2 Samiɛli 10:1-19
-
Ɔ kwlali Amɔnfuɛ mun nin Sirifuɛ mun (1-19)
10 Kɛ i osu cɛli kan’n, Amɔnfuɛ’m+ be famiɛn’n wa wuli. Kpɛkun i wa Anun sinnin i osu kacili famiɛn.+
2 Yɛ Davidi seli kɛ: “Ń má yí i nglo kɛ n klo Nasasi i wa Anun kɛ nga i si fa yili i nglo kɛ ɔ klo min’n sa.” Ɔ maan Davidi sunmɛnnin i sran mun naan be ko fɔnvɔ i, i si m’ɔ wuli’n ti. Sanngɛ kɛ Davidi i sufuɛ’m be juli Amɔnfuɛ’m be mɛn’n nun lɔ’n,
3 Amɔnfuɛ’m be sran dandan’m be seli Anun m’ɔ ti be min’n kɛ: “?A bu i kɛ ɔ si i sran bulɛ ti yɛ Davidi sunmannin sran naan be wa fɔnvɔ wɔ-ɔ? E klɔ’n i nun niannianlɛ nin i kpla nianlɛ, ɔ nin i utulɛ ti yɛ ɔ sunmɛnnin i sufuɛ mun ɔ wun wa-ɔ.”
4 Yɛ Anun trali Davidi i sufuɛ mun-ɔn. Ɔ yili be akanza’n i bue kun,+ yɛ ɔ kpɛkpɛli be wun tralɛ’n i lika ng’ɔ kata be bondrɛ’n su’n. Kpɛkun ɔ kannin be bo.
5 Kɛ Davidi tili’n, ɔ sunmannin sran ndɛndɛ naan be ko kpa be atin, afin be guali be ɲin ase tɛtɛ kpa. Famiɛn’n seli be kɛ: “Amun ka Zeriko lɛ.+ Maan amun akanza’n fu ka naan amun a ba.”
6 I sin’n, Amɔnfuɛ’m be wunnin i wlɛ kɛ b’a fɔkɔ Davidi i awlɛn dan. I sɔ’n ti’n, be sunmannin sran naan be ko yiayia Sirifuɛ nga be o Bɛti-Reɔbu+ nin Zoba+ lɔ’n be sonja akpiakpi ablaɔn (20.000) mɔ be kun alɛ be ja nun’n, ɔ nin Maaka+ lɔ famiɛn’n nin i sonja akpi kun (1.000), ɔ nin Isitɔbufuɛ’m* be sonja akpiakpi blu-nin-nɲɔn (12.000).+ Be mannin be sika naan be wa uka be.
7 Kɛ Davidi tili i sɔ’n, ɔ sunmannin Zoabu nin sonja’m be kwlaa naan be nin be ko kun. Safuɲrɛn mun bɔbɔ be ɔli wie.+
8 Yɛ Amɔnfuɛ’m be fiteli-ɔ. Be ko jranjrannin klɔ’n i anuan’n nun lɛ sɛsɛsɛ naan bé kún alɛ. Kɛ ɔ́ yó sɔ’n, nn Sirifuɛ nga be fin Bɛti-Reɔbu nin Zoba’n, be nin Isitɔbufuɛ mun,* ɔ nin Maakafuɛ’m be o be liɛ blo lɔ lika gbawun kun nun.
9 Kɛ Zoabu wunnin kɛ be nga be bɛ i su naan be nin bé kún’n, be nun wie’m be fin i ɲrun lɔ, yɛ wie’m be fin i sin lɔ’n, ɔ kpali Izraɛli safuɲrɛn’m be nun wie mun. Kpɛkun ɔ siesieli be sɛsɛsɛ naan be nin Sirifuɛ’m be kun.+
10 Yɛ ɔ yacili sonja onga mun i niaan bian Abisai+ i sa nun naan ɔ siesie be sɛsɛsɛ naan be nin Amɔnfuɛ’m+ be kun.
11 Kpɛkun ɔ seli i kɛ: “Sɛ Sirifuɛ’m be sa su ti min’n, bla wa uka min. Sɛ kusu Amɔnfuɛ’m be sa su ti wɔ’n, ń kó úka wɔ.
12 Maan e jran kekle, yɛ e yo yakpafuɛ+ naan e kpli e nvle’n nunfuɛ mun nin e Ɲanmiɛn’n i klɔ’m be ti. Yɛ Zoova kusu, i liɛ ng’ɔ klo kɛ ɔ́ yó’n, ɔ́ wá yó.”+
13 Zoabu nin i sonja’m be wunngeli lɔ naan be nin Sirifuɛ’m bé kún. Sanngɛ Sirifuɛ’m be wanndili i bo.+
14 Kɛ Amɔnfuɛ’m be wunnin kɛ Sirifuɛ’m be wanndili’n, be kusu be wanndili Abisai i bo, kpɛkun be wluli klɔ’n i klun lɔ. I sin’n, Zoabu jasoli Amɔnfuɛ’m be mɛn’n nun lɛ naan w’a sɛ i sin Zerizalɛmun.
15 Kɛ Sirifuɛ’m be wunnin kɛ Izraɛlifuɛ’m b’a kwla be’n, be yiayiali be sonja mun ekun.+
16 Kpɛkun Adadezɛɛ+ sunmannin sran naan be ko yia Sirifuɛ nga be o kan Nzue’n* sin lɔ’n.+ Yɛ be bali Elamun lɛ-ɔ. Sobaki m’ɔ ti Adadezɛɛ i sonja’m be su kpɛn’n yɛ ɔ dun be ɲrun mmua-ɔ.
17 Kɛ be kan kleli Davidi’n, ɔ yiayiali Izraɛlifuɛ’m be kwlaa ndɛndɛ. Yɛ ɔ kpɛli Zurdɛn’n, kpɛkun ɔ ɔli Elamun. Sirifuɛ’m be kusu be siesieli be sonja mun naan be nin Davidi be yia nun. Kpɛkun be nin i kunnin.+
18 Sanngɛ Sirifuɛ’m be wanndili Izraɛlifuɛ’m be bo. Davidi kunnin kakaklolo su fufuɛ ya nso (700), nin nnɛn kpanngɔ su fufuɛ akpiakpi ablanan (40.000). Asa ekun’n, ɔ kunnin Sobaki m’ɔ ti be sonja’m be su kpɛn’n.+
19 Kɛ famiɛn nga be su Adadezɛɛ’n be kwlaa be wunnin kɛ Izraɛlifuɛ’m b’a kwla be’n, be nin Izraɛlifuɛ’m be siesieli be afiɛn ndɛndɛ. Kpɛkun be kacili be sufuɛ.+ Kɛ ɔ yoli sɔ’n, Sirifuɛ’m b’a ko ukaman Amɔnfuɛ’m be kun mlɔnmlɔnmlɔn, afin srɛ kun be.
