2 Be Ɲoliɛ 23:1-21
23 I afuɛ nso su’n, Zoyada fali ajalɛ yakpa su. Kpɛkun ɔ nin sran ya su kpɛn mun+ be trali aenguɛ. Be yɛle Zeroamun i wa Azaria, nin Zoanan i wa Ismaɛli, nin Obɛdi i wa Azaria, nin Adaya i wa Maazeya, ɔ nin Zikri i wa Elisafati.
2 I sin’n, be sinsinnin Zida nvle wunmuan’n nun, kpɛkun be yiali Levifuɛ+ nga be o Zida klɔ’m be kwlakwla be su’n ɔ nin Izraɛli awlobo kpɛn mun. Kɛ be bali Zerizalɛmun lɛ’n,
3 be kwlaa nga be yiali’n, be nin famiɛn’n be trali aenguɛ+ Ɲanmiɛn Kpli i sua’n nun lɛ. I sin’n ɔ seli be kɛ:
“Amun nian! Kɛ nga Zoova fa kɛnnin i Davidi i mma’m be su’n sa’n, famiɛn i wa’n wá yó famiɛn.+
4 Like ng’ɔ fata kɛ amun yo’n yɛ: Ɲanmiɛn ɲrun jranfuɛ mun nin Levifuɛ nga bé bá junman dilɛ+ Wunmiɛn-lolɛ-cɛn’n nun’n, amun bubu be nun akpasua nsan. Maan akpasua kun nian anuan’m be su.+
5 Maan akpasua kun ekun jran famiɛn’n i sua’n i ɲrun lɛ.+ Yɛ maan akpasua nsan su’n jran Zesɔdu* Anuan’n nun lɛ. Kpɛkun maan sran’m be kwlakwla be ka Zoova i sua’n i awlo klun’m be nun.+
6 Nán amun yaci sran fi nun naan ɔ wlu Zoova i sua’n nun. Saan Ɲanmiɛn ɲrun jranfuɛ mun nin Levifuɛ nga be di junman lɔ’n, be ngunmin cɛ yɛ be kwla wlu lɔ-ɔ.+ Afin be liɛ’n, be ti Ɲanmiɛn liɛ klonglo. Yɛ sran’m be kwlakwla bé yó like nga Zoova waan be yo’n.
7 Maan Levifuɛ’m be bo sin yia famiɛn’n, maan alɛ kunlɛ ninnge’m be tran be tinuntinun be sa nun. Sran kwlaa ng’ɔ wlu sua’n nun’n, maan be kun i. Lika kwlaa nga famiɛn’n kɔ́’n,* amun su i su.”
8 Levifuɛ mun nin Zidafuɛ’m be kwlakwla be niannin like nga Zoyada m’ɔ ti Ɲanmiɛn ɲrun jranfuɛ’n waan be yo’n su sɛsɛsɛ be yoli. Be tinuntinun be fali be sran nga be di junman Wunmiɛn-lolɛ-cɛn’n nun’n nin be nga be diman junman Wunmiɛn-lolɛ-cɛn’n nun’n.+ Afin Ɲanmiɛn ɲrun jranfuɛ Zoyada w’a kplinman su kɛ akpasua+ wie fi yaci junman’n i dilɛ.
9 I sin’n, Ɲanmiɛn ɲrun jranfuɛ Zoyada fali Famiɛn Davidi i cua mun, nin i ɲrɛn kanngan mun, nin i ɲrɛn kukluuklu+ nga be o Ɲanmiɛn Kpli i sua’n nun’n+ fa mannin sran ya su kpɛn mun.+
10 Kpɛkun ɔ fali sran’m be kwlaa jranjrannin sua’n i fama su lele fa juli sua’n i bɛ su. Alɛ kunlɛ ninnge’m be o be tinuntinun be sa nun. Be jranjrannin tɛ yiwlɛ’n, nin famiɛn sua’n be wun lɛ, yɛ be bo sin yiali famiɛn’n.
11 I sin’n, be fali famiɛn’n i wa’n+ fiteli. Kpɛkun be fali famiɛn kle’n wlɛli i ti, be fali Lalofuɛ’n*+ sieli i ti’n su,* yɛ be sieli i famiɛn. Zoyada nin i mma’m be guɛli i ti su ngo. Yɛ be seli kɛ: “Maan wie’n wla fi famiɛn’n nin-o!”+
12 Kɛ Atali tili sran mɔ be su wanndi’n be ngan’n ɔ nin manmanlɛ nga be su manman famiɛn’n, ɔ ka lɛ ɔli nvlefuɛ’m be wun lɔ, Zoova i sua’n nun lɔ.+
13 I sin’n, Atali nían-ɔn, famiɛn’n jin sua’n i ja mlomlo’n* i wun lɛ, anuan’n nun lɛ. Nvle’n nun sran dandan mun+ nin awɛ bofuɛ’m be o famiɛn’n i wun lɛ. Nvle’n nun sran’m be kwlaa be di aklunjɔɛ,+ yɛ be bo awɛ. Kɛ sran’m bé tó jue’n, jue tofuɛ mɔ miziki bolɛ ninnge o be sa nun’n, be yɛ be dun mmua be ɲrun-ɔn. Kɛ Atali wunnin i sɔ’n, ɔ titili i wun tralɛ’m be nun, kpɛkun ɔ kpan seli kɛ: “B’a cici min wun ndɛ-o! B’a cici min wun ndɛ-o!”
14 Sanngɛ Zoyada m’ɔ ti Ɲanmiɛn ɲrun jranfuɛ’n fali sran ya su kpɛn mun fiteli. Sran sɔ mun yɛ be nian sonja’m be su-ɔ. Kpɛkun ɔ seli be kɛ: “Amun yi bla sɔ’n sran’m be nun fite. Sran kwlaa ng’ɔ su i su’n, amun fa tokofi be kun i!” Afin Ɲanmiɛn ɲrun jranfuɛ’n seli kɛ: “Nán amun kun i Zoova i sua’n nun.”
15 Yɛ sran’m be trali bla’n niɔn. Kɛ be juli famiɛn’n i sua’n i anuan nga be flɛ i kɛ Nnɛn Kpanngɔ Anuan’n i nun lɛ’n, be ka lɛ be kunnin i.
16 I sin’n, Zoyada yoli maan i bɔbɔ nin nvlefuɛ mun ɔ nin famiɛn’n be trali aenguɛ. Be tali nda kɛ bé yó Zoova i nvle titi.+
17 I sin’n, sran’m be kwlakwla be ɔli Baali i sua’n nun lɔ kpɛkun be bubuli i.+ Be bubuli i tɛ yiwlɛ mun nin i nzɔliɛ ninnge mun.+ Be kunnin Matan m’ɔ ti Baali i ɲrun jranfuɛ’n+ tɛ yiwlɛ’m be ɲrun lɛ.
18 Kpɛkun Zoyada fali Zoova i sua’n i su nianlɛ’n wlɛli i Ɲanmiɛn ɲrun jranfuɛ mun nin Levifuɛ’m be sa nun. Be yɛ Davidi bubuli be nun akpasuaakpasua naan be nian Zoova i sua’n su, naan be yi tɛ nga kɛ bé yí’n be yra nnɛn’n i kɔlikɔli’n be man Zoova+ kɛ nga be fa klɛli i Moizi Mmla’n+ nun sa’n niɔn. Kɛ Davidi mán be junman sɔ’n, i waan be di i aklunjɔɛ su naan be to jue.
19 Ɔ fali anuan sunianfuɛ mun+ siesieli i Zoova i sua’n i anuan’m be nun lɛ. Ɔ yoli sɔ naan sran ng’ɔ timan sanwun’n, w’a kwlá wluman lɔ mlɔnmlɔn.
20 Ɔ fali sran ya su kpɛn mun,+ nin be nga be le ɲrun mun, nin nvle’n i siefuɛ mun, nin nvle’n nun sran’m be kwlaa naan be fa famiɛn’n Zoova i sua’n nun lɛ be wɔ famiɛn’n i sua’n nun lɔ. Be sinnin nglo lɔ anuan’n nun yɛ be ɔli-ɔ. Kɛ be juli lɔ’n, be fali famiɛn’n ko trɛnnin i famiɛn bia’n su.+
21 I sɔ’n ti’n, nvle’n nunfuɛ’m be kwlaa be dili aklunjɔɛ, yɛ klɔ’n nun tɔli fɔuun. Afin be fali tokofi be kunnin Atali.
Ja ngua lɔ ndɛ mun
^ Ebre nun’n, “Zesɔdu’n” i bo’n yɛ: “Like Bo Ase Wlalɛ.”
^ Ebr., “sɛ ɔ wlu’n yɛ sɛ ɔ fite’n.”
^ Annzɛ “be fali Mmla fluwa kun mɛnnin i.”
^ Atrɛkpa’n, fluwa kun mɔ Ɲanmiɛn i Mmla’n klɛ su’n i ndɛ yɛ be kan-ɔn.
^ Ebr., “i sua ja mlomlo’n.”
