2 Famiɛn Mun 7:1-20
7 Elize seli kɛ: “Amun tie ndɛ nga Zoova kan’n. Ndɛ nga Zoova kan’n yɛ: ‘Ainman dɔ kɛ nga sa su’n, Samari klɔ’n i anuan’n nun’n,* sanmlɛn mlɛnnɛnnɛn kpa sea kun* i gua’n yó sikli kun,* yɛ ɔɔzu sea nɲɔn i gua’n yó sikli kun.’”+
2 Yɛ famiɛn’n i awlo lɔ sonja ng’ɔ lafi i su’n seli Ɲanmiɛn Kpli i sran’n kɛ: “?Kannzɛ bɔbɔ Zoova tike ɲanmiɛn su lɔ’n muaan’n, ndɛ sɔ’n kwla kpɛn su?”+ Yɛ Ɲanmiɛn Kpli i sran’n seli kɛ: “Ɔ ɲinma wún i,+ sanngɛ a su diman wie.”+
3 Kokowefuɛ nnan be o klɔ’n i anuan’n nun lɛ.+ Be seli be wiengu kɛ: “?Ngue ti yɛ é trán wa lele é wú-ɔ?
4 Sɛ e se kɛ maan e wlu klɔ’n nun lɔ’n, kɛ mɔ awe’n wo lɔ’n ti’n,+ é wú lɔ. Sɛ e tran wa kusu’n, é wú. I sɔ’n ti’n maan e wɔ Sirifuɛ’m be nanmue’n nun lɔ. Sɛ be yaci e nguan nun’n, é ká nguan nun. Sɛ kusu be kun e’n, nn i-ɔ.”
5 Nnɔsua nun’n, kɛ lika’n wá sán’n be jasoli naan bé kó wlú Sirifuɛ’m be nanmue’n nun lɔ. Kɛ be juli Sirifuɛ’m be nanmue’n i nuan lɛ’n, b’a wunman sran fi lɔ.
6 Afin Zoova yoli maan Sirifuɛ’m be tili alɛ kunlɛ kakaklolo mun nin nnɛn kpanngɔ mun ɔ nin sonja kpanngban kpa be ngan.+ Ɔ maan be seli be wiengu kɛ: “An nian! Izraɛli famiɛn’n w’a ko yia Ɛti famiɛn mun nin Ezipti famiɛn mun naan be nin e wa kun alɛ!”
7 Be ka lɛ jasoli naan b’a wanndi nnɔsua sɔ’n nun. Be yacili be tannin sua mun nin be nnɛn kpanngɔ mun nin be aflunmun mun, ɔ nin nanmue wunmuan’n i lɛ cɛ, kpɛkun be wanndili naan b’a wuman.
8 Kɛ kokowefuɛ’m be juli nanmue’n i nuan lɛ’n, be wluli tannin sua kun nun, be dili like yɛ be nɔnnin nzue. Be fali sika nin sika ɔkwlɛ, ɔ nin tralɛ mun, kpɛkun be fa be ko fiali. I sin’n be bali ekun, yɛ be wluli tannin sua uflɛ nun, be fali ninnge nga be o lɔ’n, kpɛkun be fa ko fiali.
9 I agualiɛ su’n be seli be wiengu kɛ: “Like nga e su yo i yɛ’n timan kpa. Andɛ cɛn liɛ’n ti aklunjɔɛ cɛn! Sɛ e sisi e bo naan lika’n cɛn’n, bé tú e fɔ. I sɔ’n ti’n maan e wɔ e ko kan kle famiɛn’n i awlofuɛ mun.”
10 Ɔ maan be ɔli, kpɛkun be kpan flɛli klɔ’n i anuan’n i sunianfuɛ mun. Be seli be kɛ: “E ɔli Sirifuɛ’m be nanmue’n nun lɔ, sanngɛ sran fi nunman lɔ, y’a timan sran fi ngan. Nnɛn kpanngɔ mun nin aflunmun mɔ be ti minndawa’n, ɔ nin tannin sua mɔ be yacili be lɛ’n, be ngunmin yɛ be o lɔ-ɔ.”
11 Anuan sunianfuɛ’m be ka lɛ kpannin, yɛ be ko kannin ndɛ sɔ’n kleli famiɛn’n i awlofuɛ mun.
12 Famiɛn’n ka lɛ jasoli kɔnguɛ yɛ ɔ seli i sufuɛ’m be kɛ: “Maan n kan ajalɛ nga Sirifuɛ’m b’a fɛ i e wun’n i ndɛ n kle amun. Be si kɛ awe kun e,+ ɔ maan be jasoli nanmue’n nun be ko fiali blo lɔ. Be seli be wun kɛ: ‘Bé wá fín klɔ’n nun fíte, kpɛkun é trá be, yɛ é wlú klɔ’n nun.’”+
13 I sin’n, i sufuɛ’m be nun kun seli kɛ: “Yaci, maan sran wie’m be fa nnɛn kpanngɔ nga b’a ka klɔ’n nun’n be nun nnun. Nian, sɛ sa ɲan be’n, ɔ su yoman tɛ traman Izraɛlifuɛ onga nga be kali wa’n be liɛ’n. Bé wú kɛ nga Izraɛlifuɛ nga be kali wa’n sa Maan e sunman be naan be ko nian.”
14 Ɔ maan be fali kakaklolo nɲɔn, ɔ nin nnɛn kpanngɔ mun, kpɛkun famiɛn’n sunmannin be Sirifuɛ’m be nanmue’n nun lɔ. Ɔ seli kɛ: “Amun wɔ naan amun ko nian.”
15 Be suli be su lele be juli Zurdɛn’n su lɔ. Kɛ bé kɔ́’n, tralɛ nin ninnge mun be tru atin’n nun. Kɛ Sirifuɛ’m be wawɛ tɔli blo mɔ bé wánndi’n yɛ be guali ninnge sɔ’m be blo-ɔ. Be nga be sunmannin be’n be sali be sin be wa kannin ndɛ’n kleli famiɛn’n.
16 Nvlefuɛ’m be ɔli be ko fɛnnin Sirifuɛ’m be nanmue’n nun ninnge mun. Ɔ maan sanmlɛn mlɛnnɛnnɛn kpa sea kun’n i gua’n yoli sikli kun, yɛ ɔɔzu sea nɲɔn i gua’n yoli sikli kun, kɛ nga Zoova fa kannin’n sa.+
17 Famiɛn’n sieli i awlo lɔ sonja ng’ɔ lafi i su kpa’n kɛ ɔ nian klɔ’n i anuan’n su. Sanngɛ sran’m be tiɛtiɛli i su anuan’n nun lɛ. Ɔ maan ɔ wuli, kɛ nga kɛ famiɛn’n ko wunnin Ɲanmiɛn i sran’n i wun’n, ɔ kan kleli i’n sa.
18 Ndɛ nga Ɲanmiɛn Kpli i sran’n kan kleli famiɛn’n, ɔ kpɛnnin su sɛsɛsɛ. Ɔ seli kɛ: “Ainman dɔ kɛ nga sa su’n, Samari klɔ’n i anuan’n nun’n, ɔɔzu sea nɲɔn i gua’n yó sikli kun, yɛ sanmlɛn mlɛnnɛnnɛn kpa sea kun i gua’n yó sikli kun.”+
19 Sanngɛ famiɛn’n i awlo lɔ sonja’n seli Ɲanmiɛn Kpli i sran’n kɛ: “?Kannzɛ bɔbɔ Zoova tike ɲanmiɛn su lɔ’n muaan’n, ndɛ sɔ’n kwla kpɛn su?” Yɛ Elize seli kɛ: “Ɔ ɲinma wún i, sanngɛ a su diman wie.”
20 Sa sɔ’n juli i su, afin nvlefuɛ’m be tiɛtiɛli i su anuan’n nun lɛ. Ɔ maan ɔ wuli.
Ja ngua lɔ ndɛ mun
^ Annzɛ “gua’m be bo’n.”
