1 Samiɛli 6:1-21
-
Filistifuɛ’m be fali Alaka’n sɛli i sin Izraɛli lɔ (1-21)
6 Zoova i Alaka’n+ dili anglo nso Filistifuɛ’m be mɛn’n nun.
2 Filistifuɛ’m be flɛli be amuin’m be ɲrun jranfuɛ mun nin be wunnzue yifuɛ mun.+ Kpɛkun be usali be kɛ: “?E yo Zoova i Alaka’n i sɛ? Amun kle e like nga e ko yo naan y’a fa sɛ i sin i osu’n nun’n.”
3 Be tɛli su kɛ: “Sɛ amun waan amún fá Zoova m’ɔ ti Izraɛli Ɲanmiɛn’n i aenguɛ’n i alaka’n bé kɔ́’n, nán amun fa wɔ sa ngbɛn. Kɛ amún fá kɔ́’n, amun fa like sie su be fa kpɛtɛ i.+ Like ng’ɔ fata kɛ amun yo naan amun a yo juejue’n yɛ ɔ o lɛ-ɔ. Kpɛkun amún wún sa nga ti yɛ ɔ kle amun ɲrɛnnɛn sɔ’n i wlɛ.”
4 I sɔ’n ti’n, be usali kɛ: “?Like benin yɛ e fa ko kpɛtɛ i-ɔ?” Be seli kɛ: “Amun nian Filistifuɛ’m be kpɛnngbɛn’m be nuan’n su+ naan amun fa sika ɔkwlɛ be yo like kɛ koko sa i sɔ nnun, ɔ nin like kɛ gbekle sa i sɔ nnun. Afin ɲrɛnnɛn ng’ɔ tɔli amun ngba amun su’n i kunngba’n yɛ ɔ tɔli amun siefuɛ’m be su-ɔ.
5 Amun yo like kɛ koko nin gbekle+ nga be su saci amun mɛn’n be sa. Kpɛkun amun yi Izraɛli i Ɲanmiɛn’n i ayɛ. Sɛ amun yo sɔ’n, atrɛkpa’n, ɔ́ yó maan ɲrɛnnɛn ng’ɔ fa yili amun, nin amun amuin’n, nin amun mɛn’n be su’n, ɔ́ yó sɔsɔ.+
6 ?Ngue ti yɛ amún yó ɲin kekle Ɲanmiɛn su kɛ Eziptifuɛ mun nin Faraɔn be fa yoli’n sa-ɔ?+ Kɛ ɔ kleli be ɲrɛnnɛn’n,+ be yacili Izraɛlifuɛ’m be nun be ɔli.+
7 I sɔ’n ti’n, amun bobo kakaklolo uflɛuflɛ kun. Amun fa nannin nɲɔn mɔ be nin-a faman waka nin-a sieman be kɔmin su le’n mɔ be le ba’n. Kpɛkun amun fa be minnda kakaklolo’n. Sanngɛ amun ti nannin’m be sin ba mun naan amun fa be wɔ awlo.
8 Amun fa Zoova i Alaka’n sie i kakaklolo’n su. Kpɛkun amun fa ninnge nga be fali sika ɔkwlɛ be yoli’n mɔ amun su ko fa kpɛtɛ i’n, be sie i wun lɛ buati kun nun.+ Yɛ maan kakaklolo’n wɔ.
9 Sɛ ɔ fa atin ng’ɔ fɛ i Bɛti-Semɛsi’n+ naan ɔ kɔ i lika lɔ’n, nn i yɛ ɔ yoli e abɔlɛ dan sɔ’n niɔn. Sanngɛ sɛ ɔ kɔman lɔ’n, é wún i wlɛ kɛ nɛ́n i yɛ maan ɲrɛnnɛn sɔ’n tɔli e su-ɔ, naan sa ngbɛn yɛ ɔ ɲannin e-ɔ.”
10 I sɔ yɛ sran’m be yoli-ɔ. Be fali nannin nɲɔn mɔ be le ba’n, be minndali kakaklolo’n. Kpɛkun be tili nannin’m be sin ba mun fa ɔli awlo.
11 Be fali Zoova i Alaka’n ɔ nin buati nga ninnge sunman gbekle nin koko mɔ be fali sika ɔkwlɛ be yoli’n be o nun’n, be sieli i kakaklolo’n nun.
12 Nannin’m be fali atin dan’n be ɔli be ɲrun ndɛnman su, be fali Bɛti-Semɛsi atin’n.+ Bé kɔ́’n, nn bé kpán. B’a kpaciman bɛ su annzɛ fama su. Kɛ ɔ́ yó sɔ’n, nn Filistifuɛ’m be mɛn siefuɛ’m bé sú be su. Be suli be su lele be juli Bɛti-Semɛsi i tiwa lɔ.
13 Blɛ sɔ’n nun’n, nn be nga be tran Bɛti-Semɛsi’n be o lika kpɛtɛkplɛɛ’n nun lɔ, be su kpɛ ble’n. Afin be o ble’n i kpɛlɛ blɛ’n nun. Bé mán be ti’n su-ɔ, Alaka’n yɛ ɔ o yɛ. Kɛ be wunnin i’n, ɔ yoli be fɛ dan.
14 Kakaklolo’n wluli Zozie m’ɔ ti Bɛti-Semɛsifuɛ’n i fie’n nun. Ɔ ko jrannin yɔbuɛ dan kun i wun lɛ. Ɔ maan sran’m be bubuli kakaklolo’n nun, kpɛkun be fɛli i waka’n be trɔli sin. Yɛ be fali nannin mun+ yili tɛ nga kɛ bé yí’n be yra nnɛn’n i kɔlikɔli’n mannin Zoova.
15 Levifuɛ’m+ be sikeli Zoova i Alaka’n nin buati nga sika ɔkwlɛ ninnge’m be o nun’n naan b’a fa be b’a sie i yɔbuɛ dan’n su. Kpɛkun Bɛti-Semɛsifuɛ’m+ be yili tɛ nga kɛ bé yí’n be yra nnɛn’n i kɔlikɔli’n ɔ nin tɛ wie mun ekun mannin Zoova cɛn sɔ’n nun.
16 Kɛ Filistifuɛ’m be mɛn siefuɛ nnun’m be wunnin i sɔ’n, be sali be sin Ekrɔn cɛn kunngba sɔ’n nun.
17 Ninnge sunman koko mɔ Filistifuɛ’m be fali sika ɔkwlɛ be yoli naan bé fá kpáta Zoova’n,+ Asdɔdu lɔfuɛ’m be yili kun,+ Gaza lɔfuɛ’m be yili kun, Askalɔn lɔfuɛ’m be yili kun, Gati lɔfuɛ’m be yili kun,+ Ekrɔn lɔfuɛ’m be yili kun.+
18 Ninnge sunman gbekle nga be fali sika ɔkwlɛ be yoli’n, be nuan ju kɛ Filistifuɛ’m be siefuɛ nnun’m be klɔ’m be nuan fa ju’n sa. Afin be siefuɛ sɔ’m be le klɔ dandan nga be sisili be wun’n, ɔ nin klɔ kanngan mun blo lɔ sɛsɛsɛ.
Andɛ nin andɛ’n, yɔbuɛ dan nga be fali Zoova i Alaka’n be sieli su’n, ɔ te o Zozie m’ɔ ti Bɛti-Semɛsifuɛ’n i fie’n nun. Yɛ yɔbuɛ sɔ’n ti kɛ lalofuɛ sa.
19 Sanngɛ Ɲanmiɛn kunnin Bɛti-Semɛsi lɔfuɛ mun. Afin be niannin Zoova i Alaka’n. Ɔ kunnin sran akpiakpi ablenun nin ableso (50.070).* Yɛ lɔfuɛ’m be trannin awlabɔɛ nun, afin sran nga Zoova kunnin be’n be sɔnnin dan.+
20 Bɛti-Semɛsi lɔfuɛ’m be seli be wun kɛ: “?Wan yɛ ɔ kwla jran Zoova i ɲrun-ɔn? Ɔ ti Ɲanmiɛn kun m’ɔ ti sanwun-ɔn.+ ?Yɛ wan wun yɛ ɔ́ kɔ́ naan w’a jaso e wun wa-ɔ?”+
21 I sɔ’n ti’n, be sunmannin sran Kiriati-Zearimun lɔfuɛ’m+ be sin naan be ko se be kɛ: “Filistifuɛ’m be fali Zoova i Alaka’n be sali be sin. Amun bla naan amun fa wɔ.”+
Ja ngua lɔ ndɛ mun
^ Ebr., “sran 70, sran 50.000.”
