1 Samiɛli 29:1-11
-
Filistifuɛ’m be lafiman Davidi su (1-11)
29 Filistifuɛ’m+ be sonja’m be yiali Afɛki lɔ. Kɛ ɔ́ yó sɔ’n, nn Izraɛlifuɛ’m be sonja’m be kusu b’a bo be nanmue nzue ti ng’ɔ o Zizreɛli+ lɔ’n i wun lɛ.
2 Filistifuɛ’m be siefuɛ’m be siesieli be sonja mun akpasuaakpasua yɛ be nanti kɔ-ɔ. Akpasua wie’m be nun’n, sonja’m be ti sran ya kun (100) yɛ wie’m be nun’n be ti sran akpi (1.000). Davidi kusu nin i sran mun nin Akisi+ be o be kwlaa be sin lɔ.
3 Sanngɛ Filistifuɛ’m be sran dandan’m be seli kɛ: “?Ebre’m be ba nzu yolɛ wa?” Yɛ Akisi tɛli be su kɛ: “Davidi-ɔ. Ɔ ti Saili m’ɔ ti Izraɛlifuɛ’m be famiɛn’n i sufuɛ. Ɔ nin min o wa w’a di afuɛ kun annzɛ afuɛ kun tra su bɔbɔ.+ Kɛ ɔ bali m’ɔ wa taloli min lele andɛ’n, n nin-a wunman kɛ ɔ yoli sa tɛ wie.”
4 Sanngɛ Filistifuɛ’m be sran dandan’m be fali Akisi wun ya dan kpa naan b’a se i kɛ: “Se bian ngalɛ’n kɛ ɔ wɔ.+ Maan ɔ sɛ i sin wɔ lika nga a seli i kɛ ɔ tran lɔ’n nun. Nán maan ɔ nin e wɔ alɛ kunlɛ. Sɛ ɔ yo sɔ’n, ɔ́ blí i ɲin kún e.+ ?Afin sɛ i waan ɔ́ yó naan i min’n i klun jɔ i wun’n, ɔ su kpɛman e sran’m be ti’n ko mɛnmɛn i?
5 ?Nán Davidi sɔ’n i dunman nun ti yɛ sran’m be toli jue mɔ be sili su able be seli kɛ:
‘Saili kunnin sran akpi tra su,yɛ Davidi kunnin sran akpiakpi tra su’n niɔn’?”+
6 I sɔ’n ti’n, Akisi+ flɛli Davidi, yɛ ɔ seli i kɛ: “N kan Zoova m’ɔ lafiman’n, a ti ndɛnmanfuɛ. Kɔlɛ nga a nin min sonja mun be su kɔ alɛ kunlɛ yɛ’n, ɔ yo min fɛ dan.+ Afin kɛ a bali min wun wa lele mɔ w’a fa ju andɛ’n, n nin-a wunman sa tɛ kaan sa ɔ wun le.+ Sanngɛ e mɛn’n i siefuɛ’m be liɛ’n, be lafiman ɔ su.+
7 I sɔ’n ti’n, sa ɔ sin wɛtɛɛ su. Nán yo like wie naan be fa ɔ wun ya.”
8 Sanngɛ Davidi seli Akisi kɛ: “?Ngue ti-ɔ? ?Ngue yɛ n yoli-ɔ? ?Kɛ n toli ɔ wa lele andɛ’n, sa benin yɛ a wunnin i kɛ min mɔ n ti ɔ sufuɛ’n n yoli-ɔ? ?Ngue ti yɛ e nin wɔ mɔ a ti min min’n e kwlá kɔman naan e nin ɔ kpɔfuɛ mun y’a ko kun-ɔn?”
9 Akisi tɛli i su kɛ: “Min liɛ’n, n bu ɔ sran kpa. A ti kɛ Ɲanmiɛn i anzi sa.+ Sanngɛ e mɛn’n nun sran dandan’m be seli kɛ: ‘Nán maan ɔ su e su wɔ alɛ’n i kunlɛ wie.’
10 I sɔ’n ti’n, ainman’n a nin wɔ sran nga be bali’n amun jaso nglɛmun ndɛ kpa’n. Kpɛkun kɛ lika’n ko titi cɛ’n, amun sa amun sin.”
11 Ɔ maan, Davidi nin i sran’m be jasoli nglɛmun ndɛ kpa’n, yɛ be sali be sin Filistifuɛ’m be mɛn’n nun lɔ. Sanngɛ Filistifuɛ’m be liɛ’n, be ɔli Zizreɛli.+
