Fluwa klikli nga Pɔlu klɛli Tesalonikifuɛ mun’n 3:1-13
3 Kɛ e minndɛli lele mɔ y’a kwlá tranman kun’n, e wunnin kɛ sɛ e ngunmin e ka Atɛnin lɔ’n,+ ɔ ti kpa.
2 Ɔ maan e sunmannin e niaan bian Timote+ m’ɔ ti Ɲanmiɛn i junman difuɛ’n,* m’ɔ bo Klisi’n i jasin fɛ’n, kɛ ɔ ko wla amun yakpa naan ɔ fɔnvɔ amun naan amun lafi e Min’n su kpa.
3 I liɛ’n, amun nun kun sa i sa sin su bubumɛn i* ɲrɛnnɛn sɔ’m be ti. Amun bɔbɔ amun si kɛ ɲrɛnnɛn kɛ ngalɛ sa’m be su to fuanman e.*+
4 I nun nga e o amun wun lɔ’n, e kan kleli amun titi kɛ é wá wún ɲrɛnnɛn. Kɛ amun fa wun i sa’n, i sɔ’n kusu yɛ ɔ juli-ɔ.+
5 I sɔ’n ti’n, kɛ n minndɛli lele mɔ m’an kwlá tranman kun’n, n sunmannin sran kɛ ɔ ko nian sɛ amun te nanti ndɛnman su-o,+ annzɛ sɛ wienun-ɔn, Lakafuɛ’n+ suli amun bo kɛ amun yo sa tɛ-o. Sɛ ɔ yo sɔ kusu’n, junman nga e dili’n, ɔ́ yó ngbɛn.
6 Timote fin amun wun lɔ w’a ju wa icra’n.+ Ɔ kannin amun lɔ ndɛ fɛ’n kleli e. I waan amun nin Ɲanmiɛn be nanti klanman titi, naan amun klo amun wiengu mun. Yɛ i waan amun wla nin-a fiman e su naan amun te bu e akunndan kpa, naan amun wla lo e kpa kɛ e kusu e wla fa lo amun’n sa.
7 I sɔ’n ti’n, aniaan mun, sɛ e sa mian-o, sɛ ɲrɛnnɛn tɔ e su-o, e wla gua ase. Afin amun kle kɛ amun nin e Min’n amun nanti nanwlɛ su.+
8 Kɛ mɔ amun ti e Min’n i sɔnnzɔnfuɛ mɔ amun jran kekle’n ti’n, e ɲan wunmiɛn.*
9 Amun ti’n, e klun jɔ dan e Ɲanmiɛn’n i ɲrun. I sɔ’n ti’n, e wunman wafa nga é lɛ́ i ase’n bɔbɔ.
10 Wia nun-o, kɔnguɛ-o, e srɛ Ɲanmiɛn tankaan kpa kɛ ɔ yo naan e wun amun wun* naan like ng’ɔ mian amun sa’n, e fa man amun naan an lafi e Min’n i su kpa.+
11 Maan e Si Ɲanmiɛn bɔbɔ nin e Min Zezi be man e atin naan e ko nian amun osu.
12 Asa ekun’n, maan e Min’n yo maan amun klo amun wiengu kpa+ yɛ amun klo sran’m be kwlaa be kpa kɛ nga e kusu e fa klo amun’n sa.
13 Kɛ ɔ ko yo sɔ’n, ɔ́ yó maan amún jrán kekle. I liɛ’n, kɛ e Min Zezi nin i sran’m bé sá be sin’n,*+ e Si Ɲanmiɛn su wunman sa fi amun wun.+
Ja ngua lɔ ndɛ mun
^ Be kwla se ekun kɛ “m’ɔ nin Ɲanmiɛn be di junman’n.”
^ Glk., “su kejeman.”
^ Annzɛ “be ti yɛ be kpali e-ɔ.”
^ Glk., “e o nguan nun.”
^ Glk., “amun ɲrun.”
^ Glɛki nun: paruzia. Nian Ndɛ’m be bo tulɛ lika’n nun lɔ.
