2 Famiɛn Mun 12:1-21
12 Kɛ Zei+ kacili famiɛn’n i afuɛ nso su yɛ Zoasi+ kacili famiɛn-ɔn. Ɔ dili famiɛn afuɛ ablanan (40) Zerizalɛmun lɔ. Be flɛ i nin’n kɛ Zibia, ɔ fin Beɛ-Seba.+
2 Blɛ kwlaa nga Zoyada m’ɔ ti Ɲanmiɛn ɲrun jranfuɛ’n kleli Zoasi i like’n, Zoasi yoli sa ng’ɔ ti kpa Zoova ɲrun’n titi.
3 Sanngɛ lika nglonglo’m+ be kali lɛ. Ɔ maan nvlefuɛ’m be yi tɛ lika nglonglo’m be su titi, yɛ be yo maan wunsrɛn fin lika nglonglo’m be su fite.
4 Zoasi seli Ɲanmiɛn ɲrun jranfuɛ’m be kɛ: “An fa sika kwlaa nga be fa ba Zoova i sua’n nun wa’n m’ɔ ti i liɛ klonglo’n:+ Lapo nga sran’m be tinuntinun be tua’n,+ nin sran kun i ti sika nga be man’n, ɔ nin sika kwlaa nga sran’m be klun klo su be fa ba Zoova i sua’n nun’n.+
5 Maan Ɲanmiɛn ɲrun jranfuɛ’m be bɔbɔ be fa sika’n sika manfuɛ’m* be sa nun naan be fa siesie sua’n i lika kwlaa nga w’a saci’n* i ye.”+
6 Sanngɛ kɛ Famiɛn Zoasi kacili famiɛn’n, lele m’ɔ́ fá dí afuɛ ablaɔn-nin-nsan’n (23), nn Ɲanmiɛn ɲrun jranfuɛ’m be nin-a siesieman sua’n i ye.+
7 I sɔ’n ti’n, Famiɛn Zoasi flɛli Zoyada+ m’ɔ ti Ɲanmiɛn ɲrun jranfuɛ’n nin Ɲanmiɛn ɲrun jranfuɛ onga mun, kpɛkun ɔ seli be kɛ: “?Ngue ti yɛ amun nin-a siesieman sua’n i ye-ɔ? Sɛ ɔ ti sɔ’n, nán amun fa sika sika manfuɛ’m be sa nun kun, sɛ kusu amun fa sika’n maan ɔ yo sua’n i ye siesielɛ liɛ.”+
8 Kɛ ɔ yoli sɔ’n, Ɲanmiɛn ɲrun jranfuɛ’m be seli kɛ be su faman sika sran’m be sa nun kun, yɛ be su nianman sua’n i ye siesielɛ junman’n su kun.
9 I sin’n, Zoyada m’ɔ ti Ɲanmiɛn ɲrun jranfuɛ’n fali alaka kun,+ kpɛkun ɔ kpɛli toklo kun i su tre’n nun. Ɔ fali alaka sɔ’n sieli i tɛ yiwlɛ’n i wun lɛ. Kɛ á wlú Zoova i sua’n nun lɔ’n ɔ o ɔ sa fama su. Alaka sɔ’n nun yɛ Ɲanmiɛn ɲrun jranfuɛ nga be nian anuan’m be su’n be fa sika nga sran’m be fa ba Zoova i sua’n nun’n be gua-ɔ.+
10 Kɛ be wun kɛ sika kpanngban kpa o sika guawlɛ nun’n, famiɛn’n i fluwa klɛfuɛ’n, ɔ nin Ɲanmiɛn ɲrun jranfuɛ dan’n be ba be wa fa,* kpɛkun be ka sika nga sran’m be fa bali Zoova i sua’n nun’n.+
11 Kɛ be ko ka sika’n, be fa man be nga be nian junman nga be di i Zoova i sua’n nun lɔ’n su’n. Be kusu be fa sika sɔ’n tannin waka nun junman difuɛ nin sua kplanfuɛ nga be di junman Zoova i sua’n nun lɔ’n,+
12 ɔ nin yɔbuɛ nun junman difuɛ mun nin yɔbuɛ sɛfuɛ’m be kalɛ. Asa ekun’n, be toli waka nin yɔbuɛ nga be sɛli be’n naan bé fá síesíe Zoova i sua’n i ye. Be fali sika’n be dili sua’n i ye siesielɛ junman onga’m be kwlaa.
13 Sanngɛ sika nga be fa bali Zoova i sua’n nun’n, b’a faman wie fi b’a yoman sika kpongbo dandan mun, annzɛ ninnge wie mɔ be ti kɛ sizo sa’n, annzɛ kpongbo ba mun, annzɛ awɛ mun,+ annzɛ like uflɛ wie mɔ be fa sika ɔkwlɛ annzɛ sika be yo mɔ be fa di junman Zoova i sua’n nun lɔ’n.+
14 Be fa sika’n be man be nga be di junman’n be ngunmin, yɛ be kusu be fa siesie Zoova i sua’n i ye.
15 Sran nga be fa sika’n wla be sa nun kɛ be fa man junman difuɛ mun’n, be usaman be sika’n i su ndɛ, afin be ti sran mɔ be kwla lafi be su-ɔ.+
16 Sanngɛ sa tɛ’n i ti kpatalɛ tɛ’n i sika’n,+ ɔ nin sa tɛ’n i ti tɛ’n i sika’n be liɛ’n, be fa kɔman Zoova i sua’n nun lɔ, ɔ ti Ɲanmiɛn ɲrun jranfuɛ’m be liɛ.+
17 Blɛ kunngba sɔ’n nun’n, Azaɛli+ m’ɔ ti Siri famiɛn’n fali alɛ wlali Gatifuɛ’m+ be sin, yɛ ɔ fali klɔ’n. I sin’n, ɔ sunnzunnin kɛ ɔ nin Zerizalɛmunfuɛ’m bé kó kún.+
18 Kɛ ɔ yoli sɔ’n, Famiɛn Zoasi m’ɔ ti Zida famiɛn’n, ɔ fali ninnge kwlaa nga be fa mannin Ɲanmiɛn mɔ be ti i liɛ klonglo mɔ i nannan Zozafati nin Zoramun nin Akazia mɔ be ti Zida famiɛn laa’n be yoli be sanwun’n, ɔ nin ninnge nga i bɔbɔ fa mannin Ɲanmiɛn mɔ be ti Ɲanmiɛn liɛ klonglo’n, nin sika ɔkwlɛ kwlaa ng’ɔ o Zoova i sua’n nin famiɛn’n i sua’n nun lɔ ninnge kpakpa’m be siewlɛ’m be nun’n, kpɛkun ɔ fa ko mannin Azaɛli m’ɔ ti Siri famiɛn’n.+ Ɔ maan Azaɛli cuɛnnin i wun, ɔ nin Zerizalɛmunfuɛ’m b’a kunman alɛ kun.
19 Zoasi i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.
20 Zoasi i sufuɛ’m be cicili i wun ndɛ,+ yɛ be kunnin i Milo Cenjeʼn* i wun lɔ sua’n nun lɔ,+ ɔ o atin ng’ɔ jra kɔ Sila’n su.
21 Zoasi i sufuɛ Zozakaa m’ɔ ti Simeati i wa’n nin Zozabadi m’ɔ ti Somɛɛ i wa’n, be yɛ be tɔli i su be kunnin i-ɔ.+ Be sieli Zoasi nin i nannan mun Davidi Klɔ lɔ. Yɛ i wa Amazia sinnin i osu kacili famiɛn.+
Ja ngua lɔ ndɛ mun
^ Annzɛ “be nga be si be’n.”
^ Annzɛ “talɛ’n i lika nga be ti kpacikpaciwa’n.”
^ Annzɛ “be fa guɛ i bajɛ’m be nun.” Ebr., “be cici.”
^ Annzɛ “Bɛti-Milo.”
