2 Be Ɲoliɛ 4:1-22
4 I sin’n, ɔ fali aaba yoli tɛ yiwlɛ’n.+ I tɛnndɛn nun’n ti kude ablaɔn (20), i tɛtrɛ nun’n ti kude ablaɔn (20), yɛ i nglonglo su’n ti kude blu.
2 Ɔ kloli aaba yoli Jenvie’n.*+ Ɔ ti kukluku. Kpongbo sɔ’n i nuan’n i tɛtrɛ nun’n ti kude blu, yɛ i nglonglo su’n ti kude nnun. Ɲanman ng’ɔ ju kude ablasan’n (30) yɛ ɔ kwla bo sin yiɛ i-ɔ.+
3 Jenvie’n i nuan su tɛɛn’n i bo lɛ’n, be yoli towa wie mun be desɛn.+ Be bo sin yiɛ i. Kude kun su’n be yoli blu, kude kun su’n be yoli blu. Be yoli towa ɲanman nɲɔn, be nin Jenvie’n be sa su kunngba.
4 Ɔ taka nannin tola blu-nin-nɲɔn (12)+ mɔ be yoli be’n be su. Nsan be ɲin kaci nglo lɔ, nsan be ɲin kaci wia atɔliɛ lɔ, nsan ekun be ɲin kaci ngua lɔ, yɛ nsan be ɲin kaci wia afiliɛ lɔ. Kpɛkun Jenvie’n taka be su. Be kwlaa be bo lika’n kaci Jenvie’n i bo lɔ lika’n i afiɛn lɔ.
5 Jenvie’n i kpikplikpi’n ti palmun kun.* Be yoli i nuan su’n kɛ klowa wie i nuan su’n sa, yɛ be yoli i kɛ ijre nga be flɛ i lisi’n i nɲrɛ’n sa. I klun’n kwla ju bati* akpi nsan (3.000).
6 Asa ekun’n, ɔ yoli kpongbo dandan blu. Ɔ sieli nnun fama su, kpɛkun ɔ sieli nnun bɛ su.+ Kɛ bé yí tɛ nga kɛ bé yí’n be yra nnɛn’n i kɔlikɔli’n, ninnge nga be fa be’n, kpongbo dandan sɔ’m be nun nzue’n yɛ be fa wunnzin be wun-ɔn.+ Be nun nzue sɔ’n wie yɛ be fa salo be wun-ɔn. Sanngɛ Jenvie’n i nun nzue’n yɛ Ɲanmiɛn ɲrun jranfuɛ’m be wunnzin-ɔn.+
7 Ɔ fali sika ɔkwlɛ yoli kannin siewlɛ blu+ kɛ nga be kleli i’n sa.+ Kpɛkun ɔ sieli be Ɲanmiɛn sua’n nun lɔ, nnun o fama su, yɛ nnun o bɛ su.+
8 Asa ekun’n, ɔ yoli tabli blu. Ɔ sieli be Ɲanmiɛn sua’n nun lɔ, nnun o fama su, yɛ nnun o bɛ su.+ Kpɛkun ɔ fali sika ɔkwlɛ yoli kpongbo ba ya kun (100).
9 I sin’n, ɔ yoli Ɲanmiɛn ɲrun jranfuɛ’m+ be awlo klun’n,+ nin awlo klun danfuɛ’n,+ nin awlo klun’n i anuan mun. Kpɛkun ɔ fali aaba katali i anuan’m be wun.
10 Ɔ sieli Jenvie’n sua’n i fama su, wia afiliɛ lɔ lika’n nun.+
11 Asa ekun’n, Iramun yoli nzuɛn guawlɛ mun, nin peli mun, ɔ nin kpongbo ba mun.+
Ɔ maan Ɲanmiɛn Kpli i sua’n nun junman nga Famiɛn Salomɔn fa mannin Iramun kɛ ɔ di’n, ɔ wieli i kwlaa di.+ Ninnge ng’ɔ yoli be’n yɛ:
12 Sua ja mlomlo nɲɔn mun,+ nin like kukluuklu kɛ kpongbo ba mun sa mɔ be takataka sua ja mlomlo nɲɔn sɔ’m be ti su’n, nin like nɲɔn mɔ be wafa’n ti kɛ tɛ* sa’n+ mɔ be kata like kukluuklu kɛ kpongbo ba sa mɔ be takataka sua ja mlomlo’m be su’n be wun’n.
13 Ɔ yoli like kɛ grenadie mma sa i sɔ ya nnan (400)+ fa sieli i like nɲɔn mɔ be wafa’n ti kɛ tɛ* sa’n be su. Grenadie mma ɲanman nɲɔn be o kun su, grenadie mma ɲanman nɲɔn be o kun su. Kpɛkun ɔ fa katali like nɲɔn mɔ be ti kɛ kpongbo kukluuklu mun sa mɔ be takataka sua ja mlomlo’m be su’n, be wun.+
14 Ɔ yoli kakaklolo blu, ɔ nin kpongbo dandan blu kakaklolo sɔ’m be su,+
15 nin Jenvie’n, nin nannin tola blu-nin-nɲɔn (12) Jenvie’n i bo lɔ,+
16 nin nzuɛn guawlɛ mun, nin peli mun, nin atiɛ je mun,+ nin ninnge kwlaa nga Iramun-Abi*+ fali aaba nga be yoli i wun treketreke’n yo mannin Famiɛn Salomɔn naan ɔ fa be sie Zoova i sua’n nun’n.
17 Famiɛn’n yoli maan be kpɛli buɛ wie mun asiɛ wun, Zurdɛn asa’n su lɔ, Sukɔtu+ nin Zereda be afiɛn’n nun. Kpɛkun be kloli aaba guɛli i buɛ sɔ’m be nun naan b’a yi ninnge sɔ mun.
18 Salomɔn yoli ninnge kwlaa sɔ mun kpanngban kpa. Be siman aaba nga be fa yoli be’n i nɔnnin’n i nuan.+
19 Salomɔn yoli Ɲanmiɛn Kpli i sua’n nun ninnge’m be kwlaa.+ Ninnge sɔ mun yɛ: Sika ɔkwlɛ tɛ yiwlɛ’n,+ nin tabli+ nga be fa kpanwun nga be fa man Ɲanmiɛn’n be sie be su’n,+
20 nin kannin siewlɛ mun nin be su kannin mɔ be fali sika ɔkwlɛ jrɛiin be yoli be’n.+ Kannin sɔ’m be kpaja sua ba m’ɔ o sua’n i klun mmua lɔ’n i ɲrun lɛ, kɛ nga be kleli be’n sa.
21 Ninnge sɔ’m be wie ekun yɛle waka nɲrɛ mun, nin kannin mun, nin pɛnsi mun, mɔ be ti sika ɔkwlɛ’n, (sika ɔkwlɛ jrɛiin kpafuɛ’n niɔn)
22 nin ninnge nga be ti kɛ sizo sa’n, nin kpongbo ba mun, nin klowa mun, nin sin guawlɛ mun, sika ɔkwlɛ jrɛiin yɛ be fa yoli be-ɔ, ɔ nin sua’n i anuan’n nun’n, nin i klun lɔ Sua Ba Ngunmin Kun m’ɔ ti Ɲanmiɛn liɛ Klonglo’n i anuan mun’n,+ nin Ɲanmiɛn sua’n* i anuan mun, sika ɔkwlɛ yɛ be fa yoli be-ɔ.+
Ja ngua lɔ ndɛ mun
^ Annzɛ “nzue guawlɛ’n.”
^ Annzɛ “lala.”
^ Annzɛ “lala.”
^ Annzɛ “Iramun-Abivi,” be klɛ i dunman’n kɛ ngalɛ’n sa wie.
^ Wa’n, Sua Ba m’ɔ ti Ɲanmiɛn liɛ Klonglo’n i ndɛ yɛ be kan-ɔn.
