1 Samiɛli 27:1-12
-
Filistifuɛ’m be fali Ziklagi mannin Davidi (1-12)
27 Sanngɛ Davidi seli i klun lɔ kɛ: “Sɛ n ka wa’n, Saili kún min cɛn kun. I sɔ’n ti’n, maan n wanndi+ n ko fia Filistifuɛ’m be mɛn’n nun lɔ. I liɛ’n, Saili su kunndɛman min Izraɛli nvle’n nun kun,+ yɛ ń ɲán min ti i sa nun.”
2 Ɔ maan Davidi nin i sa nun sran ya nsiɛn (600) mun+ be ɔli Maɔku i wa Akisi+ m’ɔ ti Gati famiɛn’n i sin.
3 Davidi nin i sonja’m be trannin Akisi i wun lɛ, Gati lɔ. Sonja sɔ’m be nin be awlofuɛ mun yɛ be ɔli-ɔ. Davidi fɛli i yi nɲɔn mun yɛ be ɔli-ɔ. Be yɛle Asinoamun+ m’ɔ ti Zizreɛlifuɛ’n nin Abigaili+ m’ɔ ti Nabali i angbeti’n, m’ɔ fin Kaamɛli’n.
4 Kɛ Saili tili i kɛ Davidi wanndi ɔli Gati’n, ɔ yacili i kunndɛlɛ.+
5 Davidi seli Akisi kɛ: “Sɛ ɔ ti ɔ klun su’n, man min atin naan n ko tran klɔ kanngan’m be nun kun su. Ɔ fataman kɛ min mɔ n ti ɔ sufuɛ’n, e nin wɔ e tran famiɛn klɔ’n su.”
6 Ɔ maan Akisi fali Ziklagi+ mɛnnin i cɛn sɔ’n nun. I sɔ’n ti yɛ andɛ nin andɛ’n, Ziklagi ti Zida famiɛn’m be liɛ-ɔ.
7 Davidi dili afuɛ kun anglo nnan Filistifuɛ’m be klɔ kaan sɔ’n su.+
8 Davidi nin i sonja’m be wlu Gesurifuɛ mun,+ nin Giizifuɛ mun, nin Amalɛkifuɛ’m+ be klɔ’m be nun, kpɛkun be fa alɛ wla be sin. Sran sɔ’m be tranwlɛ’n fɛ i Telamun lɛ lele fa ju Suu,+ kpɛkun ɔ kɔ lele ju Ezipti mɛn’n i nuan su lɔ.
9 Kɛ Davidi kɔ akpasua kun su alɛ kunlɛ’n, ɔ yaciman bla annzɛ yasua ba kun sa nguan nun.+ Sanngɛ ɔ fa bua mun, nin nannin mun, nin aflunmun mun, nin ɲɔnngɔnmin mun, ɔ nin tralɛ mun, kpɛkun ɔ sɛ i sin Akisi wun lɔ.
10 Kɛ ɔ ko yo sɔ’n, Akisi usɛ i kɛ: “?Nin yɛ amun ko kunnin alɛ andɛ-ɔ?” Wie liɛ’n, Davidi tɛ i su kɛ: “E ɔli Zidafuɛ’m be ngua* lɔ lika liɛ’n nun.”+ Wie liɛ’n, ɔ se kɛ: “E ɔli Zerameɛlifuɛ’m+ be ngua lɔ lika liɛ’n nun.” Wie liɛ kusu’n, ɔ se kɛ: “E ɔli Keninfuɛ’m+ be ngua lɔ lika liɛ’n nun.”
11 Davidi yaciman yasua annzɛ bla ba kun sa nguan nun. I liɛ’n, be su faman sran ko manman Gati naan ɔ yiyi i bo se kɛ: “Kɛ Davidi yoli sa, kɛ ɔ yoli sa.” (Blɛ kwlaa nga Davidi dili i Filistifuɛ’m be klɔ kaan’n su lɔ’n, i sɔ yɛ ɔ yoli i titi-ɔ.)
12 Akisi fali ndɛ nga Davidi kan kleli i’n su. I sɔ’n ti’n, Akisi seli i wun kɛ: ‘Izraɛlifuɛ mɔ be ti i bɔbɔ i nvle nunfuɛ mun’n, b’a fa be ɲin b’a ci i dan yɛ ɔ o lɛ-ɔ. Nga, saan ɔ́ sú min tititi.’
Ja ngua lɔ ndɛ mun
^ Annzɛ “Negɛbu.”
