2 Be Ɲoliɛ 22:1-12
22 I sin’n, Zerizalɛmunfuɛ’m be sieli Akazia m’ɔ ti Zoramun i mma’m be nun kaanfuɛ’n famiɛn i osu. Afin kɛ awiefuɛ mun nin Arabu’m be bali nanmue’n nun lɛ’n, be kunnin i wa kpɛnngbɛn’m be kwlaa.+ Kɛ ɔ fin lɛ’n, Zoramun i wa Akazia yoli Zida lɔ famiɛn.+
2 Kɛ Akazia káci famiɛn’n, nn ɔ le afuɛ ablaɔn-nin-nɲɔn (22). Ɔ dili famiɛn afuɛ kun Zerizalɛmun lɛ. Be flɛ i nin’n kɛ Atali.+ Ɔmri+ i anunman-ɔn.*
3 Ɔ niannin Akabu i awlofuɛ’m be ajalɛ’n su nantili.+ Afin i nin’n mɛnnin i afɔtuɛ tɛtɛ.
4 Ɔ yoli sa ng’ɔ ti tɛ Zoova ɲrun’n titi, kɛ Akabu i awlofuɛ’m be fa yoli’n sa. Afin kɛ i si wuli’n, be yɛ be yoli i afɔtuɛ manfuɛ-ɔ. Ɔ maan i bo w’a guaman kpa w’a mɛnmɛn i.
5 Ɔ fali be afɔtuɛ’n su, kpɛkun ɔ nin Akabu m’ɔ ti Izraɛli famiɛn’n i wa Zoramun be ɔli naan be nin Azaɛli+ m’ɔ ti Siri famiɛn’n bé kún alɛ Ramɔtu-Galaadi+ lɔ. Kɛ be ɔli’n, ta tofuɛ’m be yoli Zoramun i like yaya.
6 Zoramun sɛli i sin Zizreɛli+ lɔ naan ɔ́ kó yó i wun ayre. Afin kɛ ɔ nin Azaɛli m’ɔ ti Siri famiɛn’n+ bé kún alɛ Rama lɔ’n, be yoli i like yaya.
Zoramun i wa Akazia*+ m’ɔ ti Zida famiɛn’n ɔli Zizreɛli lɔ naan ɔ́ kó nían Akabu i wa Zoramun+ i osu, afin be yoli i like yaya.*+
7 Kɛ Akazia ɔli Zoramun i wun lɔ’n, Ɲanmiɛn yoli maan i liɛ’n wieli. Kɛ ɔ juli lɔ’n, ɔ nin Zoramun be ɔli Nimisi i anunman* nga be flɛ i kɛ Zei’n+ i wun wunlɛ. Zoova kpali Zei sɔ’n naan ɔ nunnun Akabu i awlofuɛ’m be sekeseke.+
8 Kɛ Zei boli jɔlɛ nga Ɲanmiɛn dili Akabu i awlofuɛ mun’n i nuan su sa yolɛ bo’n, ɔ ko toli Zida lɔ sran dandan mun, nin Akazia i niaan’m be mma mɔ be di junman man Akazia’n. Kpɛkun ɔ kunnin be.+
9 I sin’n, ɔ ko kunndɛli Akazia. Kɛ bé trɛ́ i’n, nn ɔ fia Samari lɔ. Be fɛ i blɛli Zei. Be kunnin i, kpɛkun be sieli i.+ Afin be seli kɛ: “Zozafati m’ɔ tuli i klun suli Zoova’n,+ i anunman-ɔn.” Akazia i awlo’n nun sran fi w’a kwlá sieman nvle’n kun.
10 Kɛ Atali+ m’ɔ ti Akazia i nin’n wunnin kɛ i wa’n w’a wu’n, ɔ kunnin be kwlaa nga be kwla di Zida lɔ famiɛn’n i aja’n.*+
11 Sanngɛ famiɛn’n i wa bla Zosabeati fali Akazia i wa Zoasi,+ ɔ wuɛli i famiɛn’n i mma ng’ɔ fata kɛ be kun be’n, be nun. Kpɛkun ɔ fɛli i nin bla ng’ɔ niɛn i su’n ko fiali sua ba kun nun. Zosabeati sɔ m’ɔ ti Famiɛn Zoramun i wa bla’n,+ (Zoyada+ m’ɔ ti Ɲanmiɛn ɲrun jranfuɛ’n i yi-ɔ, yɛ Akazia i niaan bla-ɔ) ɔ fɛ i fiali Atali i ɲrun, ɔ maan w’a kwlá kunmɛn i.+
12 Ba’n kali be wun lɛ afuɛ nsiɛn. Ɲanmiɛn Kpli i sua’n nun lɔ yɛ be fɛ i fiali-ɔ. Kɛ ɔ́ yó sɔ’n, nn Atali yɛ ɔ sie nvle’n niɔn.
Ja ngua lɔ ndɛ mun
^ Ebr., “i wa bla-ɔ.”
^ Ebre nun fluwa wie’m be nun’n, be klɛli i kɛ “Azaria.”
^ Annzɛ “i wunnɛn’n yo i ya.”
^ Ebr., “i wa.”
^ Ebr., “famiɛn diwlɛ’n nun ba’m be kwlaa.”
