2 Famiɛn Mun 17:1-41
17 Kɛ Akazi kacili Zida famiɛn’n i afuɛ blu-nin-nɲɔn (12) su’n, Ela i wa Oze+ kacili Izraɛli famiɛn Samari lɔ. Ɔ dili famiɛn afuɛ ngwlan.
2 Ɔ yoli sa ng’ɔ ti tɛ Zoova ɲrun’n titi, sanngɛ i sa tɛ liɛ’n w’a juman Izraɛli famiɛn nga be dunnin i ɲrun mmua’n be liɛ’n nun.
3 Asiri famiɛn Salimanazaa fali alɛ wlɛli i sin.+ Ɔ maan Oze kacili i sufuɛ, yɛ ɔ su lapo mɛnnin i.+
4 Sanngɛ cɛn kun’n, Asiri famiɛn’n tili i kɛ Oze w’a cici i wun ndɛ. Afin ɔ sunmannin sran So m’ɔ ti Ezipti famiɛn’n i sin,+ yɛ w’a suman lapo w’a manman Asiri famiɛn’n kɛ ng’ɔ fa yo i afuɛ kwlaa’n sa. Ɔ maan Asiri famiɛn’n trɛli i, ɔ wlɛli i bisua yɛ ɔ cili i bisua lɔ.
5 Asiri famiɛn’n fɛli i sonja mun guɛli i nvle wunmuan’n nun. Be juli Samari, yɛ be boli nanmue klɔ’n i sin lɛ afuɛ nsan.
6 Kɛ Oze kacili famiɛn’n i afuɛ ngwlan su’n, Asiri famiɛn’n fali Samari klɔ’n.+ Ɔ trali Izraɛlifuɛ mun ɔli+ Asiri. Ɔ yoli maan be trannin Ala nin Abɔɔ klɔ’n be su, Gozan nzue ba’n i wun lɛ,+ ɔ nin Medifuɛ’m be klɔ’m+ be su.
7 Sa sɔ’n juli afin Izraɛlifuɛ’m be yoli sa ng’ɔ ti tɛ be Ɲanmiɛn Zoova ɲrun’n. Ɔ fali be Ezipti mɛn’n mɔ Ezipti famiɛn Faraɔn yɛ ɔ ti i siefuɛ’n i nun fiteli.+ Sanngɛ be suli* ɲanmiɛn uflɛ.+
8 Be niannin nvle nga Zoova fuannin be Izraɛlifuɛ’m be ɲrun’n be ayeliɛ’n su, yɛ be niannin Izraɛli famiɛn’m be ayeliɛ’n su.
9 Izraɛlifuɛ’m be yoli sa ng’ɔ ti tɛ be Ɲanmiɛn Zoova ɲrun’n titi. Kɛ ɔ fɛ i sasafuɛ tranwlɛ’m be su lele m’ɔ́ fá jú klɔ nga be sili be wun’n be su’n,* be kplannin lika nglonglo mun be klɔ’m be kwlaa be su.+
10 Be takali yɔbuɛ nga be sɔ be’n nin waka nga be sɔ be’n*+ kpɔlɛ dandan’m be kwlaa be su, ɔ nin waka kwlaa nga be le nɲa kpanngban’n be bo.+
11 Be yi tɛ lika nglonglo’m be kwlaa be su, be yo maan wunsrɛn fite, kɛ nga nvle nga Zoova fuannin be be ɲrun’n be fa yoli’n sa.+ Be yoli sa tɛ titi naan bé fá fɔ́kɔ Zoova i awlɛn.
12 Be sɔli be amuin mɔ be ti like kain’n* titi,+ kusu nn Zoova seli be kɛ nán be yo sɔ.+
13 Zoova sinnin i nuan ijɔfuɛ’m be kwlaa nin be nga be wun aolia nun sa munʼn+ be kwlaa be lika titi seli Zidafuɛ mun nin Izraɛlifuɛ’m be kɛ: “Amun yaci amun ayeliɛ tɛtɛ’n!+ Amun fa ndɛ nga n kan’n su, ɔ nin mmla kwlaa nga n fa mannin amun nannan mun mɔ n sinnin min sufuɛ nga be ti min nuan ijɔfuɛ’n be lika n kan kleli amun’n be su.”
14 Sanngɛ b’a tieman, be yoli ɲin kekle* kɛ be nannan mɔ b’a lafiman be Ɲanmiɛn Zoova su’n sa.+
15 Be kpaloli i nuan ndɛ mun, ɔ nin aenguɛ+ ng’ɔ nin be nannan mun trali’n, ɔ nin afɔtuɛ m’ɔ mannin be’n.+ Kpɛkun be sɔli amuin mɔ be kwlá yoman sa fi ye’n.+ Ɔ maan be kacili kɛ be sa wie.+ I lɛ nun’n be yoli kɛ nvle nga be bo sin yia be mɔ Zoova seli be kɛ nán maan be nian be ayeliɛ’n su’n be sa.+
16 Be yacili be Ɲanmiɛn Zoova i mmla’m be kwlaa be su nantilɛ, be yoli nannin ba nɲɔn,+ be takali waka nga be sɔ be’n*+ be nun kun, kpɛkun be kotoli ɲanmiɛn su lɔ sonja’m be kwlaa be bo,+ yɛ be sɔli Baali.+
17 Asa ekun’n be yrali be mma yasua nin be mma bla mun sin nun,*+ be yili wunnzue,+ be yoli ninnge wie mun naan bé sí be ɲrun lɔ sa mun. Be fali be wun wlali* like ng’ɔ ti tɛ Zoova ɲrun’n i yolɛ nun naan bé fá fɔ́kɔ i awlɛn.
18 I sɔ’n ti’n Zoova fali Izraɛlifuɛ’m be wun ya dan kpa, ɔ maan ɔ yili be i ɲin bo lɛ.+ W’a yaciman be wie fi lɛ, saan Zidafuɛ’m be ngunmin yɛ ɔ yacili be lɛ-ɔ.
19 Zidafuɛ mun bɔbɔ b’a nantiman be Ɲanmiɛn Zoova i mmla’m be su.+ Be fali atin kunngba nga Izraɛlifuɛ’m be fali’n wie.+
20 Zoova yili Izraɛli i mma’m be kwlaa be blo, ɔ guali be ɲin ase, yɛ ɔ fali be wlali be nga be fɛn sran’m be bo ninnge’m be sa nun, lele naan w’a yi be i ɲrun lɛ.
21 Ɔ deli Izraɛlifuɛ mun Davidi i awlo nunfuɛ’m be sa nun, kpɛkun be fali Nebati i wa Zeroboamun be sieli famiɛn.+ Sanngɛ Zeroboamun yoli maan Izraɛlifuɛ’m be yacili Zoova, yɛ i dunman nun ti’n be yoli sa tɛ dan kpa kun.
22 Izraɛlifuɛ’m be yoli sa tɛ kwlaa nga Zeroboamun yoli’n wie.+ B’a yaciman sa tɛ sɔ’m be yolɛ.
23 Be yoli sɔ lele naan Zoova w’a yi be i ɲin bo lɛ, kɛ ng’ɔ kan kleli i sufuɛ nga be ti i nuan ijɔfuɛ’n be kwlaa’n sa.+ Ɔ maan be trali Izraɛlifuɛ mun ɔli Asiri,+ lele nin andɛ be te o lɔ.
24 Asiri famiɛn’n fali sran mun Babilɔnin nin Kutu nin Ava nin Amati nin Sefavaimun+ lɔ bali. Ɔ yoli maan be trannin Samari klɔ’m be su Izraɛlifuɛ’m be osu’n nun. Be fali Samari mɛn’n, be trannin Samari klɔ’m be su.
25 I bo bolɛ nun’n kɛ be wa trannin lɛ’n, be sroman* Zoova. I sɔ’n ti’n, Zoova sunmannin asɔmɔli mun be afiɛn.+ Asɔmɔli’m be kunnin be nun wie mun.
26 Sran wie’m be wa seli Asiri famiɛn’n kɛ: “Nvlefuɛ nga a trali be mɔ a fali be ko sieli Samari lɔ’n, be siman wafa nga be su mɛn sɔ’n nun Ɲanmiɛn’n. Ɔ maan ɔ sunman asɔmɔli mun be afiɛn, yɛ asɔmɔli’m be kun be. Afin be nun wie fi siman wafa nga be su mɛn sɔ’n nun Ɲanmiɛn’n.”
27 Kɛ ɔ yoli sɔ’n Asiri famiɛn’n seli kɛ: “Amun fa Ɲanmiɛn ɲrun jranfuɛ nga amun trali be’n be nun kun, maan ɔ sɛ i sin lɔ naan ɔ kle be wafa ng’ɔ fata kɛ be su mɛn sɔ’n nun Ɲanmiɛn’n.”
28 Ɔ maan Ɲanmiɛn ɲrun jranfuɛ nga be trali be Samari ɔli’n, be nun kun sɛli i sin Betɛli.+ Yɛ ɔ kleli be wafa ng’ɔ fata kɛ be sro* Zoova’n.+
29 Sanngɛ nvle’m be tinuntinun be yoli be ɲanmiɛn liɛ,* yɛ be sieli be lika nglonglo nga Samarifuɛ’m be yoli be’n be su. Nvle sɔ’m be tinuntinun be nunfuɛ’m be yoli sɔ klɔ nga be tran nun’n be su.
30 Ɔ maan Babilɔninfuɛ’m be yoli Sukɔtu-Bɛnɔti, Kitafuɛ’m be yoli Nɛɛgali, yɛ Amatifuɛ’m+ be yoli Asima.
31 Avafuɛ’m be yoli Nibkazi nin Taataki. Sefavaimunfuɛ’m be yra be mma mun sin nun be man Adramelɛki m’ɔ ti Sefavaimunfuɛ’m be ɲanmiɛn’n.+
32 Kannzɛ be sro Zoova’n, sanngɛ be fali sran wie mun nvlefuɛ’m be nun kpɛkun be sieli be Ɲanmiɛn ɲrun jranfuɛ lika nglonglo’m be su. Be di be junman’n sua nga be o lika nglonglo’m be su’n be nun.+
33 Kannzɛ be sro Zoova’n, sanngɛ be suli be bɔbɔ be ɲanmiɛn liɛ mun, kɛ nga be fa yo i nvle nga be fin nun lɔ’n nun sa.+
34 Lele nin andɛ’n be te su be ɲanmiɛn liɛ mun kɛ laa’n sa. Be nun wie fi suman* Zoova, yɛ be nun wie fi nantiman i atin mun, nin i afɔtuɛ mun, nin Mmla’n, nin mmla mɔ Zoova fa mannin Zakɔbu i mma mun’n be su. Zakɔbu yɛ be kacili i dunman kɛ Izraɛli’n niɔn.+
35 Kɛ Zoova nin be trali aenguɛ’n+ ɔ seli be kɛ: “Nán amun sro ɲanmiɛn uflɛ, nán amun koto be bo, nán amun su be, yɛ nán amun yi tɛ man be.+
36 Sanngɛ Zoova m’ɔ fɛli i tinmin’n nin i sa mɔ wunmiɛn o nun’n fa fali amun Ezipti mɛn’n nun fiteli’n,+ i yɛ ɔ fata kɛ amun sro i-ɔ,+ i yɛ ɔ fata kɛ amun koto i bo-ɔ, yɛ i yɛ ɔ fata kɛ amun yi tɛ be mɛn i-ɔ.
37 Atin ng’ɔ kleli amun’n, nin afɔtuɛ, nin Mmla’n, ɔ nin mmla ng’ɔ klɛ mannin amun’n+ i su yɛ ɔ fata kɛ amun nian be nanti sɛsɛsɛ-ɔ, nán amun sro ɲanmiɛn uflɛ.
38 Ɔ fataman kɛ amun wla fi aenguɛ nga e nin amun e trali’n su,+ nán amun sro ɲanmiɛn uflɛ.
39 Sanngɛ amun Ɲanmiɛn Zoova yɛ ɔ fata kɛ amun sro i-ɔ, afin i yɛ ɔ́ wá dé amun amun kpɔfuɛ’m be kwlaa be sa nun-ɔn.”
40 Sanngɛ b’a faman su, be suli be ɲanmiɛn liɛ mun titi kɛ laa’n sa.+
41 Ɔ maan nvle sɔ’m be sroli Zoova,+ sanngɛ kusu be sɔli amuin mɔ be bɔbɔ be sɛli be’n. Be mma mun, nin be anunman’m be kusu be yoli kɛ be nannan mun sa. Lele nin andɛ’n, be te yo sɔ.
Ja ngua lɔ ndɛ mun
^ Ebr., “sroli.”
^ Yɛle kɛ, “lika kwlakwla, i klɔ nga sran’m b’a sɔnman su’n nin-o, i nga sran’m be sɔnnin su’n nin-o.”
^ Nian Ndɛ’m be bo tulɛ lika’n nun lɔ.
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Ebr., “be keteli be kɔmin.”
^ Nian Ndɛ’m be bo tulɛ lika’n nun lɔ.
^ Ebr., “be fa be sinnin sin’n nun.”
^ Ebr., “be yoli be wun atɛ.”
^ Annzɛ “be suman.”
^ Ebr., “be su.”
^ Annzɛ “be ɲanmiɛn liɛ mun.”
^ Ebr., “sroman.”
