2 Be Ɲoliɛ 1:1-17
1 Kɛ aliɛ cɛ́n m’ɔ́ sán’n, nn Davidi i wa Salomɔn i famiɛn dilɛ’n táka kpa. Yɛ Zoova m’ɔ ti i Ɲanmiɛn’n jin i sin. Ɔ yoli maan ɔ ɲannin ɲrun kpa.+
2 Salomɔn sunmannin sran naan be ko flɛ Izraɛlifuɛ’m be kwlakwla. Yɛle kɛ sran akpi su kpɛn mun, nin sran ya su kpɛn mun, nin jɔlɛ difuɛ mun, nin Izraɛlifuɛ’m be kpɛnngbɛn’m be kwlaa, nin awlobo kpɛnngbɛn mun.
3 Kpɛkun Salomɔn nin Izraɛlifuɛ’m be kwlakwla be ɔli lika nglonglo ng’ɔ o Gabaɔn lɔ’n+ su. Lɔ yɛ tannin sua mɔ Ɲanmiɛn Kpli yi i wun nglo nun’n ɔ o-ɔ. Tannin sua sɔ’n yɛ Moizi m’ɔ ti Zoova i sufuɛ’n kplɛnnin i aawlɛ flɛnnɛn’n nun lɔ’n niɔn.
4 Sanngɛ Davidi ko fali Ɲanmiɛn Kpli i Alaka’n Kiriati-Zearimun+ lɔ naan w’a fa ko sie i lika ng’ɔ siesieli’n nun. Ɔ kplannin tannin sua kun Zerizalɛmun lɔ naan be fa sie nun.+
5 Be fali aaba tɛ yiwlɛ+ nga Ur i wa Uri i wa liɛ Bezalɛli+ yoli’n be sieli i Zoova i tannin sua’n i ɲrun lɛ. Kpɛkun Salomɔn nin Izraɛlifuɛ’m be kwlaa be srɛli Ɲanmiɛn tɛ yiwlɛ’n i ɲrun lɛ.*
6 Salomɔn mannin ninnge wie mun lika sɔ’n nun lɔ Zoova ɲrun lɛ. Kpɛkun ɔ fali nnɛn akpi kun (1.000) fa yili tɛ nga kɛ bé yí’n be yra nnɛn’n i kɔlikɔli’n. Tannin sua mɔ Ɲanmiɛn yi i wun nglo nun’n i aaba tɛ yiwlɛ’n+ i su yɛ ɔ yili tɛ sɔ mun-ɔn.
7 Kɔnguɛ sɔ nun’n, Ɲanmiɛn yili i wun nglo kleli Salomɔn naan w’a se i kɛ: “Like nga a kunndɛ kɛ n fa man wɔ’n, kan kle min.”+
8 Yɛ Salomɔn seli Ɲanmiɛn kɛ: “A kleli min si Davidi kɛ a klo i dan kpa.+ Asa ekun’n, a sieli min famiɛn i osu.+
9 I sɔ’n ti’n, Ɲanmiɛn Zoova, yia nda nga a tali min si Davidi’n i nuan.+ Afin a fali min sieli ɔ nvle’n nunfuɛ mɔ be sɔnnin kpanngbanngban kɛ asiɛ wun ndutre sa’n be su famiɛn.+
10 Man min ngwlɛlɛ yɛ yo maan n si sa+ naan n sie sran nga mun.* ?Afin wan yɛ ɔ kwla di ɔ sran kpanngban nga mun be jɔlɛ-ɔ?”+
11 Yɛ Ɲanmiɛn seli Salomɔn kɛ: “W’a srɛman aɲanbeun, nin ninnge kpanngban, nin aɲrunɲan. W’a seman min kɛ n kun ɔ kpɔfuɛ mun, annzɛ n yo maan ɔ nguan ɲanman’n yo tɛnndɛn.* Sanngɛ ɔ waan n man wɔ ngwlɛlɛ yɛ n yo maan a si sa, naan w’a kwla di min nvle nunfuɛ mɔ n fali wɔ n sieli be su’n, be jɔlɛ mun. Kɛ mɔ like nga ɔ awlɛn o su’n yɛ a usali min’n ti’n,+
12 ń mán wɔ ngwlɛlɛ yɛ ń yó maan á sí sa. Asa ekun’n, ń mán wɔ aɲanbeun nin ninnge kpanngban, nin aɲrunɲan. Ɔ maan like nga n su wa fa man wɔ lɛ’n, famiɛn nga be dunnin mmua ɔ ɲrun’n, be nun wie fi w’a ɲɛnmɛn i sɔ liɛ’n. Yɛ famiɛn nga bé bá ɔ sin’n, be nun wie fi su ɲɛnmɛn i sɔ liɛ’n le.”+
13 Salomɔn fɛli i tannin sua mɔ Ɲanmiɛn yi i wun nglo nun’n, m’ɔ o Gabaɔn lɔ lika nglonglo+ su’n i ɲrun lɛ, kpɛkun ɔ ɔli Zerizalɛmun. Ɔ sieli Izraɛlifuɛ mun.
14 Salomɔn kunndɛli kakaklolo nin nnɛn kpanngɔ* kpanngban kpa. Ɔ ɲannin kakaklolo akpi kun ya nnan (1.400) nin nnɛn kpanngɔ* akpiakpi blu-nin-nɲɔn (12.000).+ Ɔ sieli wie mun kakaklolo klɔ’m be su.+ Yɛ ɔ sieli wie mun i bɔbɔ i wun lɛ, Zerizalɛmun lɛ.+
15 Famiɛn’n yoli maan sika nin sika ɔkwlɛ’n be wa truli Zerizalɛmun lɔ kɛ yɔbuɛ sa.+ Kpɛkun sɛdri waka’m be wa truli lika’n nun kɛ Sefela’n nun lɔ sikomɔɔ waka mun sa.+
16 Ezipti lɔ yɛ be ko to nnɛn kpanngɔ mun be blɛ Salomɔn-ɔn.+ Nnɛn kpanngɔ nga famiɛn’n i aata difuɛ’m be to’n,* i gua’n kaciman.+
17 Kakaklolo nga be ko to be Ezipti lɔ’n, kun ti sika mma ya nsiɛn (600), yɛ nnɛn kpanngɔ kun ti sika mma ya kun ablenun (150). Famiɛn’n i aata difuɛ’m be ko yo be atɛ Ɛti famiɛn’m be kwlaa, nin Siri famiɛn’m be sa nun.
Ja ngua lɔ ndɛ mun
^ Annzɛ “be usali Ɲanmiɛn i ngwlɛlɛ afɛ lɛ.”
^ Ebr., “n fite yɛ n bla sran nga’m be ɲrun.”
^ Ebr., “n man wɔ cɛn kpanngban.”
^ Annzɛ “nnɛn kpanngɔ su fufuɛ.”
^ Annzɛ “nnɛn kpanngban su fufuɛ.”
^ Be kwla se ekun kɛ “be fin Ezipti nin Kue. Famiɛn’n i aata difuɛ’m be ko to be Kue lɔ.” Atrɛkpa’n, Silisi yɛ be flɛ i kɛ Kue’n niɔn.
