2 Be Ɲoliɛ 24:1-27
24 Kɛ Zoasi káci famiɛn’n, nn ɔ le afuɛ nso.+ Ɔ dili famiɛn afuɛ ablanan (40) Zerizalɛmun lɔ. Be flɛ i nin’n kɛ Zibia, ɔ fin Beɛ-Seba.+
2 Ɲanmiɛn ɲrun jranfuɛ Zoyada i blɛ su’n,+ Zoasi yoli sa ng’ɔ ti kpa Zoova ɲrun’n titi.
3 Zoyada jali bla nɲɔn mannin Zoasi. Yɛ ɔ wuli ba yasua mun nin ba bla mun.
4 Kɛ ɔ yoli sɔ’n, Zoasi kunndɛli kɛ ɔ́ síesíe Zoova i sua’n i ye.+
5 I sɔ’n ti’n, ɔ yiayiali Ɲanmiɛn ɲrun jranfuɛ mun nin Levifuɛ mun naan w’a se be kɛ: “Amun wɔ Zida klɔ’m be su naan Izraɛlifuɛ’m be kwlaa be yi sika naan amun fa siesie amun Ɲanmiɛn’n i sua’n i ye+ afuɛ kwlakwla. Amun yo i ndɛndɛ.” Sanngɛ Levifuɛ’m be cuɛncuɛnnin be ja ase.+
6 I sɔ’n ti’n, famiɛn’n flɛli Zoyada m’ɔ ti Ɲanmiɛn ɲrun jranfuɛ’m be su kpɛn’n naan w’a se i kɛ:+ “?Ngue ti yɛ w’a seman Levifuɛ’m be kɛ be wɔ Zida nin Zerizalɛmun naan be ko fa lapo nga Moizi m’ɔ ti Zoova i sufuɛ’n waan be tua man Ɲanmiɛn’n+ niɔn? Ɔ fata kɛ Izraɛlifuɛ’m be kwlaa be tua lapo sɔ’n. Ɔ ti Aenguɛ’n* i tannin sua’n i liɛ.+
7 Afin Atali,+ bla klunwifuɛ sɔ’n, i mma’m be wluli Ɲanmiɛn Kpli i sua’n nun lɔ.+ Kpɛkun be fali ninnge kwlaa nga be o Zoova i sua’n nun lɔ mɔ be ti i liɛ klonglo’n, be fa ko sɔli Baali.”
8 I sin’n, famiɛn’n maan be yoli sika guawlɛ kun.+ Be fa sieli i gua su lɔ, Zoova i sua’n i anuan’n nun lɛ.+
9 Kpɛkun be boli ndolo sinnin Zida nin Zerizalɛmun wunmuan’n nun naan sran’m be fa lapo+ nga Moizi m’ɔ ti Ɲanmiɛn Kpli i sufuɛ’n seli Izraɛlifuɛ’m be kɛ be tua’n, be blɛ Zoova. I nun nga Moizi mán mmla sɔ’n, nn be o aawlɛ flɛnnɛn’n nun lɔ.
10 Sran dandan mun nin nvlefuɛ’m be kwlakwla be klun jɔli.+ Be fali like nga be waan bé mán’n bali. Be fa guɛli i sika guawlɛ’n nun lele ɔ yili piɛ.*
11 Kɛ Levifuɛ’m be fa sika guawlɛ’n be kɔ naan be fa man famiɛn’n, mɔ be wun kɛ sika kpanngban kpa o nun’n, famiɛn’n i fluwa klɛfuɛ’n ɔ nin Ɲanmiɛn ɲrun jranfuɛ’m be su kpɛn’n i janunfuɛ’n be ba. Kpɛkun be yi sika ng’ɔ o nun’n.+ I sin’n, be fa sika guawlɛ’n ko sie i osu’n nun. Be yoli i sɔ cɛn kwlakwla lele be ɲannin sika kpanngban kpa.
12 Famiɛn’n nin Zoyada be fa sika sɔ’n be wlɛ i be nga be nian Zoova i sua’n nun junman’n su’n be sa nun. Yɛ be fa tua yɔbuɛ sɛfuɛ mun nin ajuin difuɛ’m be kalɛ naan be siesie Zoova i sua’n i ye.+ Asa ekun’n, be fa tua be nga be yo aaba nin blalɛ ninnge mun’n be kalɛ naan be siesie Zoova i sua’n i lika ng’ɔ sacili’n i ye.
13 Be nga be nian junman’n su’n, be yoli maan junman’n boli i bo. Yɛ sua’n i ye siesielɛ’n ɔli i ɲrun klanman. Be yoli maan Ɲanmiɛn Kpli i sua’n yoli kpa kɛ laa’n sa. Yɛ be yoli maan ɔ jrannin cinnjinnjin kpa.
14 Kɛ be wieli junman’n i di cɛ’n, be fali sika onga’n ko mannin famiɛn’n nin Zoyada. Be kusu, be fali sika sɔ’n fa yoli ninnge wie mun naan be fa sie i Zoova i sua’n nun. Ninnge sɔ mun yɛ: Ninnge nga be fa di junman’n nin nga be fa yi tɛ’n, nin klowa mun, yɛ sika nin sika ɔkwlɛ ninnge mun.+ I nun mɔ Zoyada i ɲin te o su’n, be yili tɛ nga kɛ bé yí’n be yra nnɛn’n i kɔlikɔli’n+ tititi Zoova i sua’n nun.
15 Zoyada yoli oke kɛsɛkɛsɛ. Ɔ dili ye lele naan w’a wu. Kɛ ɔ́ wú’n, nn ɔ le afuɛ ya kun ablasan (130).
16 Be sieli i Davidi Klɔ’n su lɔ, famiɛn’m be wun lɛ.+ Afin Ɲanmiɛn Kpli i sulɛ’n nun’n nin Ɲanmiɛn sua’n i kplanlɛ’n nun’n, ɔ yoli sa kpakpa mun Izraɛli lɔ.+
17 Kɛ Zoyada wuli’n, Zida lɔ sran dandan’m be bali be wa utuli be ɲin ase famiɛn’n i bo. Famiɛn’n kusu sieli i su be nuan bo.
18 B’a nianman Zoova m’ɔ ti be nannan’m be Ɲanmiɛn’n i sua’n i lika kun. Yɛ be ko sɔli waka nga sran’m be sɔ be’n,* nin amuin mun. Be sa tɛ’n ti’n, Ɲanmiɛn fali Zidafuɛ mun nin Zerizalɛmunfuɛ’m be wun ya.
19 Ɔ sunmɛnnin i nuan ijɔfuɛ mun be sin titi naan be sa be sin Zoova wun. Be kannin ndɛ kleli be titi, sanngɛ b’a sieman be su.+
20 Ɲanmiɛn wawɛ’n jrali Zoyada+ m’ɔ ti Ɲanmiɛn ɲrun jranfuɛ’n i wa Zakari i su. Yɛ ɔ ko jrannin lika kun m’ɔ ti nglonglo’n su naan w’a se nvlefuɛ’m be kɛ: “Ndɛ nga Ɲanmiɛn Kpli kan’n yɛ: ‘?Ngue ti yɛ amun nantiman Zoova i mmla’m be su-ɔ? I bo’n su guaman kpa manman amun! Kɛ mɔ amun kacili amun sin sili Zoova ti’n, i kusu ɔ́ káci i sin sí amun.’”+
21 Sanngɛ be cicili i wun ndɛ,+ kpɛkun famiɛn’n maan be finfinnin i yɔbuɛ Zoova i sua’n i awlo klun’n nun lɛ.+
22 Famiɛn Zoasi i wla fili klolɛ mɔ i si* Zoyada fa kloli i’n su. Ɔ kunnin i wa’n. Kɛ ba sɔ’n wú’n, ɔ seli kɛ: “Maan Zoova wun wɔ, yɛ maan ɔ usa ɔ ndɛ nga nun.”+
23 Kɛ afuɛ’n boli i bo’n, Sirifuɛ’m be sonja’m be bali naan be nin Zoasi bé kún. Be wluli Zida nin Zerizalɛmun lɔ,+ kpɛkun be kunnin nvle’n nun sran dandan’m be kwlaa.+ Be isali ninnge nga be ɲɛnnin i alɛ sɔ’n nun’n ko mannin Damasi lɔ famiɛn’n.
24 Sirifuɛ’m be sonja nga be bali’n b’a sɔnman, sanngɛ Zoova yoli maan be kwlali sonja kpanngban kpa.+ Afin nvlefuɛ’m be kacili be sin sili Zoova m’ɔ ti be nannan’m be Ɲanmiɛn’n. Ɔ maan be* yoli jɔlɛ nga Ɲanmiɛn dili Zoasi’n i nuan su sa.
25 Kɛ Sirifuɛ’m be yacili i lɛ be ɔli’n (kɛ bé yáci i lɛ bé kɔ́’n, nn like yaya kpa w’a yo i*), i bɔbɔ i sufuɛ’m be cicili i wun ndɛ, afin ɔ guali Ɲanmiɛn ɲrun jranfuɛ Zoyada+ i mma’m* be mmoja’n i ase. Be kunnin i i bɔbɔ i bɛ’n su lɛ.+ Kɛ ɔ wuli’n, be sieli i Davidi Klɔ lɔ.+ Sanngɛ b’a siemɛn i kan be sie famiɛn’m be lɔ’n.+
26 Be nga be cicili i wun ndɛ’n+ be yɛ: Simeati m’ɔ ti Amɔn bla’n i wa Zabadi, ɔ nin Simriti m’ɔ ti Moabu bla’n i wa Zozabadi.
27 I mma mun, nin ndɛ kpanngban nga be kɛnnin i i bɔbɔ su’n,+ ɔ nin Ɲanmiɛn Kpli i sua’n i ye siesielɛ’n,*+ be kwlaa be su ndɛ’m be ti klɛwa Famiɛn’m be Fluwa’n nun. Yɛ i wa Amazia sinnin i osu kacili famiɛn-ɔn.
Ja ngua lɔ ndɛ mun
^ Ebr., “Lalofuɛ’n.”
^ Be kwla se ekun kɛ “lele be kwlakwla be mannin like.”
^ Nian Ndɛ’m be bo tulɛ lika’n nun lɔ.
^ Yɛle kɛ, Zakari i si’n.
^ Yɛle kɛ, Sirifuɛ mun.
^ Annzɛ “tukpacɛ kpanngban o i su.”
^ Annzɛ “i wa.” Atrɛkpa’n, kɛ mɔ ba sɔ’n ti sran kpa dan’n, i ti yɛ be klɛli i sɔ-ɔ.
^ Ebr., “i bo ase wlalɛ’n.”
