2 Be Ɲoliɛ 16:1-14
16 Kɛ Aza yoli famiɛn’n, i afuɛ ablasan-nin-nsiɛn (36) su’n, Famiɛn Baasa+ m’ɔ ti Izraɛli famiɛn’n fali alɛ wlali Zidafuɛ’m be sin. Kpɛkun ɔ boli Rama+ klɔ’n i wun sisilɛ bo.* Ɔ yoli sɔ naan sran fi w’a finman Aza m’ɔ ti Zida famiɛn’n+ i nvle’n nun lɔ w’a fiteman, annzɛ sran fi w’a wluman lɔ.
2 Kɛ ɔ yoli sɔ’n, Aza fali sika nin sika ɔkwlɛ nga be o ninnge siewlɛ mɔ be o Zoova i sua’n+ nin famiɛn’n i sua’n be nun’n. Kpɛkun ɔ fa ko mannin Famiɛn Bɛnin-Adadi m’ɔ ti Siri famiɛn+ m’ɔ tran Damasi’n. Aza seli kɛ:
3 “Aenguɛ o e nin wɔ e afiɛn. Min si nin ɔ si kusu be trali aenguɛ. N su blɛ ɔ sika nin sika ɔkwlɛ. Yaci, aenguɛ nga a nin Famiɛn Baasa m’ɔ ti Izraɛli famiɛn’n be trali’n, nán di su kun. I liɛ’n, ɔ́ jáso min lika’n nun wa.”
4 Bɛnin-Adadi fali ndɛ nga Famiɛn Aza kannin’n su. Kpɛkun ɔ sunmɛnnin i sonja’m be su kpɛn mun naan be ko utu Izraɛli klɔ mun. Ɔ maan be ko fali Izɔn,+ nin Dan,+ ɔ nin Abɛli-Maimun, nin ninnge siewlɛ’m be kwlaa nga be o Nɛftali akpasua’n su lɔ klɔ’m be su’n.+
5 Kɛ Baasa tili ndɛ sɔ’n, ɔ ka lɛ yacili Rama i kplanlɛ,* w’a guaman junman’n i bo.
6 Famiɛn Aza fali Zidafuɛ’m be kwlaa, be ko isali yɔbuɛ nin waka nga Baasa su fa kplan+ Rama’n.+ Kpɛkun ɔ fa sisili Geba+ nin Mizpa+ be wun kpa.*
7 Blɛ sɔ’n nun’n, Ananin+ m’ɔ ti jeliwafuɛ’n* ko toli Aza m’ɔ ti Zida famiɛn’n naan w’a se i kɛ: “Kɛ mɔ w’a faman ɔ wla w’a guaman* Zoova m’ɔ ti ɔ Ɲanmiɛn’n i su mɔ Siri famiɛn’n i su yɛ a fali ɔ wla guali’n,* i ti yɛ w’a kwlá kunman Siri famiɛn’n i sonja mun-ɔn.+
8 Etiopifuɛ mun nin Libifuɛ’m be sonja’m be sɔnnin lelele. Yɛ be kakaklolo nin be nnɛn kpanngɔ su fufuɛ’m be ti kpanngban kpa. ?Nɛ́n i-ɔ? Sanngɛ kɛ mɔ a fali ɔ wla guɛli i Zoova su’n ti’n, ɔ fali be wlali ɔ sa nun.+
9 Afin Zoova liɛ’n, ɔ niannian asiɛ wunmuan’n su+ naan ɔ́ yí i wunmiɛn’n i nglo klé be kwlaa nga be fa be awlɛn’n kwlaa be su i’n.*+ A dili sinnzin sa ngalɛ’n nun. I sɔ’n ti’n, kɛ ɔ fin andɛ’n, bé fá alɛ wlá ɔ sin sa trilili.”+
10 Sanngɛ ndɛ nga jeliwafuɛ’n kan kleli Aza’n, ɔ loli i ngasi. Ndɛ sɔ’n ti’n, ɔ fali ya naan w’a wlɛ i bisua.* Kpɛkun blɛ kunngba sɔ’n nun’n, Aza wa kleli i sran’m be nun wie’m be ɲrɛnnɛn.
11 Aza i su ndɛ’n, kɛ ɔ fɛ i i bo bolɛ’n nun lele m’ɔ́ fá wie’n, ɔ ti klɛwa Zida nin Izraɛli Famiɛn’m be Fluwa’n nun.+
12 Kɛ Aza yoli famiɛn’n, i afuɛ ablasan-nin-ngwlan (39) su’n, like wie yoli i ja’n lele ɔ wa tɔli tukpacɛ kekle kpa. Sanngɛ i tukpacɛ sɔ’n nun bɔbɔ’n, w’a fɛmɛn i wun w’a mantanman Zoova, ayre yofuɛ’m be sin yɛ ɔ ɔli-ɔ.
13 I sin’n, Aza wuli.*+ Kɛ ɔ yoli famiɛn’n, i afuɛ ablanan-nin-kun (41) su yɛ ɔ wuli-ɔ.
14 Be sieli i ndia dan kpa ng’ɔ kpɛli i yɔbuɛ kun nun Davidi Klɔ’n su lɔ’n,+ i nun. Be fali bomie ngo nin nguɛn wafa kun m’ɔ ti i liɛ ngunmin’n, mɔ be fali ninnge wafawafa be yoli’n,+ be fa kpakpali li nga be lɛli i saka’n su’n, i wunmuan’n i wun. Asa ekun’n, kɛ bé yó i sɛ’n, be trɔli sin dan kpa kun i dunman nun.*
Ja ngua lɔ ndɛ mun
^ Annzɛ “ɔ kplɛnnin i kpa”, “ɔ kplɛnnin i uflɛ.”
^ Annzɛ “i wun sisilɛ, i uflɛ kplanlɛ.”
^ Annzɛ “be kplannin be kpa”, “be kplannin be uflɛ.”
^ Ebr., “kisali.”
^ Ebr., “w’a kisaman.”
^ Nian Ndɛ’m be bo tulɛ lika’n nun lɔ.
^ Annzɛ “ɔ́ súan be kwlaa nga be fa be wla guɛ i su’n be bo.”
^ Ebr., “naan w’a ko sie i sua ba nga be sie ninnge’m be nun’n, i nun.”
^ Ebr., “be lɛli i i nannan’m be wun lɛ.”
^ Ɔ ti weiin kɛ nán Aza i saka’n yɛ be yrɛli i-ɔ, sanngɛ ninnge fanninfannin wie mun yɛ be yrali be-ɔ.
