2 Be Ɲoliɛ 3:1-17
3 I sin’n, Salomɔn boli Zoova i sua’n i kplanlɛ bo+ Zerizalɛmun lɔ, Moria Oka’n su,+ kan Zoova fiteli i si Davidi i ɲrun lɛ’n.+ Lika sɔ’n ti Ɔɔnan m’ɔ ti Zebisifuɛ’n i ble nin ɔɔzu bowlɛ.+ Davidi siesieli lika sɔ’n naan be kplan sua’n i lɛ.
2 Kɛ Salomɔn yoli famiɛn’n, i afuɛ nnan su’n, i anglo nɲɔn su’n, i cɛn ba nɲɔn su’n yɛ be boli sua’n i kplanlɛ bo-ɔ.
3 Ɲanmiɛn Kpli i sua’n i bo ase nga Salomɔn wlali’n i tɛnndɛn nun’n ti kude ablesiɛn (60), yɛ i tɛtrɛ nun’n ti kude ablaɔn (20).+ Laa kude liɛ’n yɛ be fa sunnzunnin-ɔn.*
4 Sua’n i ɲrun lɛ lika ng’ɔ ti fleiin kpa’n i tɛnndɛn nun’n ti kude ablaɔn (20). Ɔ nin sua’n i tɛtrɛ nun’n be sɛ.* I nglonglo su’n ti ya kun ablaɔn (120).* Ɔ fali sika ɔkwlɛ jrɛiin fa katali lika fleiin sɔ’n i klun lɔ talɛ wunmuan’n i wun.+
5 Ɔ fali zenevrie waka fa katali sua ba danfuɛ’n* i talɛ’m be wun. I sin’n, ɔ fali sika ɔkwlɛ jrɛiin fa kɛtɛli i wun.+ Kpɛkun ɔ yoli nglesia waka nin jrɔkɔ’m+ be nzɔliɛ+ talɛ’m be wun.
6 Asa ekun’n, ɔ tatali yɔbuɛ kpakpa mun sua’n i talɛ’m be wun.+ Sika ɔkwlɛ+ ng’ɔ fali’n fin Paavaimun.
7 Ɔ fali sika ɔkwlɛ’n katali sua’n, nin waka mun, nin anuan’m be ɲrun lɛ lika mun, nin talɛ mun, ɔ nin anuan’m be wun.+ Ɔ yoli seribɛn’m be nzɔliɛ talɛ’m be wun.+
8 I sin’n, ɔ yoli Sua Ba Ngunmin Kun m’ɔ ti Ɲanmiɛn liɛ Klonglo’n.+ I tɛnndɛn nun’n nin sua’n i tɛtrɛ nun’n be sɛ. Ɔ ti kude ablaɔn (20). Yɛ i tɛtrɛ nun’n ti kude ablaɔn (20). Ɔ fali sika ɔkwlɛ m’ɔ ti jrɛiin’n talan ya nsiɛn (600)* kɛtɛli i wun.+
9 Sika ɔkwlɛ nga be fa katali kpɛngbɛ’m be wun’n, ɔ ti sikli ablenun (50).* Ɔ fali sika ɔkwlɛ katali sua ba nga be o nglo lɔ’n be talɛ’m be wun.
10 I sin’n, ɔ sɛli waka naan w’a yo seribɛn nɲɔn Sua Ba Ngunmin Kun m’ɔ ti Ɲanmiɛn liɛ Klonglo’n nun. Kpɛkun ɔ fali sika ɔkwlɛ katali be wun.+
11 Seribɛn’m be ndɛwa’m+ be tɛnndɛn nun’n ti kude ablaɔn (20). Seribɛn klikli’n i ndɛwa kun i tɛnndɛn nun’n ti kude nnun, yɛ i ndɛwa sɔ’n kan sua’n i talɛ’n i bue kun. I ndɛwa kunfuɛ’n i tɛnndɛn nun’n ti kude nnun, yɛ ɔ kan seribɛn nɲɔn su’n i ndɛwa kun.
12 Seribɛn nɲɔn su’n i ndɛwa kun i tɛnndɛn nun’n ti kude nnun, yɛ i ndɛwa sɔ’n kan sua’n i talɛ’n i bue kun ekun. I ndɛwa kunfuɛ’n i tɛnndɛn nun’n ti kude nnun, yɛ ɔ kan seribɛn kliklifuɛ’n i ndɛwa kun.
13 Seribɛn sɔ’m be ndɛwa’m be nun ti trɛtrɛwa, yɛ be kwlaa be ti kude ablaɔn (20). Seribɛn’m be jinjin nglo yɛ be ɲin kaci sua’n i klun lɔ.*
14 Asa ekun’n, ɔ fali jese ble, nin tannin ɔkwlɛ kankan, nin jese ɲanman ɔkwlɛ bioun, nin jese ɲanman plilili’n fa yoli rido’n.+ Kpɛkun ɔ yoli seribɛn’m be nzɔliɛ rido sɔ’n su.+
15 I sin’n, ɔ yoli sua ja mlomlo nɲɔn+ sua’n i ɲrun lɛ. Be tɛnndɛn nun’n ti kude ablasan-nin-nnun (35). Yɛ like kukluku ng’ɔ taka sua ja mlomlo nɲɔn sɔ’m be su sɛsɛsɛ’n, i tɛnndɛn nun’n ti kude nnun.+
16 Ɔ yoli jrɔkɔ mun kɛ kɔmin ɲanman wie sa, kpɛkun ɔ sendeli be sua ja mlomlo’m be ti su nglo lɔ. Ɔ yoli ninnge wie mun kɛ grenadie mma mun sa i sɔ ya kun (100), kpɛkun ɔ fa be sieli jrɔkɔ’m be su.
17 Ɔ kplannin sua ja mlomlo sɔ mun Ɲanmiɛn sua’n i ɲrun lɛ, kun o fama su* yɛ kun o bɛ su.* Ɔ tɔnnin fama su liɛ’n i dunman kɛ Zakɛn.* Yɛ ng’ɔ o bɛ su’n, ɔ tɔnnin i dunman kɛ Boazi.*
Ja ngua lɔ ndɛ mun
^ Kɛ be sunnzun like titi’n, kude kun ti santimɛtri 44,5. Sanngɛ sran wie’m be bu i kɛ “laa kude liɛ’n,” yɛle kude tɛnndɛnfuɛ’n. Ɔ ti santimɛtri 51,8.
^ Annzɛ “i tɛtrɛ nun’n ti kude 20.”
^ B’a kleman like nga be fa sunnzunnin’n.
^ Ebr., “sua dan’n.” Atrɛkpa’n, Sua Ba m’ɔ ti Ɲanmiɛn liɛ Klonglo’n i ndɛ yɛ be kan-ɔn.
^ Yɛle kɛ, Sua Ba m’ɔ ti Ɲanmiɛn liɛ Klonglo’n.
^ Annzɛ “ngua lɔ.”
^ Annzɛ “nglo lɔ.”
^ I bo’n yɛ: “Maan Ɔ [ yɛle kɛ, Zoova] yo maan ɔ jran cinnjinnjin.”
^ Atrɛkpa i bo’n yɛ: “Wunmiɛn su.”
