2 Be Ɲoliɛ 21:1-20
21 I sin’n, Zozafati wuli.* Be sieli i Davidi Klɔ’n su lɔ, i nannan’m be wun lɛ. Yɛ i wa Zoramun sinnin i osu kacili famiɛn.+
2 I niaan bian mɔ be ti Zozafati i wa wie’n, be yɛle Azaria, nin Zeiɛli, nin Zakari, nin Azaria, nin Misɛli, ɔ nin Sefatia. Zozafati m’ɔ ti Izraɛli famiɛn’n i wa yɛle be kwlaa sɔ mun.
3 Be si fali sika nin sika ɔkwlɛ ninnge mun nin ninnge kpakpa kpanngban kpa cɛli be. Ɔ fali Zida klɔ nga be sisili be wun’n+ mannin be wie. Sanngɛ ɔ fali famiɛn diwlɛ’n wlali Zoramun i sa nun,+ afin i yɛ ɔ ti ba kpɛn’n niɔn.
4 Kɛ Zoramun sinnin i si i osu m’ɔ yoli famiɛn’n, ɔ fali tokofi kunnin i niaan’m be kwlakwla.+ Kpɛkun ɔ kunnin Izraɛli lɔ sran dandan wie mun. Ɔ yoli sɔ naan i famiɛn dilɛ’n taka kpa.
5 Kɛ Zoramun káci famiɛn’n, nn ɔ le afuɛ ablasan-nin-nɲɔn (32). Ɔ dili famiɛn afuɛ mɔcuɛ Zerizalɛmun lɔ.+
6 Ɔ niannin Izraɛli famiɛn’m be ajalɛ’n su nantili,+ kɛ nga Akabu i awlofuɛ’m be fa yoli’n sa. Afin ɔ jali Akabu i wa bla’n.+ Yɛ ɔ yoli sa ng’ɔ ti tɛ Zoova ɲrun’n titi.
7 Sanngɛ aenguɛ nga Zoova nin Davidi be trali’n+ ti’n, w’a kunndɛman kɛ ɔ́ núnnún Davidi i osu’n.* Afin ɔ tali nda kɛ ɔ́ mɛ́n i nin i mma’m be kannin* kun titi.+
8 Zoramun blɛ su’n, Edɔmunfuɛ’m be jasoli Zida wun.+ Kpɛkun be sieli be bɔbɔ be famiɛn liɛ.+
9 I sɔ’n ti’n, Zoramun nin i sonja su kpɛn mun be fɛli i kakaklolo’m be kwlaa be ɔli. Kpɛkun ɔ jasoli kɔnguɛ, ɔ nin Edɔmunfuɛ nga be bo sin yiɛli i’n nin kakaklolo su kpɛn mun be kunnin, yɛ ɔ kwlali be.
10 Sanngɛ lele nin andɛ’n, Edɔmunfuɛ’m be te jaso Zida wun. Blɛ kunngba sɔ’n nun’n, Libinafuɛ’m+ be kusu be jasoli Zoramun wun, afin ɔ kacili i sin sili Zoova m’ɔ ti i nannan’m be Ɲanmiɛn’n.+
11 Asa ekun’n, ɔ yoli lika nglonglo mun+ Zida lɔ oka’m be su naan Zerizalɛmunfuɛ’m be sɔ amuin mun.* Ɔ fali Zidafuɛ mun sieli atin tɛ su.
12 Eli+ m’ɔ ti Ɲanmiɛn nuan ijɔfuɛ’n klɛli fluwa kun ko mɛnnin i. Ɔ seli i kɛ: “Ndɛ nga Zoova m’ɔ ti ɔ nannan Davidi i Ɲanmiɛn’n kan’n yɛ: ‘W’a nantiman ɔ si Zozafati+ nin Aza+ m’ɔ ti Zida famiɛn’n be ajalɛ’n su.
13 Sanngɛ Izraɛli famiɛn’m be atin liɛ’n su yɛ a nantili-ɔ.+ Yɛ a yoli maan Zidafuɛ mun nin Zerizalɛmunfuɛ’m be sɔli amuin*+ kɛ Akabu i awlofuɛ’m be sa.+ A kunnin ɔ bɔbɔ ɔ niaan mun,+ yɛle kɛ ɔ si i awlofuɛ mɔ be kpa tra wɔ’n.
14 I sɔ’n ti’n, Zoova wá fá ɲrɛnnɛn dan yí ɔ nvle’n nunfuɛ mun, nin ɔ mma mun, nin ɔ yi’m be su. Yɛ ɔ́ sáci ɔ ninnge’m be kwlaa.
15 Yɛ tukpacɛ fanunfanun bé tɔ́ ɔ su. Tukpacɛ kun yó ɔ klun aya’n lele ɔ klun aya’n fíte. Kɛ lika’n cɛ́n m’ɔ́ sán’n, nn ɔ́ yó tɛ trá laa’n.’”
16 I sin’n, Zoova suli Filistifuɛ mun+ nin Arabu+ nga be o Etiopifuɛ’m be wun lɔ’n be bo+ naan be fa alɛ wla Zoramun sin.
17 Be fali be wue kekle be wluli Zida nvle’n nun. Ninnge kwlaa nga be wunnin be famiɛn’n i sua’n nun’n, be isali be ɔli.+ Be fɛli i mma mun nin i yi mun ɔli wie. I wa kunngba cɛ nga be yacili i lɛ be mɛnnin i’n yɛle be nun kaanfuɛ’n. Be flɛ i kɛ Zoakazi.*+
18 Kɛ ɔ yoli sɔ’n, Zoova yoli maan tukpacɛ kun m’ɔ leman ayre’n+ yoli i klun aya’n.
19 I sin’n, kɛ afuɛ klonglo nɲɔn sinnin’n, i tukpacɛ sɔ’n ti’n i klun aya’n fiteli. Yɛ ɔ wunnin i ɲrun lele ɔ fa wuli. Kɛ bé yó i sɛ’n, i nvle’n nunfuɛ’m b’a trɔman sin i dunman nun, kɛ nga i nannan’m be liɛ’n su’n be fa trɔli sin’n sa.+
20 Kɛ ɔ́ yó famiɛn’n, nn ɔ le afuɛ ablasan-nin-nɲɔn (32). Yɛ ɔ dili famiɛn afuɛ mɔcuɛ Zerizalɛmun lɔ. Kɛ ɔ wuli’n, w’a yoman sran fi i ya. Be sieli i Davidi Klɔ’n+ su lɔ, sanngɛ b’a siemɛn i kan be sie famiɛn mun lɔ’n.+
Ja ngua lɔ ndɛ mun
^ Ebr., “be lɛli i i nannan’m be wun lɛ.”
^ Ebr., “i sua’n.”
^ Yɛle kɛ, osu’n nunfuɛ kun.
^ Annzɛ “be nin amuin mun be bo tekle.”
^ Annzɛ “be nin amuin mun boli tekle.”
^ Be flɛ i ekun kɛ Akazia.
