2 Be Ɲoliɛ 13:1-22
13 Kɛ Zeroboamun yoli famiɛn’n i afuɛ blu-nin-mɔcuɛ (18) su’n, Abia kacili Zida lɔ famiɛn.+
2 Ɔ dili famiɛn Zerizalɛmun lɔ afuɛ nsan. Be flɛ i nin’n kɛ Mikaya.+ Uriɛli m’ɔ fin Gibea’n+ i wa-ɔ. Alɛ tɔli Abia nin Zeroboamun be afiɛn.+
3 Abia nin sonja akpiakpi ya nnan (400.000) be ɔli alɛ kunlɛ. Be ti safuɲrɛn, yɛ be si alɛ kun kpa.+ Zeroboamun kusu nin i sonja akpiakpi ya mɔcuɛ (800.000) be ko jranjrannin naan be nin i bé kún. I sonja’m be si alɛ kun kpa wie, yɛ be ti safuɲrɛn.
4 Abia ko jrannin Zemaraimun oka’n su lɔ. Lika sɔ’n wo Efraimun asa’n su lɔ okaoka’m be nun lɔ. Ɔ seli kɛ: “Zeroboamun, wɔ nin Izraɛlifuɛ’m be kwlakwla, amun sie amun su.
5 ?Amun siman kɛ Zoova m’ɔ ti Izraɛli Ɲanmiɛn’n, ɔ nin Davidi be trali njin aenguɛ kun*+ naan ɔ fali Izraɛli wa famiɛn dilɛ’n wlali Davidi nin i mma’m+ be sa nun naan ɔ yo be liɛ tititi?+
6 Ɔ nin i sɔ ngba’n, Davidi i wa Salomɔn i sufuɛ nga be flɛ i Nebati’n i wa Zeroboamun+ jasoli i min’n i wun.+
7 Kɛ ɔ yoli sɔ’n, finfinfuɛ wie mɔ be leman like fi be yoman’n, be jrɛnnin i sin. Be wunmiɛn’n trali Salomɔn i wa Roboamun i liɛ’n su. Kɛ ɔ́ yó sɔ’n, nn Roboamun te yo gbanflɛn kan, srɛ kun i, yɛ ɔ kwlá jranman be ɲrun.
8 “Amun sɔnnin kpa. Asa ekun’n, sika ɔkwlɛ nannin ba nga Zeroboamun yoli be naan amun sɔ be’n, be o amun sa nun. I sɔ’n ti’n, amun bu i kɛ amun kwla tanndan Zoova i famiɛn dilɛ m’ɔ fa wlali Davidi i mma’m be sa nun’n i ɲrun.+
9 ?Amun a kanman Aarɔn i osu’n nunfuɛ mɔ be ti Zoova i ɲrun jranfuɛ’n,+ ɔ nin Levifuɛ’m be bo? ?Amun a sieman amun bɔbɔ amun sran liɛ mun naan be jran amun amuin’m be ɲrun kɛ nga nvle kun nga’m be fa yo’n sa?+ Sran kwlaa ng’ɔ fa nannin tola kun nin bua ɲin nso ba’n, ɔ kwla yo amuin sɔ mɔ be timan like fi’n, be ɲrun jranfuɛ.
10 E liɛ’n, Zoova yɛ ɔ ti e Ɲanmiɛn’n niɔn.+ Y’a kaciman e sin y’a simɛn i. E Ɲanmiɛn ɲrun jranfuɛ mɔ be ti Aarɔn i osu’n nunfuɛ’n be liɛ’n, be di junman man Zoova yɛ Levifuɛ’m be uka be.
11 Nglɛmun nin nnɔsua kwlaa’n, be yi tɛ nga kɛ bé yí’n be yra nnɛn’n i kɔlikɔli’n naan sin wunsrɛn’n fite wɔ Zoova wun lɔ.+ Asa ekun’n, be yra ansan fanninfannin’n,+ yɛ kpanwun nga be tian be wiengu su’n*+ be o tabli nga sika ɔkwlɛ jrɛiin yɛ be fa yoli’n be su. Nnɔsua kwlaa’n, be sɔ sika ɔkwlɛ kannin siewlɛ’n+ nin i su kannin mun be nuan.+ E yo i kwlaa sɔ’n e fa kle kɛ like nga Zoova m’ɔ ti e Ɲanmiɛn’n waan e yo’n yɛ e yo-ɔ. Sanngɛ amun liɛ’n, amun kacili amun sin sili i.
12 Amun nian! Ɲanmiɛn Kpli o e sin, i yɛ ɔ kle e atin-ɔn. I ɲrun jranfuɛ’m be o wa naan bé fíta awɛ’n nun naan e nin amun e kun. Izraɛlifuɛ mun, nán amun nin Zoova m’ɔ ti amun nannan’m be Ɲanmiɛn’n be kun. Afin i bo’n su guaman kpa manman amun.”+
13 Sanngɛ Zeroboamun fɛli i sonja wie mun naan be bu sa Zidafuɛ’m be sin lɔ. Ɔ maan Zeroboamun i sonja wie’m be jrannin Zidafuɛ’m be ɲrun wa, yɛ wie’m be bu sali be sin lɔ.
14 Kɛ Zidafuɛ’m be niannin be sin lɔ’n, be wunnin kɛ ɔ fata kɛ be kun alɛ be bue nɲɔn’n su, yɛle kɛ be ɲrun wa, ɔ nin be sin lɔ. I sɔ’n ti’n, be kpan flɛli Zoova.+ Ɲanmiɛn ɲrun jranfuɛ’m be kusu be fitali awɛ’n nun kekle kpa.
15 Zidafuɛ’m be kpannin alɛ kunlɛ kpanlɛ. Kɛ be kpannin alɛ kunlɛ kpanlɛ sɔ’n, Ɲanmiɛn Kpli kwlali Zeroboamun nin Izraɛlifuɛ’m be kwlakwla, Abia nin Zidafuɛ’m be ɲin bo lɛ.
16 Izraɛlifuɛ’m be wanndili Zidafuɛ’m be ɲrun. Ɲanmiɛn fa be wlali Zidafuɛ’m be sa nun.
17 Abia nin i sran’m be kunnin sran kpanngban kpa. Be kunnin Izraɛlifuɛ’m be nun sran akpiakpi ya nnun (500.000). Be nga alɛ’n dili be sɔ’n, be si alɛ kun kpa.
18 Cɛn sɔ’n nun’n, Izraɛlifuɛ’m be ɲin guali ase dan. Sanngɛ Zidafuɛ mun yɛ be kwlali-ɔ, afin be fali be wla guali* Zoova m’ɔ ti be nannan’m be Ɲanmiɛn’n su.+
19 Abia suli Zeroboamun su lelele. Ɔ deli klɔ wie mun i sa nun. Klɔ sɔ mun yɛle Betɛli+ nin klɔ nga be o i asa’n su’n,* nin Zɛsana nin klɔ nga be o i asa’n su’n, ɔ nin Efrainin+ nin klɔ nga be o i asa’n su’n.
20 Abia blɛ su’n, Zeroboamun w’a ɲanman kwlalɛ kɛ laa’n sa kun le. I sin’n, Zoova kleli i ɲrɛnnɛn yɛ ɔ wuli-ɔ.+
21 Sanngɛ Abia liɛ’n, i fanngan’n wa ukali su tititi. I sin’n, ɔ jali bla blu-nin-nnan (14).+ Ɔ wuli ba yasua ablaɔn-nin-nɲɔn (22) nin ba bla blu-nin-nsiɛn (16).
22 Abia i su ndɛ’n i onga’n, ninnge ng’ɔ yoli be’n nin ndɛ ng’ɔ kannin be’n, be klɛli i kwlaa Ɲanmiɛn nuan ijɔfuɛ Ido+ i fluwa’n nun.
Ja ngua lɔ ndɛ mun
^ Yɛle kɛ, ɔ́ trán lɛ tititi, yɛ ɔ kwlá kaciman le.
^ Yɛle kɛ, kpanwun nga be fa man Ɲanmiɛn’n.
^ Ebr., “kisali.”
^ Annzɛ “be mɛntɛn i’n.”
