1 Samiɛli 3:1-21
-
Samiɛli kacili Ɲanmiɛn nuan ijɔfuɛ (1-21)
3 Kɛ ɔ́ yó sɔ’n, nn Samiɛli kan’n dí junman+ mán Zoova, Eli i wun lɛ. Sanngɛ blɛ sɔ’n nun’n, sran’m be taman ndɛ ng’ɔ fin Zoova nuan fite’n i ti sa. Yɛ ɔ yiman aolia nun sa’m+ be nglo kleman sran mun sa.
2 Cɛn kun’n, Eli la kɛ nga ɔ la lɛ titi’n. Kɛ ɔ́ yó sɔ’n, nn i ɲinma su si. Ɔ wunman ase kpa kun.+
3 Yɛ be nin-a nuanman Ɲanmiɛn i kannin’n.+ Samiɛli la Zoova i sua’n*+ nun, kɛ Ɲanmiɛn i Alaka’n wo lɛ’n.
4 Yɛ Zoova flɛli Samiɛli-ɔ. Ɔ tɛli su kɛ: “Min yɛ n wo yɛ.”
5 Ɔ wanndi ko toli Eli lɔ kpɛkun ɔ seli kɛ: “?Baba, a flɛli min? Min yɛ n wo yɛ.” Sanngɛ Eli seli i kɛ: “M’an flɛman wɔ. Sa ɔ sin ko la.” Yɛ ɔ ɔli ko lali-ɔ.
6 Zoova flɛli i ekun: “Samiɛli!” Yɛ Samiɛli jasoli-ɔ, ɔ ko toli Eli. Kpɛkun ɔ seli kɛ: “?Baba, a flɛli min? Min yɛ n wo yɛ.” Sanngɛ Eli seli kɛ: “Min wa, m’an flɛman wɔ. Sa ɔ sin ko la.”
7 (Kɛ ɔ́ yó sɔ’n, nn Samiɛli nin-a siman Zoova ka. Yɛ Zoova nin-a kanman ndɛ nin-a klemɛn i.)+
8 Zoova wa flɛli i ekun: “Samiɛli!” I kpɛ nsan su m’ɔ́ flɛ́ i’n yɛ ɔ o lɛ-ɔ. Yɛ Samiɛli jasoli-ɔ, ɔ ko toli Eli. Kpɛkun ɔ seli kɛ: “?Baba, a flɛli min? Min yɛ n wo yɛ.”
Eli wa wunnin i wlɛ kɛ Zoova yɛ ɔ su flɛ ba’n niɔn.
9 Yɛ Eli seli Samiɛli kɛ: “Ko la. Sɛ ɔ flɛ wɔ ekun’n, se kɛ: ‘Zoova, a kwla kan ndɛ’n, afin ɔ sufuɛ’n i su o ɔ nuan bo.’” Yɛ Samiɛli ɔli-ɔ, ɔ ko lali kan ɔ la lɛ’n.
10 Zoova bali wa jrannin lɛ. Ɔ flɛli i kɛ nga ɔ fa flɛli i i klikli’n nun’n sa: “Samiɛli, Samiɛli!” Yɛ Samiɛli seli kɛ: “A kwla kan ndɛ’n, afin ɔ sufuɛ’n i su o ɔ nuan bo.”
11 Zoova seli Samiɛli kɛ: “N su wa yo sa kun Izraɛli mɛn’n nun wa. Sran kwlaa ng’ɔ́ tí sa sɔ’n, ɔ́ bó bli.*+
12 Cɛn sɔ’n nun’n, ń yó maan Eli i awlofuɛ’m be su ndɛ kwlaa nga n kannin’n, kɛ ɔ fɛ i i bo bolɛ nun lele fa ju i awieliɛ’n, bé kpɛ́n su.+
13 Se i kɛ i mma’m be sa tɛ nga i bɔbɔ si nun’n ti’n,+ ɲrɛnnɛn nga n su wa fa yi i awlofuɛ’m be su’n, ɔ su wieman le. Afin i mma’m be sacili Ɲanmiɛn wun,+ sanngɛ w’a tuman be fɔ kekle kpa.+
14 I sɔ’n ti’n, n tali Eli i awlofuɛ’m be nda kɛ kannzɛ bé yí tɛ-o, annzɛ bé mán min like-o, min wla su fiman sa nga be yoli’n su le.”+
15 Kɛ Samiɛli lali lele mɔ aliɛ cɛnnin’n, ɔ ko tikeli Zoova i sua’n i anuan mun. Sanngɛ kɛ ɔ yo naan ɔ kan like ng’ɔ wunnin i’n i ndɛ kle Eli’n, w’a kanman, afin srɛ kun i.
16 Sanngɛ Eli flɛli Samiɛli. Ɔ seli kɛ: “Min wa Samiɛli!” Yɛ Samiɛli tɛli su kɛ: “Baba, min yɛ n wo yɛ.”
17 Ɔ usali kɛ: “?Ngue ndɛ yɛ ɔ kan kleli wɔ-ɔ. Yaci, nán fia ndɛ fi su. Sɛ a fia ndɛ nga Ɲanmiɛn kan kleli wɔ’n be nun kun sa su’n, maan Ɲanmiɛn nin wɔ kan.”
18 I sɔ’n ti’n, Samiɛli kannin ndɛ’n i kwlaa kleli i. W’a fiaman ndɛ ba kun sa su. Eli seli kɛ: “Zoova-ɔ. Sa ng’ɔ nian naan ɔ ti kpa’n, maan ɔ yo.”
19 Samiɛli ɲin kɔ i ɲrun titi. Zoova bɔbɔ jin i sin.+ Ndɛ ng’ɔ kannin be’n, ɔ leman kun sa mɔ w’a kpɛnman su-ɔ.
20 Kɛ ɔ fɛ i Dan lele m’ɔ́ fá jú Beɛ-Seba’n, Izraɛlifuɛ’m be kwlaa be tili i kɛ Samiɛli w’a yo Zoova i nuan ijɔfuɛ.
21 Zoova wa yili i wun nglo titi Silo lɔ. Afin Silo lɔ yɛ Zoova yi i wun nglo kle Samiɛli-ɔ, lɔ yɛ Zoova kan ndɛ kle i-ɔ.+
