2 Famiɛn Mun 15:1-38
15 Kɛ Zeroboamun* kacili Izraɛli famiɛn’n, i afuɛ ablaɔn-nin-nso (27) su’n, Amazia+ m’ɔ ti Zida famiɛn’n i wa Azaria*+ kacili famiɛn.+
2 Kɛ ɔ́ káci famiɛn’n, nn ɔ le afuɛ blu-nin-nsiɛn (16). Ɔ dili famiɛn afuɛ ablenun-nin-nɲɔn (52) Zerizalɛmun lɛ. Be flɛ i nin’n kɛ Zekolia, ɔ fin Zerizalɛmun.
3 Ɔ yoli sa ng’ɔ ti kpa Zoova ɲrun’n titi kɛ i si Amazia fa yoli’n sa.+
4 Sanngɛ lika nglonglo’m be kali lɛ.+ Ɔ maan nvlefuɛ’m be yi tɛ lika nglonglo’m be su titi, yɛ be yo maan wunsrɛn fin lika nglonglo’m be su fite.+
5 Zoova fali ɲrɛnnɛn yili i famiɛn’n su, ɔ kali kokowefuɛ+ lele ɔ fa wuli. Ɔ trɛnnin i liɛ ngunmin sua kun nun.+ Blɛ sɔ’n nun’n, famiɛn sua’n kɛli i wa Zotamun+ i sa nun, i yɛ ɔ di nvle’n nunfuɛ’m be jɔlɛ-ɔ.+
6 Azaria i su ndɛ’n i onga’n,+ like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.
7 I sin’n, Azaria wuli.*+ Be sieli i i nannan’m be wun lɛ, Davidi Klɔ lɔ. Yɛ i wa Zotamun sinnin i osu kacili famiɛn.
8 Kɛ Azaria+ kacili Zida famiɛn’n, i afuɛ ablasan-nin-mɔcuɛ (38) su’n, Zeroboamun i wa Zakari+ kacili Izraɛli famiɛn Samari lɔ. Ɔ dili famiɛn anglo nsiɛn.
9 Ɔ yoli sa ng’ɔ ti tɛ Zoova ɲrun’n kɛ nga i nannan’m be fa yoli’n sa. W’a yaciman sa tɛ nga Nebati i wa Zeroboamun ti’n Izraɛlifuɛ’m be yoli’n i yolɛ.+
10 I sin’n, Zabɛsi i wa Salɔmun cicili i wun ndɛ, yɛ ɔ kunnin i+ Ibleamun+ lɔ. Kɛ ɔ kunnin i’n, ɔ sinnin i osu kacili famiɛn.
11 Zakari i su ndɛ’n i onga’n, be klɛli be fluwa ng’ɔ kan Izraɛli famiɛn’m be ndɛ’n i nun.
12 Ndɛ nga Zoova kan kleli Zei’n, ɔ kpɛnnin su. Ɔ seli i kɛ: “Ɔ mma’m+ bé trán Izraɛli famiɛn bia’n su lele fá jú be akpasua nnan su’n su.”+ Kɛ ndɛ sɔ’n kpɛnnin su kɛ ngalɛ’n sa.
13 Kɛ Oziasi+ kacili Zida famiɛn’n, i afuɛ ablasan-nin-ngwlan (39) su yɛ Zabɛsi i wa Salɔmun kacili famiɛn-ɔn. Ɔ dili famiɛn anglo klonglo kun Samari lɔ.
14 I sin’n, Gadi i wa Menaɛmun fɛli i Tiiza+ lɛ ɔli Samari, kpɛkun ɔ ko kunnin Zabɛsi i wa Salɔmun+ Samari lɔ. Kɛ ɔ kunnin i’n, ɔ sinnin i osu kacili famiɛn.
15 Salɔmun i su ndɛ’n i onga’n, ɔ nin sran wun ndɛ m’ɔ cicili’n, be klɛli be fluwa ng’ɔ kan Izraɛli famiɛn’m be ndɛ’n i nun.
16 Blɛ sɔ’n nun’n, Menaɛmun fɛli i Tiiza lɛ ko tɔli Tifsa klɔ’n su, ɔ kunnin i nunfuɛ’m be kwlaa ɔ nin be nga be trɛn i wun lɛ lika’m be nun’n. Ɔ yoli sɔ afin klɔ sɔ’n sufuɛ’m b’a tikeman klɔ’n i anuan mun b’a mɛnmɛn i. Ɔ kunnin klɔ’n sufuɛ mun, yɛ bla nga b’a wunnzɛ’n ɔ kpacili be ku’n nun.
17 Kɛ Azaria kacili Zida famiɛn’n, i afuɛ ablasan-nin-ngwlan (39) su’n, Gadi i wa Menaɛmun kacili Izraɛli famiɛn. Ɔ dili famiɛn afuɛ blu Samari lɔ.
18 Ɔ yoli sa ng’ɔ ti tɛ Zoova ɲrun’n titi. W’a yaciman sa tɛ kwlaa nga Nebati i wa Zeroboamun ti’n Izraɛlifuɛ’m be yoli’n i yolɛ,+ lele ɔ fa wuli.
19 Cɛn kun’n, Pili+ m’ɔ ti Asiri famiɛn’n wluli Izraɛli mɛn’n nun. Kpɛkun Menaɛmun mannin Pili i sika talan akpi kun (1.000)* naan ɔ ukɛ i naan i famiɛn dilɛ’n taka kpa.+
20 Kɛ ɔ ko yo naan Menaɛmun w’a kwla ɲan sika sɔ’n, ɔ miannin Izraɛli lɔ sran dandan’m+ be kɛ be tinuntinun be yi sika sikli ablenun (50).* Kpɛkun ɔ fali sika’n mannin Asiri famiɛn’n. Ɔ maan Asiri famiɛn’n sɛli i sin, w’a kaman Izraɛli mɛn’n nun lɛ.
21 Menaɛmun+ i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Izraɛli famiɛn’m be ndɛ’n i nun.
22 I sin’n, Menaɛmun wuli,* yɛ i wa Pekaia sinnin i osu kacili famiɛn.
23 Kɛ Famiɛn Azaria kacili Zida famiɛn’n, i afuɛ ablenun (50) su’n, Menaɛmun i wa Pekaia kacili Izraɛli famiɛn Samari lɔ. Ɔ dili famiɛn afuɛ nɲɔn.
24 Ɔ yoli sa ng’ɔ ti tɛ Zoova ɲrun’n titi. W’a yaciman sa tɛ nga Nebati i wa Zeroboamun ti’n Izraɛlifuɛ’m be yoli’n i yolɛ.+
25 I sin’n, i awlo lɔ sonja nga be flɛ i kɛ Peka’n,+ m’ɔ ti Remalia i wa’n ɔ cicili i wun ndɛ. Kpɛkun ɔ kunnin i Samari lɔ, famiɛn’n i awlo lɔ sua fleiin’n nun. Ɔ kunnin Agɔbu nin Arie be wie. Kɛ ɔ́ kɔ́’n, ɔ fali Galaadi lɔ sran ablenun (50). Kɛ ɔ kunnin i’n, ɔ sinnin i osu kacili famiɛn.
26 Pekaia i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Izraɛli famiɛn’m be ndɛ’n i nun.
27 Kɛ Azaria kacili Zida famiɛn’n, i afuɛ ablenun-nin-nɲɔn (52) su’n, Remalia i wa Peka+ kacili Izraɛli famiɛn Samari lɔ. Ɔ dili famiɛn afuɛ ablaɔn (20).
28 Ɔ yoli sa ng’ɔ ti tɛ Zoova ɲrun’n titi. W’a yaciman sa tɛ nga Nebati i wa Zeroboamun ti’n Izraɛlifuɛ’m be yoli’n i yolɛ.+
29 Peka m’ɔ ti Izraɛli famiɛn’n i blɛ su’n, Tiglati-Pilezɛɛ+ m’ɔ ti Asiri famiɛn’n fali Izɔn nin Abɛli-Bɛti-Maaka,+ nin Zanoa, nin Kedɛsi,+ nin Azɔɔ, nin Galaadi,+ nin Galile, ɔ fali Nɛftali+ mɛn wunmuan’n. Kpɛkun ɔ fali be nga be tran lɔ’n ɔli Asiri.+
30 I sin’n, Ela i wa Oze+ cicili Remalia i wa Peka i wun ndɛ, yɛ ɔ tɔli i su kunnin i-ɔ. Kpɛkun ɔ kacili famiɛn i osu. Kɛ Oziasi i wa Zotamun+ kacili famiɛn’n, i afuɛ ablaɔn (20) su yɛ sa sɔ’n juli-ɔ.
31 Pekaia i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Izraɛli famiɛn’m be ndɛ’n i nun.
32 Kɛ Remalia i wa Peka kacili Izraɛli famiɛn’n, i afuɛ nɲɔn su’n, Famiɛn Oziasi+ m’ɔ ti Zida famiɛn’n i wa Zotamun+ kacili famiɛn.
33 Kɛ ɔ́ káci famiɛn’n, nn ɔ le afuɛ ablaɔn-nin-nnun (25). Ɔ dili famiɛn afuɛ blu-nin-nsiɛn (16) Zerizalɛmun lɔ. Be flɛ i nin’n kɛ Zerisa, Zadɔku i wa-ɔ.+
34 Zotamun yoli sa ng’ɔ ti kpa Zoova ɲrun’n titi kɛ i si Oziasi fa yoli’n sa.+
35 Sanngɛ lika nglonglo’m be kali lɛ. Ɔ maan nvlefuɛ’m be yi tɛ lika nglonglo’m be su titi, yɛ be yo maan wunsrɛn fin lika nglonglo’m be su fite.+ Zotamun yɛ ɔ yoli Zoova i sua’n i nglo lɔ anuan’n niɔn.+
36 Zotamun i su ndɛ’n i onga’n, like ng’ɔ yoli’n, be klɛli be fluwa ng’ɔ kan Zida famiɛn’m be ndɛ’n i nun.
37 Blɛ sɔ’n nun’n, Zoova yoli maan Rezɛn m’ɔ ti Siri famiɛn’n ɔ nin Remalia i wa Peka+ be nin Zidafuɛ’m be kunnin alɛ.+
38 I sin’n, Zotamun wuli,* be sieli i kan be sieli i nannan mun lɔ’n, i nannan Davidi i Klɔ lɔ. Kpɛkun i wa Akazi sinnin i osu kacili famiɛn.
Ja ngua lɔ ndɛ mun
^ Yɛle kɛ, Zeroboamun 2 su’n.
^ I bo’n yɛ: “Zoova ukali.” 2Fa 15:13, nin 2Ɲo 26:1-23, nin Eza 6:1, ɔ nin Zkr 14:5 be nun’n, be flɛ i Oziasi.
^ Ebr., “be lɛli i i nannan’m be wun lɛ.”
^ Ebr., “be lɛli i i nannan’m be wun lɛ.”
^ Ebr., “be lɛli i i nannan’m be wun lɛ.”
