2 Be Ɲoliɛ 11:1-23
11 Kɛ Roboamun juli Zerizalɛmun lɔ cɛ’n, ɔ yiali Zida nin Bɛnzamɛn akpasua’n nunfuɛ mun.+ Be ti safuɲrɛn akpiakpi ya akpiakpi ablaɔcuɛ (180.000), be si alɛ kun kpa. Ɔ yiali be naan be nin Izraɛlifuɛ’m be ko kun, naan famiɛn dilɛ’n sɛ i sin i bɔbɔ Roboamun i sa nun.+
2 I sin’n, Zoova kannin ndɛ kleli Semaia+ m’ɔ ti Ɲanmiɛn Kpli i sran’n. Ɔ seli kɛ:
3 “Se Salomɔn i wa Roboamun m’ɔ ti Zida famiɛn’n, ɔ nin Izraɛlifuɛ kwlakwla nga be o Zida nin Bɛnzamɛn akpasua’m be su’n be kɛ:
4 ‘Ndɛ nga Zoova kan’n yɛ: “Nán amun wɔ naan amun nin amun niaan’m be ko kun. Amun tinuntinun amun sa amun sin amun awlo’m be nun, afin min yɛ maan sa sɔ’n juli-ɔ.”’”+ Be fali Zoova i ndɛ’n su, kpɛkun be sali be sin. B’a faman alɛ b’a wlaman Zeroboamun sin.
5 Roboamun trannin Zerizalɛmun lɔ. Ɔ kplannin klɔ wie mun Zida asa’n su, kpɛkun ɔ sisili be wun kpa.
6 Ɔ kplannin klɔ nga’m be kpa.* Be yɛle Bɛtleɛmun,+ nin Etamun, nin Tekoa,+
7 nin Bɛti-Zii, nin Soko,+ nin Adulamun,+
8 nin Gati,+ nin Maresa, nin Zifi,+
9 nin Adoraimun, nin Lakisi,+ nin Azeka,+
10 nin Zora, nin Azalɔn,+ ɔ nin Ebrɔn.+ Klɔ sɔ’m be wun ti sisiwa yɛ be o Zida nin Bɛnzamɛn akpasua’m be su.
11 Asa ekun’n, ɔ fali ajalɛ wie mun naan lika nga be wun ti sisiwa’n be nun wlulɛ’n w’a yoman pɔpɔ, yɛ ɔ fali sonja su kpɛn mun sieli be su. Kpɛkun ɔ fali aliɛ nin ngo nin duvɛn sieli lika sɔ’m be nun sɛsɛsɛ.
12 Ɔ fali ɲrɛn dandan mun nin cua mun sieli klɔ dandan’m be kwlaa be su. Klɔ sɔ’m be wun ajalɛ ng’ɔ fali naan be nun wlulɛ w’a yoman pɔpɔ’n, ɔ trali laa liɛ’n lelele. Yɛ ɔ sieli Zida akpasua’n nin Bɛnzamɛn akpasua’n nunfuɛ mun tititi.
13 Ɲanmiɛn ɲrun jranfuɛ mun nin Levifuɛ mɔ be o Izraɛli nvle wunmuan’n nun’n, be jasoli be tranwlɛ’m be nun, kpɛkun be bɛli i bo suanlɛ.
14 Levifuɛ’m be yacili nnɛn didiwlɛ nga be fa mannin be’n nin be asiɛ mun lɛ,+ kpɛkun be bali Zida nin Zerizalɛmun lɛ. Afin Zeroboamun nin i mma’m be tuli be Zoova i ɲrun jranlɛ junman’n nun.+
15 I sin’n, Zeroboamun sieli i bɔbɔ i Ɲanmiɛn ɲrun jranfuɛ liɛ mun naan be di be junman’n lika nglonglo’m be su,+ naan be sɔ amuin* nga be ti kɛ boli kpakpuɛ sa’n+ nin nannin ba m’ɔ yoli be’n.+
16 Izraɛli lɔ akpasua’m be kwlakwla be su’n, be nga be awlɛn o Zoova m’ɔ ti Izraɛli Ɲanmiɛn’n i sulɛ’n su sakpasakpa’n, be suli Ɲanmiɛn ɲrun jranfuɛ mun nin Levifuɛ’m be su Zerizalɛmun lɔ naan bé kó yí tɛ bé mán Zoova m’ɔ ti be nannan’m be Ɲanmiɛn’n.+
17 Be mannin famiɛn diwlɛ nga i bo’n taka Zida lɔ’n, i fanngan kpa. Kpɛkun be jrannin Salomɔn i wa Roboamun i sin. Be yoli sɔ lele afuɛ nsan. Afuɛ nsan sɔ’m be nun’n, be nantili Davidi nin Salomɔn be ajalɛ’n su.
18 I sin’n, Roboamun jali Maalati. Davidi i wa yasua nga be flɛ i kɛ Zerimɔtu’n, ɔ nin Eliabu i wa bla nga be flɛ i kɛ Abiaili’n yɛ be wuli Maalati-ɔ. Eliabu kusu ti Zese i wa.+
19 I sin’n, ba yasua nga Roboamun nin Maalati be wuli be’n yɛle Zeisi, nin Semaria, ɔ nin Zaamun.
20 I sin ekun’n, ɔ wa jali Absalɔmun+ i anunman nga be flɛ i kɛ Maaka’n. Ba yasua nga be wuli be’n yɛle Abia,+ nin Atai, nin Ziza, ɔ nin Selomiti.
21 Roboamun kloli Maaka m’ɔ ti Absalɔmun i anunman’n dan trali i yi mun nin i bo bla onga’m* be kwlaa.+ I yi’m be ti blu-nin-mɔcuɛ (18), yɛ i bo bla onga’m* be ti ablesiɛn (60). Ɔ wuli ba yasua ablaɔn-nin-mɔcuɛ (28) nin ba bla ablesiɛn (60).
22 I sɔ’n ti’n, Roboamun fali Maaka i wa yasua Abia sieli i niaan’m be su kɛ ɔ yo be su kpɛn nin be ɲrun dinfuɛ. Afin Roboamun waan ɔ́ síe i famiɛn.
23 Ɔ maan ɔ fali ajalɛ wie mun ngwlɛlɛ su, ɔ fɛli i wa yasua wie mun ɔli* Zida nin Bɛnzamɛn akpasua’m be su klɔ kwlaa nga be sisili be wun kpa’n be su.+ Ɔ mannin be ninnge kpanngban nin bla kaka kpa.
Ja ngua lɔ ndɛ mun
^ Annzɛ “Ɔ sisili be wun.”
^ Annzɛ “mmusu.”
^ Ebr., “i soman mun.”
^ Ebr., “i soman mun.”
^ Annzɛ “ɔ yoli maan be bo sanndili.”
