Fluwa klikli nga Pɔlu klɛli Timote’n 2:1-15
2 I sɔ’n ti’n, ndɛ nga ń dún mmua ń kán’n yɛle kɛ maan amun kwlaa amun tu amun klun be srɛ Ɲanmiɛn, amun srɛ i, amun srɛ i man amun wiengu, yɛ amun lɛ i ase sran wafawafa kwlaa ti.
2 Amun srɛ man famiɛn mun nin be nga be le kwlalɛ’n.+ I liɛ’n, é kwlá trán fɔun nun titi, yɛ e klun su titiman e. Ɔ maan é tú e klun é sú Ɲanmiɛn titi, kpɛkun ninnge nga é yó be’n é síe e ɲin ase diin é yó be.+
3 Ɲanmiɛn m’ɔ ti e Defuɛ’n+ i ɲrun’n, i sɔ yolɛ’n ti kpa, yɛ ɔ yo i fɛ.
4 Afin like ng’ɔ kunndɛ’n yɛle kɛ sran wafawafa kwlaa be ɲan be ti+ naan be wun ndɛ ng’ɔ ti nanwlɛ’n i wlɛ kpa.
5 Ɲanmiɛn ti kun,+ yɛ sran ng’ɔ jran Ɲanmiɛn nin klɔ sran’m+ be afiɛn’n+ ɔ ti kunngba kusu. Sran sɔ’n, yɛle Klisi Zezi.+
6 Ɔ fɛli i wun mannin naan ɔ́ fá like ng’ɔ nin i fata’n ɔ́ kpɔ́ sran’m be kwlaa be ti.*+ Ndɛ nga sɛ i blɛ ju’n, ɔ fata kɛ be kan’n yɛ ɔ o lɛ-ɔ.
7 Ndɛ sɔ’n i kanlɛ+ ti yɛ Ɲanmiɛn kpali min kɛ n yo jasin bofuɛ nin akoto-ɔ.+ Ndɛ nga n kan’n ti nanwlɛ, n buaman ato. Ɔ kpali min kɛ n kle be nga be timan Zifu’n be like+ naan be lafi i su naan be si ndɛ ng’ɔ ti nanwlɛ’n.
8 I sɔ’n ti’n, n klo kɛ lika kwlaa nun’n yasua’m be srɛ Ɲanmiɛn titi. Kɛ bé mán be sa’m be su+ bé srɛ́ Ɲanmiɛn’n, nán maan sa tɛ fi tran be wun, nán be yo ya fafuɛ,+ nin akplowa sifuɛ.+
9 Asa ekun’n, maan bla’m be wlawla be wun kpa, nán maan be fa be wun kle. Yɛ i sɔ yolɛ nun’n, maan be fa ngwlɛlɛ. Kusu kɛ bé yó be ti’n, nán maan i nun sika ɔkwlɛ wlalɛ’n annzɛ afle wlalɛ’n yo be cinnjin. Yɛ nán maan tralɛ nga be le gua’n, be wlalɛ’n yo be cinnjin wie.+
10 Sanngɛ maan be klanman’n i ɲin fite sa kpakpa nga be yo’n nun,+ naan be kle kɛ be ti bla mɔ be sro Ɲanmiɛn-ɔn.
11 Maan bla’m be tran diin be suan like, yɛ be yo wun ase kanfuɛ.+
12 N kplinman su kɛ bla kle like annzɛ ɔ sie yasua. Sanngɛ maan ɔ tran diin titi.+
13 Afin Adan yɛ Ɲanmiɛn dun mmua yili i-ɔ. I sin yɛ ɔ yili Ɛvu-ɔ.+
14 Asa kusu’n, b’a lakaman Adan, sanngɛ bla’n i liɛ’n be lɛkɛli i mlɔnmlɔn.+ Ɔ maan ɔ kacili sa tɛ yofuɛ.
15 Sɛ bla kun wu ba’n, i sɔ’n yó i ye.+ Sanngɛ maan ɔ* lafi Ɲanmiɛn su titi, ɔ yi klolɛ’n i nglo titi, yɛ ɔ yo sanwun titi, kpɛkun ɔ fa ngwlɛlɛ nanti.+
