Fluwa nɲɔn su nga Piɛli klɛli’n 3:1-18
-
Be nga be yo ninnge nga be ti kpa’n be finfin’n, be buman mɛn’n i nunnunlɛ’n i akunndan (1-7)
-
Like nga Zoova seli kɛ ɔ́ yó’n, ɔ cuɛncuɛnmɛn i ja ase i yolɛ’n nun (8-10)
-
An bu sran wafa ng’ɔ fata kɛ amun yo’n i akunndan (11-16)
-
Ɲanmiɛn su uflɛuflɛ kun nin asiɛ uflɛuflɛ kun (13)
-
-
An nian amun wun su naan amun a mlinman (17, 18)
3 Min sran kpa mun, fluwa’n i nɲɔn su mɔ ń klɛ́ ń blɛ́ amun’n yɛ. Kɛ n fa yoli i fluwa klikli nga n klɛli’n nun’n sa’n, ń kpɛ́n amun wla+ kɛ an bu sa sin titi.
2 Yɛle kɛ nán amun wla fi ndɛ nga Ɲanmiɛn nuan ijɔfuɛ’m be kannin be laa’n* be su. Yɛ nán amun wla fi e Min’n m’ɔ ti e Defuɛ’n i ndɛ ng’ɔ fa wlali amun akoto’m be nuan mɔ be kannin’n su.
3 Ɔ fata kɛ amun si kɛ mɛn’n i awieliɛ blɛ’n nun’n, sran wie’m bé wá bá, yɛ bé yó ninnge nga be ti kpa’n be finfin. Yɛ bé yó be bɔbɔ be klunklo sa,+
4 kpɛkun bé sé kɛ: “?B’a seman kɛ ɔ o lɛ?* ?Yɛ ɔ o nin?+ Afin kɛ ɔ fin cɛn mɔ e nannan’m be wuli’n lele m’ɔ́ fá jú andɛ yɛ’n, ninnge’m be kwlaa be te o be osu kunngba’n nun kɛ i nun nga bé yí mɛn’n sa.”+
5 Sanngɛ sa kun o lɛ’n, be ɲinfu be kloman kɛ bé bú i akunndan. Sa sɔ’n yɛle kɛ lalafuɛ nun’n, ɲanmiɛn su lɔ’n wo lɛ. Yɛ Ɲanmiɛn i ndɛ m’ɔ kannin’n ti’n, asiɛ’n fin nzue’n nun fiteli, kpɛkun ɔ jrannin cinnjinnjin nzue’n i afiɛn.+
6 Yɛ ninnge sɔ’m be ti’n, blɛ sɔ’n nun mɛn liɛ’n nunnunnin. Afin nzue’n yili, kpɛkun ɔ katali mɛn sɔ’n su.+
7 Ɲanmiɛn i ndɛ kunngba sɔ’n ti’n, be sieli ɲanmiɛn nin asiɛ’n mɔ be o lɛ andɛ’n be kɛ sin di be. Yɛ bé síe be lɛ lele fá jú cɛn nga bé wá bú be mɔ be ɲin yiman Ɲanmiɛn’n be fɔ’n, mɔ bé núnnún be’n.+
8 Sanngɛ min sran kpa mun, nán amun wla fi ndɛ yɛ’n su. Yɛle kɛ Zoova* ɲrun’n, afuɛ akpi (1.000) ti cɛn ba kun. Yɛ cɛn ba kun ti afuɛ akpi (1.000).+
9 Like nga Zoova* seli kɛ ɔ́ yó’n, ɔ cuɛncuɛnmɛn i ja ase i yolɛ’n nun+ kɛ sran wie’m be bu i’n sa. Sanngɛ ɔ trɛ i awlɛn amun wun, afin ɔ kunndɛman kɛ sran kun sa nunnun. Sanngɛ ɔ kunndɛ kɛ sran kwlaa kaci i akunndan’n.+
10 Zoova* i cɛn’n+ ɔ́ bá kɛ awiefuɛ sa.+ Cɛn sɔ’n nun’n, ɲanmiɛn su lɔ’n tú lɛ.+ Kɛ ɔ́ yó sɔ’n ɔ́ kplá wuu, kpɛkun ninnge nga bé ló kpa’n, bé kló. Yɛ bé yí asiɛ’n nin i su ninnge’n kwlaa be nglo.+
11 Kɛ mɔ ninnge sɔ’m be kwlaa be su tranman lɛ kun’n ti’n, an bu sran wafa ng’ɔ fata kɛ amun yo’n i akunndan naan an yo ninnge nga Ɲanmiɛn klo be’n, yɛ an yo ninnge nga be kle kɛ amun a fa amun wun b’a mantan Ɲanmiɛn kpa’n.
12 Kɛ amún yó sɔ’n, maan amun tran minndɛ Zoova* i cɛn m’ɔ́ wá bá’n,+ yɛ maan amun ɲin tran cɛn sɔ’n su kpa.* Cɛn sɔ’n nun’n, sin dí ɲanmiɛn su lɔ’n,+ yɛ ninnge nga be loli dan’n, bé kló.
13 Sanngɛ kɛ m’ɔ tali nda’n ti’n, e su minndɛ ɲanmiɛn su uflɛuflɛ kun nin asiɛ uflɛuflɛ kun,+ yɛ bé yó sa kpa be su.+
14 I sɔ’n ti’n, min sran kpa mun, kɛ mɔ amun su minndɛ ninnge sɔ mun’n, maan amun mian amun ɲin kpa naan ɔ wun kɛ fiɛn kaan sa nunman amun wun naan amun nzuɛn’n timan tɛ. Yɛ maan ɔ wun kɛ amun nin i be di anuansɛ.+
15 Asa ekun’n, maan amun wun i wlɛ kɛ amun ti ɲanlɛ ti yɛ e Min’n trɛ i awlɛn amun wun-ɔn. Ndɛ kunngba’n yɛ Pɔlu m’ɔ ti e niaan kpa’n ɔ klɛ blɛli amun-ɔn. Ɲanmiɛn yɛ ɔ mɛnnin i ngwlɛlɛ yɛ ɔ klɛli ndɛ sɔ’n niɔn.+
16 Ɔ kannin ninnge sɔ’m be ndɛ i fluwa’m be kwlaa be nun. Sanngɛ be nun wie’m be wlɛ wunlɛ ti kekle. I sɔ’n ti’n, be nga be siman sa’n,* ɔ nin be nga be akunndan’n ti nɲɔnnɲɔn’n be kpɛ ndɛ sɔ’m be wun kɛ nga be fa kpɛ Ɲanmiɛn Ndɛ onga’n i wun’n sa. I sɔ mɔ be yo’n ti’n, bé núnnún.
17 I sɔ’n ti’n, min sran kpa mun, kɛ mɔ amun si sa sɔ mun laa’n ti’n, an nian amun wun su naan amun nin be b’a mlinman. I liɛ’n, sran sɔ mɔ be nantiman mmla’n su’n be ato like nga be kle’n su faman amun siemɛn i atin tɛ su, yɛ amun su yaciman kekle jranlɛ.+
18 Maan Zezi Klisi m’ɔ ti e Min nin e Defuɛ’n, ɔ yo amun ye titi, yɛ maan amun si i kpa titi. Maan aɲrunɲan’n yo i liɛ blɛ nga nun, yɛ maan ɔ yo i liɛ tititi. Maan ɔ yo sɔ.
Ja ngua lɔ ndɛ mun
^ Annzɛ “sa nga be kannin be ndɛ kɛ bé wá jú’n.”
^ Glɛki nun: paruzia. Nian Ndɛ’m be bo tulɛ lika’n nun lɔ.
^ Glk., “an mian amun ɲin yo maan ɔ ju ndɛndɛ.”
^ Annzɛ “b’a kleman be like’n.”
