1 Samiɛli 22:1-23
22 Davidi jasoli lɛ,+ kpɛkun ɔ ko fiali Adulamun lɔ yɔbuɛ buɛ’n nun.+ Kɛ i niaan mun nin i si i awlo’n nunfuɛ’m be kwlaa be tili’n, be ko toli i lɔ.
2 Asa ekun’n, be nga afɛ o be su’n, nin be nga kalɛ o be su’n, ɔ nin be nga klunngbɔ o be klun’n, be kwlaa be ko yiɛli i wun lɛ. Sran kɔe ya nnan (400) yɛ be bɛli i wun lɛ-ɔ. Kpɛkun ɔ yoli be su kpɛn.
3 I sin’n, Davidi jasoli lɛ ɔli Mizpe, Moabu asa’n su lɔ. Ɔ ko seli Moabu lɔ famiɛn’n kɛ:+ “Yaci, maan min si nin min nin be tran ɔ wun wa lele naan m’an si like nga Ɲanmiɛn wá yó mán min’n.”
4 Ɔ yacili be Moabu famiɛn’n i sa nun. Ɔ maan blɛ kwlaa nga Davidi dili i i fiawlɛ’n nun lɔ’n, be kali famiɛn sɔ’n i wun lɛ.+
5 I sin’n, Gadi+ m’ɔ ti Ɲanmiɛn nuan ijɔfuɛ’n seli Davidi kɛ: “Nán ka ɔ fiawlɛ’n nun lɔ kun. Jaso lɛ naan kɔ Zida akpasua’n su lɔ.”+ Ɔ maan Davidi jasoli lɛ, kpɛkun ɔ ɔli bo ng’ɔ o Erɛti lɔ’n nun.
6 Saili tili i kɛ be wunnin Davidi nin i sran mun. Kɛ ɔ́ yó sɔ’n, nn Saili ti Gibea+ lɔ kpɔlɛ’n su tamarisi waka kun i bo lɛ. I cua’n wo i sa nun, yɛ i sran’m be jinjin i wun lɛ.
7 Yɛ Saili seli be kɛ: “Bɛnzamɛnfuɛ mun, amun yaci, amun sie amun su. ?Amun bu i kɛ Zese i wa’n+ wá mán amun kwlaa amun fie nin viɲin fie wie? ?Amun bu i kɛ ɔ́ wá síe amun kwlaa sonja akpi su kpɛn annzɛ sonja ya su kpɛn?+
8 Amun ngba amun jasoli min wun. Kɛ min bɔbɔ min klun ba’n nin Zese i wa’n be trali janvuɛ’n,+ amun nun wie fi w’a timan min klɛ. Min bɔbɔ min klun ba’n wlawlali min sufuɛ’n kɛ ɔ bu sa min ɲrun, kɛ ng’ɔ su yo i andɛ yɛ’n sa. Sanngɛ amun nun wie fi w’a kokoman min naan se kɛ ɔ́ bó su klé min.”
9 Kɛ ɔ́ yó sɔ’n, nn Doɛgi+ m’ɔ ti Edɔmunfuɛ’n, m’ɔ ti Saili i sran’m be su kpɛn’n, ɔ jin lɛ wie. Ɔ tɛli i su kɛ:+ “N wunnin Zese i wa’n. Ɔ ɔli Aitubu i wa+ Aimelɛki i sin Nɔbu lɔ.
10 Aimelɛki usali Zoova i sa mɛnnin i. Kpɛkun ɔ mɛnnin i aliɛ. Asa ekun’n, ɔ fali Goliati m’ɔ ti Filistifuɛ’n i tokofi’n mɛnnin i.”+
11 Be ja nun lɛ’n, famiɛn’n sunmannin sran naan be ko fa Aitubu i wa Aimelɛki m’ɔ ti Ɲanmiɛn ɲrun jranfuɛ’n, nin i si i awlo’n nun Ɲanmiɛn ɲrun jranfuɛ’m be kwlaa nga be o Nɔbu lɔ’n be blɛ i. Ɔ maan be ngba be wa toli famiɛn’n.
12 Yɛ Saili seli kɛ: “Aitubu i wa, yaci, sie ɔ su.” I kusu tɛli su kɛ: “Famiɛn, min su o ɔ nuan bo.”
13 Saili seli i kɛ: “?Ngue ti yɛ a nin Zese i wa’n amun a cici min wun-ɔn? A mɛnnin i kpanwun, nin tokofi, kpɛkun a usali Ɲanmiɛn i sa mɛnnin i. W’a jaso min wun, yɛ w’a bu w’a sa min ɲrun cɛiin naan ɔ́ yó min like yaya.”
14 Yɛ Aimelɛki tɛli famiɛn’n su kɛ: “?Ɔ sufuɛ’m be nun onin yɛ be kwla lafi i su* kɛ Davidi sa-ɔ?+ Ɔ ti ɔ sia.+ I kunngba’n ti ɔ gladi difuɛ’m be su kpɛn’n kun. Ɔ awlo lɔ kusu’n, sran’m be ɲin yi i kpa.+
15 N usa Ɲanmiɛn i sa n mɛn i titi, nán andɛ yɛ n boli i bo-ɔ.+ Ndɛ nga a kɛn i lɛ’n, n kwlá yómɛn i sɔ sa mlɔnmlɔn! Famiɛn, nán se kɛ e nin min si i awlo wunmuan’n e yoli ɔ sa. Afin m’an timan ndɛ sɔ’n i wie fi.”+
16 Sanngɛ famiɛn’n seli i kɛ: “Aimelɛki, a nin ɔ si i awlo’n nunfuɛ’m+ be kwlaa bé wú.”+
17 Yɛ famiɛn’n seli gladi difuɛ* nga be jinjin i wun lɛ’n be kɛ: “Amun ko kun Zoova i ɲrun jranfuɛ mun, afin be o Davidi sin. Be si kɛ ɔ su wanndi min ɲrun sanngɛ b’a timan min klɛ.” Sanngɛ famiɛn i sran’m be waan be faman be sa kanman Zoova i ɲrun jranfuɛ mun.
18 Yɛ famiɛn’n seli Doɛgi+ kɛ: “Yasua, kɔ ko kun Ɲanmiɛn ɲrun jranfuɛ mun.” Doɛgi m’ɔ ti Edɔmunfuɛ’n+ w’a sisimɛn i bo. Ɔ ɔli ko kunnin be. Ɔ kunnin yasua ablaɔcuɛ-nin-nnun (85) cɛn sɔ’n nun. Be ngba be wla efɔdu nga lɛn yɛ be fa yoli’n.+
19 Asa ekun’n, ɔ wluli Nɔbu+ m’ɔ ti Ɲanmiɛn ɲrun jranfuɛ’m be klɔ’n nun. Kpɛkun ɔ fali tokofi’n kunnin yasua mun, nin bla mun, nin ba kanngan mun, nin ba nɔnman mun, nin nannin mun, nin aflunmun mun, ɔ nin bua mun.
20 Sanngɛ Aitubu i wa Aimelɛki i klun ba kun mɔ be flɛ i kɛ Abiataa’n,+ ɔ fiteli nun. Ɔ wanndili naan w’a ko to Davidi lɔ.
21 Abiataa seli Davidi kɛ: “Saili kunnin Zoova i ɲrun jranfuɛ mun.”
22 Yɛ Davidi seli Abiataa kɛ: “Kɛ n wunnin Doɛgi m’ɔ ti Edɔmunfuɛ cɛn sɔ’n nun’n,+ n si kɛ saan ɔ́ kó kán klé Saili. Ɔ maan min yɛ maan ɔ si i awlo’n nunfuɛ’m be kwlaa be wuli-ɔ.
23 Ka min wun wa. Ń nían ɔ su. Nán srɛ kun wɔ, afin sran ng’ɔ kunndɛ kɛ ɔ́ kún wɔ’n, ɔ kunndɛ kɛ ɔ́ kún min wie.”+
