2 Be Ɲoliɛ 12:1-16
12 Kɛ Roboamun i famiɛn dilɛ’n takali kpa+ mɔ i kwlalɛ’n yoli dan’n, i osu w’a cɛman, ɔ yacili Zoova i Mmla’n su nantilɛ.+ Izraɛlifuɛ’m be kwlaa be yoli kɛ i sa.
2 Kɛ Roboamun yoli famiɛn’n i afuɛ nnun su’n, Sisaki+ m’ɔ ti Ezipti famiɛn’n fali alɛ wlali Zerizalɛmunfuɛ’m be sin, afin be nin Zoova b’a nantiman klanman.
3 Kɛ ɔ́ fín Ezipti bá’n, ɔ fali kakaklolo akpi kun ya nɲɔn (1.200), nin nnɛn kpanngɔ su fufuɛ akpiakpi ablesiɛn (60.000) bali. Sonja ng’ɔ nin be bali’n, be kwlá siman be nuan. Be ti Libifuɛ, nin Sikifuɛ, ɔ nin Etiopifuɛ.+
4 Ɔ fali Zida klɔ dandan nga be sisili be wun’n. I sin’n, ɔ juli Zerizalɛmun lɛ.
5 Semaia+ m’ɔ ti Ɲanmiɛn nuan ijɔfuɛ’n ko toli Roboamun nin Zida lɔ sran dandan nga Sisaki i balɛ’n ti’n, be yiali Zerizalɛmun lɛ’n. Ɔ seli be kɛ: “Ndɛ nga Zoova kan’n yɛ: ‘Amun kacili amun sin sili min. I sɔ’n ti yɛ n kusu n yacili amun+ Sisaki i sa nun-ɔn.’”
6 Kɛ ɔ yoli sɔ’n, Izraɛli lɔ sran dandan mun nin famiɛn’n be kannin be wun ase.+ Kpɛkun be seli kɛ: “Zoova yo sa i nuan su.”
7 Kɛ Zoova wunnin kɛ be kannin be wun ase’n, Zoova seli Semaia kɛ: “B’a kan be wun ase. N su nunnunman be. Ɔ cɛ kan’n, ń dé be.+ N su yoman naan Sisaki tu min klunngbɔ Zerizalɛmunfuɛ’m be su.
8 Sanngɛ bé káci i sufuɛ. I liɛ’n, bé wún ngbaciɛ ng’ɔ o min sulɛ’n nin nvle uflɛ nun famiɛn’m be sulɛ’n i afiɛn’n.”
9 Ɔ maan Famiɛn Sisaki m’ɔ ti Ezipti famiɛn’n fali alɛ wlali Zerizalɛmunfuɛ’m be sin. Ɔ fali ninnge kpakpa kwlaa nga be o Zoova i sua’n nun+ lɔ’n nin famiɛn’n i sua’n nun lɔ’n. Ɔ fali like kwlaa. Sika ɔkwlɛ ɲrɛn nga Salomɔn yoli be’n, ɔ fali be wie.+
10 I sɔ’n ti’n, Famiɛn Roboamun yoli aaba ɲrɛn mun fa sieli be osu. Kpɛkun ɔ fa be wlali gladi difuɛ mun* be su kpɛn’m be sa nun. Be yɛ be nian famiɛn’n i awlo’n i anuan’n su-ɔ.
11 Blɛ kwlaa nga famiɛn’n kɔ Zoova i sua’n nun lɔ’n, gladi difuɛ’m be wlu lɔ, kpɛkun be fa ɲrɛn mun be tra nun. I sin’n, be fa be ko sie be osu’n nun, gladi difuɛ’m be sua ba’n nun lɔ.
12 Kɛ mɔ famiɛn’n kɛnnin i wun ase’n ti’n, Zoova guali i wun ya ng’ɔ fali’n i ase.+ W’a nunnunman be sekeseke.+ Asa ekun’n, ninnge kpakpa wie’m be o Zida lɔ.+
13 Famiɛn Roboamun yoli maan i famiɛn dilɛ’n takali kpa Zerizalɛmun lɔ, yɛ ɔ yoli famiɛn titi. Kɛ ɔ́ yó famiɛn’n, nn ɔ le afuɛ ablanan-nin-kun (41). Ɔ dili famiɛn afuɛ blu-nin-nso (17) Zerizalɛmun lɔ. Kɛ Zoova niannin Izraɛli akpasua’m be kwlaa be nun’n, klɔ sɔ’n yɛ ɔ fali naan i dunman’n tran su-ɔ. Be flɛ famiɛn’n i nin’n kɛ Naama, ɔ ti Amɔnfuɛ.+
14 Sanngɛ Roboamun yoli like ng’ɔ ti tɛ’n, afin w’a tumɛn i klun w’a kunndɛman Zoova.+
15 Roboamun i su ndɛ’n, kɛ ɔ fɛ i i bo bolɛ’n nun lele m’ɔ́ fá wie’n, ɔ ti klɛwa Semaia m’ɔ ti Ɲanmiɛn nuan ijɔfuɛ’n,+ nin Ido m’ɔ wun aolia nun sa munʼn+ be ndɛ ng’ɔ o awlobo’m be fluwa’n nun’n i nun wie. Alɛ tɔli Roboamun nin Zeroboamun be afiɛn titi.+
16 Roboamun wa wuli.* Kpɛkun be sieli i Davidi Klɔ’n su lɔ.+ Yɛ i wa Abia+ sinnin i osu kacili famiɛn-ɔn.
