2 Famiɛn Mun 21:1-26
21 Kɛ Manase+ káci famiɛn’n, nn ɔ le afuɛ blu-nin-nɲɔn (12). Ɔ dili famiɛn afuɛ ablenun-nin-nnun (55) Zerizalɛmun lɔ.+ Be flɛ i nin’n kɛ Ɛfziba.
2 Ɔ yoli sa ng’ɔ ti tɛ Zoova ɲrun’n. I lɛ nun’n, nvle nga Zoova kannin be bo Izraɛlifuɛ’m be ɲrun’n be tete ninnge nga be yo’n,+ i wie yɛ ɔ yoli-ɔ.+
3 Ɔ kplannin lika nglonglo nga i si Ezekiasi bubuli be’n be uflɛ.+ Ɔ takali tɛ yiwlɛ mun mannin Baali. Ɔ takali waka nga be sɔ be’n*+ be nun kun, kɛ nga Akazi m’ɔ ti Izraɛli famiɛn’n fa yoli’n sa.+ Kpɛkun ɔ kotoli ɲanmiɛn su lɔ sonja’m be kwlaa be bo, yɛ ɔ sɔli be.+
4 Asa ekun’n, ɔ kplannin tɛ yiwlɛ mun Zoova i sua’n nun lɔ.+ Kusu nn Zoova kannin sua sɔ’n i ndɛ seli kɛ: “Zerizalɛmun wa yɛ min dunman’n trán-ɔn.”+
5 Ɔ kplannin tɛ yiwlɛ mun Zoova i sua’n i awlo klun nɲɔn’m+ be nun fa mannin ɲanmiɛn su lɔ sonja’m be kwlaa.+
6 Ɔ yrɛli i bɔbɔ i klun ba’n sin nun.* Ɔ yili atrɛ, ɔ yoli ninnge wie mun naan ɔ́ sí i ɲrun lɔ sa mun,+ kpɛkun ɔ sieli sran wie mun kɛ be nin be nga be wuli’n be ijɔ, yɛ ɔ sieli wie mun ekun naan be yi wunnzue.+ Ɔ yoli sa ng’ɔ ti tɛ Zoova ɲrun’n tratrali su naan ɔ́ fá fɔ́kɔ i awlɛn.
7 Ɔ fali amuin’n, yɛle kɛ waka nga be sɔ i*+ mɔ i bɔbɔ yoli’n, ɔ ko sieli i Ɲanmiɛn sua’n nun lɔ. Kusu nn Zoova kannin sua sɔ’n i ndɛ kleli Davidi nin i wa Salomɔn. Ɔ seli kɛ: “Ń fá min dunman’n ń síe i sua nga nun nin Zerizalɛmun klɔ mɔ n fɛli i Izraɛli akpasua’m be kwlaa be nun’n i nun tititi.+
8 Sɛ Izraɛlifuɛ’m be yo like kwlaa nga n seli be kɛ be yo’n, sɛ be di Mmla kwlaa nga min sufuɛ Moizi seli be kɛ be di su’n i su’n,+ n su faman be n kɔman mɛn nga n fa mannin be nannan mun’n+ i wun mmua kun le naan be wlan daan.”
9 Sanngɛ b’a tieman. Manase fali be sieli atin tɛ su, ɔ yoli maan be yoli sa tɛ dan trali nvle nga Zoova nunnunnin be Izraɛlifuɛ’m be ɲrun’n.+
10 Zoova sinnin i sufuɛ nga be ti i nuan ijɔfuɛ’n be lika kannin ndɛ titi.+ Ɔ seli be kɛ:
11 “Manase m’ɔ ti Zida famiɛn’n yoli tete sa nga’m be kwlaa. Ɔ yoli sa tɛ dan trali Amɔɔfuɛ+ nga be dunnin mmua i ɲrun’n.+ I amuin mɔ be ti like kain’n* be ti’n Zida yoli sa tɛ.
12 I sɔ’n ti’n ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Ń má fá ɲrɛnnɛn ń yí i Zerizalɛmun+ nin Zida be su. Ɲrɛnnɛn sɔ’n i dan m’ɔ́ yó’n ti’n, sran kwlaa ng’ɔ ti nun’n i nuan bó i wun.+
13 Ɲanman nga n fa sunnzunnin+ Samari klɔ’n,+ ń má tínngɛ nun Zerizalɛmun klɔ’n su. Kɛ n sunnzunnin Akabu i awlo’n+ n juli lɛ’n, lɛ yɛ ń súnnzun Zerizalɛmun liɛ’n ń jú-ɔ. Ń má núnnún Zerizalɛmun klɔ’n nun kɛ nga be fa nunnun kpongbo ba kun nun yɛiin mɔ be utu i ɲin ase’n sa.+
14 Min nvlefuɛ nga bé ká lɛ’n,+ ń yí min sa be su, ń fá be wlá be kpɔfuɛ’m be sa nun, bé fɛ́n be bo ninnge mun yɛ bé trá be kɔ́.+
15 Afin kɛ be nannan’m be fin Ezipti lɔ fiteli lele m’ɔ́ fá jú andɛ’n, be yoli sa ng’ɔ ti tɛ min ɲrun’n, yɛ be fɔkɔli min awlɛn titi.’”+
16 Manase guali be mɔ b’a yoman sa’n be mmoja’n i ase dan. Kɛ ɔ fɛ i Zerizalɛmun klɔ’n i bue kun su lele m’ɔ́ fá jú i bue uflɛ su lɔ’n, be mmoja’n yili klɔ’n.+ Ɔ yoli sɔ fa ukali sa tɛ nga i dunman nun ti’n Zidafuɛ’m be yoli’n su. Yɛle kɛ ɔ yoli maan be yoli sa ng’ɔ ti tɛ Zoova ɲrun’n.
17 Manase i su ndɛ’n i onga’n, like kwlaa ng’ɔ yoli be’n, nin sa tɛtɛ ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.
18 I sin’n, Manase wuli,* be sieli i fie ng’ɔ o i sua’n i wun lɛ’n nun lɔ, Uza i fie’n nun.+ Yɛ i wa Amɔn sinnin i osu kacili famiɛn-ɔn.
19 Kɛ Amɔn+ káci famiɛn’n, nn ɔ le afuɛ ablaɔn-nin-nɲɔn (22). Ɔ dili famiɛn afuɛ nɲɔn Zerizalɛmun lɔ.+ Be flɛ i nin’n kɛ Mesulemɛti, ɔ ti Arizi m’ɔ fin Zɔtuba’n i wa bla.
20 Ɔ yoli sa ng’ɔ ti tɛ Zoova ɲrun’n titi, kɛ i si Manase fa yoli’n sa.+
21 Ɔ fali atin kwlaa nga i si fali’n su titi. Ɔ sɔli amuin mɔ be ti like kain’n mɔ i si sɔli be’n be wie, yɛ ɔ kotoli be bo.+
22 Ɔ yacili Zoova m’ɔ ti i nannan’m be Ɲanmiɛn’n, w’a nantiman Zoova i atin’n su.+
23 Kasiɛn su’n, Amɔn i sufuɛ’m be cicili i wun ndɛ, kpɛkun be kunnin i i bɔbɔ i sua’n nun lɔ.
24 Sanngɛ nvle’n nunfuɛ’m be kunnin be kwlaa nga be cicili Famiɛn Amɔn i wun ndɛ’n. Kpɛkun be sieli i wa Zoziasi famiɛn i osu.+
25 Amɔn i su ndɛ’n i onga’n, like ng’ɔ yoli’n, be klɛli be fluwa ng’ɔ kan Zida famiɛn’m be ndɛ’n i nun.
26 Be sieli i i asieliɛ ng’ɔ o Uza i fie’n+ nun lɔ’n nun. Yɛ i wa Zoziasi+ sinnin i osu kacili famiɛn-ɔn.
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Ebr., “ɔ fɛli i sinnin sin’n nun.”
^ Nian Ndɛ’m be bo tulɛ lika’n nun lɔ.
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Ebr., “be lɛli i i nannan’m be wun lɛ.”
