1 Samiɛli 31:1-13
-
Saili nin i mma’m be nun nsan be wuli (1-13)
31 Filistifuɛ’m be nin Izraɛlifuɛ’m be kunnin.+ Sanngɛ Izraɛlifuɛ’m be wanndili Filistifuɛ’m be ɲrun. Yɛ be nun sunman be wuli Gilboa Oka’n su lɔ.+
2 Filistifuɛ’m be suli Saili nin i mma’m be su lele be mantannin be koko kpa. Kpɛkun be kunnin Saili i mma yasua mun,+ yɛle kɛ Zonatan+ nin Abinadabu nin Malki-Sia.
3 Alɛ’n yrili kpa Saili su. Kɛ ta tofuɛ’m be wunnin i mɔ be toli i wun ta’n, ta mma’m be ɲɛnnin i tɛtɛ kpa.+
4 Yɛ Saili seli sran ng’ɔ trɛ i alɛ ninnge’m be nun’n kɛ: “Fa ɔ tokofi’n wɔ min naan ɔ bo nun lɔ. Nán maan sran sɔ mɔ b’a wlaman be klɛn’n,+ be fa be tokofi’n be wɔ min naan be yo min tɛtɛ.” Sanngɛ sran ng’ɔ trɛ i alɛ ninnge’m be nun’n w’a kplinman su, afin srɛ kun i dan. I sɔ’n ti’n, Saili bɔbɔ cuɛnnin i tokofi’n kpɛkun ɔ tu tɔli su.+
5 Kɛ sran ng’ɔ tra Saili i alɛ ninnge’m be nun’n wunnin kɛ w’a wu’n,+ i kusu fɛli i tokofi liɛ’n. Ɔ tu tɔli su kpɛkun ɔ wuli Saili i wun lɛ.
6 Ɔ maan Saili nin i wa yasua nsan mun, nin sran ng’ɔ trɛ i alɛ ninnge’m be nun’n, nin i sran’m be kwlaa be wuli likawlɛ cɛn sɔ’n nun.+
7 Kɛ Izraɛlifuɛ nga be o kongo’n nun’n nin Zurdɛn’n i nuan lɔ’n, be wunnin kɛ Izraɛlifuɛ’m be sonja’m be wanndili naan Saili nin i mma’m be wuli’n, be yacili be klɔ’m be lɛ be wanndili.+ Yɛ Filistifuɛ’m be bali be wa trannin lɛ-ɔ.
8 Kɛ aliɛ cɛnnin’n, Filistifuɛ’m be bali naan bé ísa be nga be kunnin be’n be bo ninnge mun. Kpɛkun be wunnin Saili nin i wa yasua nsan’m be fuɛn mun Gilboa Oka’n su.+
9 Ɔ maan be kpɛli Saili i ti’n, kpɛkun be fɛli i alɛ ninnge mun. I sin’n, be sunmannin sran Filistifuɛ’m be mɛn wunmuan’n nun naan be ko bo jasin+ sɔ’n be amuin sua’m+ be nun, yɛ be bo kle sran’m be kwlakwla.
10 I sin’n, be fɛli i alɛ ninnge mun sieli i be amuin nga be flɛ i Astaate’n i sua’n nun. Kpɛkun be sendeli i fuɛn’n Bɛti-Sanin+ klɔ’n i talɛ’n i wun.
11 Kɛ Zabɛsi-Galaadi+ lɔfuɛ’m be tili like nga Filistifuɛ’m be fa yoli Saili’n,
12 be sonja’m be kwlaa be nantili kɔnguɛ wunmuan’n nun naan b’a ko fa Saili nin i wa yasua’m be fuɛn mɔ be sende Bɛti-Sanin klɔ’n i talɛ’n i wun’n. I sin’n, be sali be sin Zabɛsi naan b’a wɔ be nun lɛ.
13 Kpɛkun be fali be owie mun+ naan b’a ko sie be tamarisi waka ng’ɔ o Zabɛsi+ lɛ’n i bo lɛ. Kpɛkun be cili nglɛmun cɛn ba nso.
