ninnge’m be nun’n su i su. Filistifuɛ’m be tɔli kunngunngun Zonatan i bo lɛ. Kɛ ɔ́ yó sɔ’n, nn sran ng’ɔ trɛ i alɛ ninnge’m be nun’n kusu ɔ́ wíewíe be sú i su.
14 Kpɛ klikli nga Zonatan nin sran ng’ɔ trɛ i alɛ ninnge’m be nun’n be ko tɔli be su sɔ’n, be kunnin sran kɔe ablaɔn (20) lika kaan sa nun.*
15 Filistifuɛ’m be sonja nga be o be nanmue’n nun lɔ’n, ɔ nin be sonja akpasua klikli nga be dun mmua to be’n, be kwlaa be wawɛ tɔli blo. Sonja nga be si alɛ kun kpa bɔbɔ’n,+ be usu sa tututu. Asiɛ’n kejeli, yɛ Ɲanmiɛn yoli maan be wla tɔli blo.
16 Lika sasafuɛ nga Saili sieli be Gibea+ m’ɔ o Bɛnzamɛn akpasua’n su lɔ’n su’n, be wunnin kɛ Filistifuɛ’m be nanmue wunmuan’n nun su keje yekee.+
17 Saili seli sonja nga be o i wun lɛ’n be kɛ: “Amun yaci, amun ka sran mun naan amun wun sran ng’ɔ nunman e nun wa’n.” Kɛ be kali sran mun’n, be wunnin kɛ Zonatan nin sran ng’ɔ trɛ i alɛ ninnge’m be nun’n be nunman lɛ wie.
18 Saili seli Aia kɛ:+ “Fa Ɲanmiɛn Kpli i Alaka’n wunnge wa!” (Afin blɛ sɔ’n nun’n,* nn Ɲanmiɛn Kpli i Alaka’n wo Izraɛlifuɛ’m be sa nun.)
19 Kɛ Saili kán ndɛ klé Ɲanmiɛn ɲrun jranfuɛ’n, nn Filistifuɛ’m be nanmue’n nun kéje yekee dan kpa trá laa’n. Kpɛkun Saili seli Ɲanmiɛn ɲrun jranfuɛ’n kɛ: “Yaci like nga a su yo’n i yolɛ.”*
20 Ɔ maan Saili nin sonja nga be o i wun lɛ’n be yiali, kpɛkun be ɔli alɛ kunlɛ. Kɛ be juli lɔ’n, bé nían-ɔn, Filistifuɛ’m be su fa be sa nun tokofi’n bé kún be wiengu. Yɛ lika’n sanngannin be sa nun tɛtɛ kpa.
21 Asa ekun’n, Ebre nga be o Filistifuɛ’m be sin’n, mɔ be suli be su be nanmue’n nun lɔ’n, be wa jrannin Izraɛlifuɛ’m be sin siɛn’n. Kpɛkun be suli Saili nin Zonatan be su.
22 Izraɛlifuɛ’m be kwlaa nga be ko fiali+ Efraimun lɔ okaoka’m be nun’n, be tili i kɛ Filistifuɛ’m be su wanndi. Ɔ maan be kusu be suli be su wie, yɛ be nin be ko kunnin.
23 Cɛn sɔ’n nun’n, Zoova deli Izraɛli.+ Be kunnin alɛ’n lele be juli Bɛti-Avɛnin+ i sin lɔ bɔbɔ.
24 Sanngɛ cɛn sɔ’n nun’n, Izraɛlifuɛ’m b’a wunman be wun fɛ. Afin Saili boli sannzan. Ɔ seli sonja’m be kɛ: “Sran ng’ɔ di like* kwlaa naan lika’n w’a san’n, naan m’an tu min klunngbɔ min kpɔfuɛ’m be su’n, nán maan ɔ ɲan muae le.” I sɔ’n ti’n, sran fi w’a diman like.+
25 Sonja’m be kwlaa be wluli bo’n nun lɔ. Awɛma nzue o lika sɔ’n nun lɔ, asiɛ wun.
26 Kɛ be wluli bo’n nun’n, bé nían-ɔn, awɛma nzue yɛ ɔ su sonji yɛ. Sanngɛ sran fi w’a fɛman i sa w’a boman nun naan se kɛ ɔ́ fá kɛ́n i nuan, afin sannzan ng’ɔ o lɛ’n ti’n, srɛ kunnin be.
27 Sanngɛ Zonatan siman kɛ i si w’a bo sannzan.+ Ɔ maan ɔ fali kpɔnman ng’ɔ o i sa nun’n i ti’n boli i awɛma nzue’n nun. Kɛ ɔ dili wie’n, ɔ ɲannin wunmiɛn.*
28 Yɛ sran kun seli i kɛ: “Ɔ si boli sannzan. Ɔ seli sran’m be kɛ: ‘Sran kwlaa ng’ɔ di like andɛ’n, nán maan ɔ ɲan muae le!’+ I sɔ’n ti yɛ sran’m b’a fɛ dan sɔ-ɔ.”
29 Sanngɛ Zonatan seli kɛ: “Min si w’a fa ɲrɛnnɛn w’a yi i nvle’n su. Awɛma nzue kaan sa mɔ n dili ti’n, nian kɛ m’an ɲan wunmiɛn-ɔn.
30 Sɛ ɔ ti kɛ andɛ’n be mannin sonja’m be atin kɛ be di+ be kpɔfuɛ’m be bo ninnge nga be ɲɛnnin i’n, nn kunlɛ nga bé kún Filistifuɛ mun’n, ɔ su yoman kaan.”
31 Cɛn sɔ’n nun’n, be kunnin Filistifuɛ mun Mikimasi lɛ lele be fa juli Azalɔn.+ Yɛ sran’m be fɛli kpa.
32 Ɔ maan sonja’m be fɛnnin sran’m be bo ninnge mun. Be trali bua mun, nin nannin mun, nin nannin ba mun naan b’a kun be asiɛ wun lɛ. Kpɛkun be dili nnɛn mun nin be mmoja’n.+
33 Yɛ be ko seli Saili kɛ: “Nian! Sonja’m b’a fɔn Zoova wun, afin be su di nnɛn mun nin be mmoja’n.”+ Kɛ ɔ tili i sɔ’n, ɔ seli kɛ: “Amun a fɔn. Amun kondo yɔbuɛ dan kun bla min wun wa ndɛndɛ.”
34 I sin’n, Saili seli kɛ: “Amun sinsin sonja’m be su naan amun se be kɛ: ‘Maan sran kun fɛ i nannin’n nin i bua’n ɔ fa bla, naan ɔ wa kun be wa naan w’a di. Nán amun di nnɛn mun nin be mmoja’n naan amun fɔn Zoova wun.’”+ I sɔ’n ti’n, sran kun fɛli i nannin liɛ’n bali lɛ kɔnguɛ sɔ’n nun, naan w’a kun i lɛ.
35 Kpɛkun Saili kplannin tɛ yiwlɛ kun mannin Zoova.+ Tɛ yiwlɛ klikli ng’ɔ́ kplán mán Zoova’n yɛ ɔ o lɛ-ɔ.
36 I sin’n, Saili seli kɛ: “Maan e su Filistifuɛ’m be su kɔnguɛ nga naan e fɛn be bo ninnge mun lele aliɛ’n fa cɛn e. E su yaciman sran fi nguan nun.” Be tɛli i su kɛ: “Like nga a klo kɛ á yó’n, yo.” Yɛ Ɲanmiɛn ɲrun jranfuɛ’n seli kɛ: “Maan e usa Ɲanmiɛn Kpli i nun ka, lika nga nun wa.”+
37 Saili usali Ɲanmiɛn kɛ: “?N su Filistifuɛ’m be su?+ ?Á fá be wlá Izraɛli i sa nun?” Sanngɛ Ɲanmiɛn w’a tɛmɛn i su cɛn sɔ’n nun.
38 Ɔ maan Saili seli kɛ: “Amun kwlaa nga amun ti sonja’m be su kpɛn’n, amun bla wa naan e wun sa tɛ nga be yoli i andɛ’n.
39 N kan Zoova m’ɔ lafiman’n, m’ɔ deli Izraɛli’n, sɛ ɔ wie min wa Zonatan bɔbɔ-o, ɔ́ wú.” Sanngɛ sran fi w’a tɛmɛn i su.
40 I sin’n, ɔ seli Izraɛlifuɛ’m be kwlaa kɛ: “Amun jran bue kun. E nin min wa Zonatan é jrán bue kun.” Yɛ sran’m be seli Saili kɛ: “Like nga a klo kɛ á yó’n, yo.”
41 Saili seli Zoova kɛ: “Izraɛli i Ɲanmiɛn, fa Tumimun’n+ tɛ e su!” Yɛ fɔtɔ’n tɔli Zonatan nin Saili be su-ɔ. Kpɛkun nvle nunfuɛ’m be ɲannin be ti.
42 Saili seli kɛ: “Maan e tu fɔtɔ+ e nian, sɛ min-o annzɛ min wa Zonatan-o.” Yɛ fɔtɔ’n tɔli Zonatan su-ɔ.
43 Saili seli Zonatan kɛ: “?Ngue yɛ a yoli-ɔ? Kan kle min.” Zonatan seli i kɛ: “N fali kpɔnman ng’ɔ o min sa nun’n i ti’n n boli i awɛma nzue nun kaan sa, kpɛkun n dili.+ Min yɛ n wo yɛ. Sɛ ɔ fata kɛ n wu’n, n tili.”
44 Kɛ ɔ seli sɔ’n, Saili seli kɛ: “Zonatan, sɛ w’a wuman cɛ’n, maan Ɲanmiɛn nin min kan.”+
45 Sanngɛ sran’m be seli Saili kɛ: “?Bé kún Zonatan mɔ i ti yɛ maan Izraɛlifuɛ’m be kwlali dan kɛ nga sa’n?+ Ɔ su yoman sɔ mlɔnmlɔn! E kan Zoova m’ɔ lafiman’n! I ti ndrɛ ba kun sa su tɔman asiɛ wun, afin Ɲanmiɛn jrɛnnin i sin ti yɛ ɔ kwla yoli sa kɛ ngalɛ’n sa andɛ-ɔ.”+ Kɛ sran’m be deli Zonatan* kɛ ngalɛ’n sa, ɔ maan b’a kunmɛn i.
46 Kɛ ɔ yoli sɔ’n, Saili w’a suman Filistifuɛ’m be su kun. Kpɛkun Filistifuɛ’m be sali be sin be mɛn’n nun lɔ.
47 Saili yoli maan i famiɛn ng’ɔ di i Izraɛli lɔ’n, ɔ takali kpa. Ɔ nin i kpɔfuɛ nga be sin yiɛ i’n be kwlaa be kunnin. Ɔ kwlali Moabufuɛ mun,+ nin Amɔnfuɛ mun,+ nin Edɔmunfuɛ mun,+ nin Zoba lɔ famiɛn’n,+ nin Filistifuɛ mun.+ Lika kwlaa ng’ɔ kɔ’n, i yɛ ɔ kwla-ɔ.
48 Ɔ kunnin alɛ yakpa su, yɛ ɔ kwlali Amalɛkifuɛ mun.+ Kpɛkun ɔ deli Izraɛlifuɛ mun be nga be ba be bo ninnge’m be falɛ’n be sa nun.
49 Saili i wa yasua mun yɛle Zonatan nin Isivi, yɛ Malki-Sia.+ Asa ekun’n, ɔ le ba bla nɲɔn. Be flɛ kpɛnngbɛn’n kɛ Merabu,+ yɛ i sinma’n suan Mikali.+
50 Be flɛ Saili i yi’n kɛ Asinoamun. Ɔ ti Aimaazi i wa. Yɛ be flɛ i sonja’m be su kpɛn’n kɛ Abnɛɛ,+ Nɛɛ i wa-ɔ. Saili i si’n i niaan bian-ɔn.
51 Saili i si yɛle Kisi.+ Yɛ Nɛɛ+ m’ɔ ti Abnɛɛ i si’n, ɔ ti Abiɛli i wa.
52 Saili i blɛ su’n, alɛ’n jrannin kekle kpa ɔ nin Filistifuɛ’m be afiɛn.+ Kɛ Saili ko wun sran kun m’ɔ le wunmiɛn m’ɔ ti yakpafuɛ’n, ɔ fɛ i wlɛ i sonja’m be nun.+
Ja ngua lɔ ndɛ mun
^ Annzɛ “kɛ be bu lika nga nannin nɲɔn be kwla tutu i cɛn ba kun’n i nun nɲɔn’n, ɔ ti i bue kun.”
^ Ebr., “cɛn sɔ’n nun’n.”
^ Ebr., “Yi ɔ sa’n.”
^ Ebr., “kpanwun.”
^ Ebr., “i ɲinma’n kpajali.”
^ Ebr., “be kpɔli Zonatan i ti.”
