Fluwa nɲɔn su nga Pɔlu klɛli Korɛntifuɛ mun’n 6:1-18
6 Kɛ mɔ e nin i e di junman’n ti’n,+ e kusu é srɛ́ amun kpa kɛ ye nga Ɲanmiɛn maan amun ɲɛnnin i’n, nán maan ɔ yo ngbɛn.+
2 Afin Ɲanmiɛn seli kɛ: “Blɛ ng’ɔ ti kpa’n nun’n, n tili ɔ nuan ndɛ’n, yɛ delɛ cɛn’n nun’n, n ukali wɔ.”+ An nian! Blɛ kpa sɔ’n i nun yɛ e o yɛ. Delɛ cɛn sɔ’n i nun yɛ e o yɛ.
3 E yoman like fi m’ɔ kwla yi sran ase-ɔ, kɛ ɔ ko yo naan sran’m b’a kanman Ɲanmiɛn junman nga e di’n i ndɛ tɛ’n ti.+
4 Sanngɛ sa kwlaa nun’n, e fa e wun e kle kɛ e ti Ɲanmiɛn i junman difuɛ.+ Yɛle kɛ kɛ ɲrɛnnɛn fanunfanun’m be tɔ e su’n, kɛ e sa mian’n, kɛ sa kekleekle’m be tɔ e su’n, yɛ kɛ e wun e ɲrun’n, e jran kekle.+
5 Be bo e, be wla e bisua,+ be yo e kpokokpoko. Cɛn wie’n kɔnguɛ e lafiman, cɛn wie’n e la awe.+
6 Asa ekun’n, fiɛn kaan sa nunman e wun, e wun sa wlɛ, e tra e awlɛn,+ e yo sran’m be ye,+ Ɲanmiɛn wawɛ’n sie e, e kloman sran e nuan bui su,+
7 e di nanwlɛ, e fa e wla e guɛ i Ɲanmiɛn i tinmin’n su,+ sa nuan su sɛsɛ yolɛ’n i alɛ ninnge’m+ be o e sa nun. Kun o e sa fama’n nun,* kun o e sa bɛ’n nun.*
8 Wie’m be yi e ayɛ, wie’m be gua e ɲin ase. Wie’m be kan e wun ndɛ kpa, wie’m be kan e wun ndɛ tɛ. Be waan e ti sran lakafuɛ, kusu nn e ti nanwlɛfuɛ.
9 Be waan be siman e, kusu nn be si e kpa. Be waan y’a wie wu,* kusu nn e ɲin o su.+ Be tu e fɔ, sanngɛ e wuman.+
10 Be waan e wla w’a bo e wun, sanngɛ e klun ti jɔwa. Be waan e ti yalɛfuɛ, sanngɛ e yo maan sran kpanngban be kaci aɲanbeunfuɛ. Be waan like fi nunman e sa nun, sanngɛ ninnge kwlaa ti sin yia e.+
11 Korɛntifuɛ mun, y’a fiaman ndɛ fi su amun wun. Sɛ é kwlá sé’n, e trɛli e awlɛn’n nun.
12 E mannin amun tranwlɛ e awlɛn’n nun,+ sanngɛ amun liɛ’n, amun a manman e tranwlɛ amun awlɛn’n nun.
13 I sɔ’n ti’n, ń kán ndɛ yɛ’n ń klé amun kɛ min klun ba yɛle amun sa. Maan amun nin e tran kɛ nga e nin amun e fa tran’n sa. Maan amun kusu amun trɛ amun awlɛn’n nun wie.+
14 Nán amun nin be nga be lafiman e Min’n i ndɛ’n su’n, be san nun.+ ?Afin sran kpa nin sran tɛ be san nun-ɔn, ɔ yo ye?+ ?Annzɛ wia’n nin aosin’n, be kwla tran likawlɛ?+
15 ?Asa kusu’n, Klisi nin Beliali* be bo kwla yo kun?+ ?Annzɛ kusu sran ng’ɔ fa e Min’n i ndɛ’n su’n nin sran ng’ɔ faman su’n, be kwla ti be wun aniɛn?+
16 ?Yɛ ngue ti yɛ amuin’m bé kó trán Ɲanmiɛn sua’n nun yɛ?+ Afin e ti kɛ Ɲanmiɛn m’ɔ lafiman’n i sua sa.+ I sɔ yɛ Ɲanmiɛn bɔbɔ kannin-ɔn. Ɔ seli kɛ: “Ń trán be afiɛn,+ yɛ e nin be é nánti. Ń yó be Ɲanmiɛn, yɛ be kusu bé yó min sran.”+
17 Zoova* waan: “‘I sɔ’n ti’n, amun jaso be afiɛn, yɛ nán amun fa amun wun mantan be.’ ‘Nán amun kan fiɛn kun mlɔnmlɔn.’”+ “‘Yɛ ń sɔ́ amun nun.’”+
18 “‘Ń káci amun si,+ yɛ amun kusu amún káci min wa yasua nin min wa bla,’+ Zoova* m’ɔ Kwla Like Kwlaa Yo’n yɛ ɔ kan sɔ-ɔ.”
Ja ngua lɔ ndɛ mun
^ Atrɛkpa’n ɔ ti alɛ kunlɛ liɛ.
^ Atrɛkpa’n ɔ ti be wun sasalɛ liɛ.
^ Annzɛ “be waan e nin kunlɛ fata.”
^ Ndɛ sɔ’n fin Ebre nun ndɛ kun. I bo’n yɛle “Finfinfuɛ.” Satan i ndɛ yɛ be kan-ɔn.
