2 Samiɛli 13:1-39
13 Davidi i wa Absalɔmun i niaan bla kun o lɛ’n, ɔ ti klanman kpa. Be flɛ i kɛ Tamaa.+ Yɛ Davidi i wa Amnɔn+ klo i dan.
2 I sɔ’n ti’n, Amnɔn i wla guaman ase. Ɔ maan ɔ tɔli i ti tukpacɛ. Afin i niaan bla Tamaa sɔ’n nin-a siman bian, yɛ Amnɔn kusu wunman wafa ng’ɔ́ yó naan w’a fɛ i wun w’a mɛntɛn i’n.
3 Sanngɛ Amnɔn i janvuɛ kun o lɛ’n, be flɛ i kɛ Zonadabu.+ Davidi i niaan bian Simea+ i wa-ɔ. Yɛ ɔ si gblɛ kpɛ kpa.
4 Cɛn kun’n, ɔ seli Amnɔn kɛ: “Famiɛn’n i wa yɛle wɔ. ?Ɔ maan ngue ti yɛ nglɛmun kwlaa’n, ɔ ɲrun ti mlanwa sɔ-ɔ? ?Sɛ ndɛ wie o lɛ’n, ngue ti yɛ a kan kleman min-ɔn?” Yɛ Amnɔn tɛli i su kɛ: “N klo min niaan bian Absalɔmun i niaan bla+ Tamaa dan.”
5 Zonadabu tɛli i su kɛ: “Nian, la ɔ bɛ’n su naan yo kɛ a kwlaman nun sa. Kɛ ɔ si wá nían ɔ osu’n, se i kɛ: ‘Yaci, maan min niaan bla Tamaa bla naan ɔ tɔn like kan man min. Maan ɔ wa tɔn aliɛ nga be tɔn man tukpacifuɛ mun’n* min ɲrun wa naan n di.’”
6 Yɛ Amnɔn lali-ɔ. Ɔ yoli i wun kɛ ɔ kwlaman nun sa. Kɛ famiɛn’n bɛli i osu nianlɛ’n, Amnɔn seli i kɛ: “Yaci, maan min niaan bla Tamaa wa tɔn gato* nɲɔn min ɲrun wa, naan ɔ fa man min maan n di.”
7 Yɛ Davidi sunmannin sran awlo lɔ naan be se Tamaa kɛ: “Yaci, kɔ ɔ niaan bian Amnɔn i sua lɔ naan ko tɔn like* mɛn i.”
8 Tamaa ɔli i niaan bian Amnɔn i sua lɔ, kan ɔ la lɔ’n. Ɔ fali sanmlɛn, ɔ fɔtɔli i Amnɔn i ɲrun lɛ, kpɛkun ɔ fa tɔnnin gato’n.
9 I sin’n, ɔ yili gato’n mɛnnin i. Sanngɛ Amnɔn waan ɔ diman. Ɔ seli kɛ: “Maan sran’m be kwlaa be fite.” Yɛ be kwlaa be fiteli-ɔ.
10 Amnɔn seli Tamaa kɛ: “Fa aliɛ’n* bla sua ba’n nun wa, naan fa man min maan n di.” Tamaa fali gato* m’ɔ tɔnnin’n, ɔ ko fa mɛnnin i niaan bian Amnɔn sua ba’n nun lɔ.
11 Kɛ ɔ fa mɛnnin i kɛ ɔ di’n, yɛ ɔ trɛli i-ɔ. Kpɛkun ɔ seli i kɛ: “Min niaan bla, bla maan e la.”
12 Sanngɛ Tamaa seli i kɛ: “Min niaan bian, nán yo sɔ! Nán kuakua min. Be nin-a yomɛn i sɔ like’n Izraɛli nvle’n nun le.+ Nán yo i sɔ ɲannzuɛn sa liɛ’n.+
13 ?Ń fɛ́ i sɔ ɲannzuɛn liɛ’n ń kɔ́ nin? Ɔ bɔbɔ kusu, sran’m bé bú wɔ finfinfuɛ wie Izraɛli nvle’n nun. I sɔ’n ti’n, yaci, kan kle famiɛn’n. Nian, ɔ su seman kɛ ɔ faman min manman wɔ.”
14 Sanngɛ w’a fɛmɛn i su w’a tieman. Ɔ trɛli i wunmiɛn su, kpɛkun ɔ kuɛkuɛli i. Yɛle kɛ ɔ nin i be lali kekle nun.
15 Kɛ ɔ yoli sɔ’n, kpɔlɛ nga Amnɔn wa kpɔli Tamaa’n, ɔ yoli dan trali klolɛ nga i bɔbɔ waan ɔ klo i’n. Amnɔn seli i kɛ: “Jaso naan kɔ ɔ ɲrun!”
16 Sanngɛ ɔ tɛli i su kɛ: “Min niaan bian, nán yo sɔ. Sɛ a fuan min’n, nn sa tɛ nga w’a yo i siɛn’n ɔ tra nga a fa yoli min’n.” Sanngɛ Amnɔn w’a siemɛn i su naan se kɛ ɔ́ tíe.
17 Ɔ flɛli i gbanflɛn’n naan w’a se i kɛ: “Fuan bla nga naan ɔ jaso min ɲin bo wa, naan to anuan’n nun.”
18 (Kɛ ɔ́ yó sɔ’n, nn tralɛ klanman* kun o Tamaa wun. Tralɛ sɔ’n i wie yɛ famiɛn’n i wa bla nga be nin-a siman bian’n be wla-ɔ.) I gbanflɛn’n fɛ i fiteli, kpɛkun ɔ toli anuan’n nun.
19 Tamaa fali nzuɛn guɛli i ti’n su.+ Ɔ titili tralɛ klanman ng’ɔ wlɛ i wun’n nun. Kpɛkun ɔ fɛli i sa guɛli i ti yɛ ɔ tɔli sunlɛ wun-ɔn. Kɛ ɔ́ kɔ́’n, nn ɔ́ kpán.
20 I niaan bian Absalɔmun+ usɛli i kɛ: “?Ɔ niaan bian Amnɔn yɛ ɔ yoli wɔ sɔ-ɔ? Min niaan bla, nán kan kle sran. Afin ɔ niaan-ɔn.+ Nán fa yo ndɛ.” Kɛ ɔ fɛ i lɛ’n, Tamaa ko trɛnnin i niaan bian Absalɔmun i awlo lɔ, ɔ fɛmɛn i wun mantanman sran fi.
21 Kɛ Famiɛn Davidi tili ndɛ’n, ɔ fali ya dan kpa.+ Sanngɛ ɔ kunndɛman kɛ ɔ́ ló i wa Amnɔn i ngasi. Afin ɔ klo Amnɔn, yɛ ɔ ti i wa kpɛn.
22 Absalɔmun kusu w’a kanman ndɛ tɛ annzɛ ndɛ kpa ba kun sa w’a kleman Amnɔn. Ɔ nin i b’a ijɔman kun. Afin i niaan bla Tamaa+ mɔ Amnɔn kuɛkuɛli i’n ti’n, ɔ kpɔli i.+
23 Afuɛ klonglo nɲɔn sinnin. Cɛn kun mɔ Absalɔmun i bua ndrɛ kpɛkpɛfuɛ’m be o Baali-Azɔɔ’n, Efraimun+ i wun koko lɛ’n, Absalɔmun yiali famiɛn’n i mma’m be kwlaa.+
24 Absalɔmun ko toli famiɛn’n, yɛ ɔ seli i kɛ: “Famiɛn, be su kpɛkpɛ min bua’m be ndrɛ’n. Famiɛn, yaci, maan e nin wɔ nin ɔ sufuɛ mun e wɔ lɔ.”
25 Sanngɛ famiɛn’n seli Absalɔmun kɛ: “Min wa, n su kɔman wie. Sɛ e ngba e kɔ’n, é káci kɛ trɔ nɔnnin wie sa ɔ ti su.” Absalɔmun kɛnnin i lele, sanngɛ famiɛn’n w’a kplinman su. Sanngɛ ɔ boli muae mɛnnin i.
26 Yɛ Absalɔmun seli i kɛ: “Sɛ ɔ ti sɔ’n, yaci, maan e nin min niaan bian Amnɔn e wɔ.”+ Famiɛn’n tɛli i su kɛ: “?Ngue ti yɛ a nin i bé kɔ́-ɔ?”
27 Sanngɛ Absalɔmun srɛli i lele. Ɔ maan ɔ seli Amnɔn nin i mma onga’m be kwlaa kɛ be nin Absalɔmun be wɔ.
28 Absalɔmun seli i gbanflɛn’m be kɛ: “Amun nian su kpa. Kɛ Amnɔn ko nɔn duvɛn’n lele mɔ aklunjɔɛ’n ko ba’n, ń sé amun kɛ: ‘Amun kun Amnɔn!’ Kpɛkun amun kun i. Nán srɛ kun amun. Min bɔbɔ yɛ n se amun kɛ amun yo sɔ-ɔ. Amun tra amun awlɛn, amun yo yakpafuɛ.”
29 Like nga Absalɔmun seli i gbanflɛn’m be kɛ be fa yo Amnɔn’n, be niannin su sɛsɛsɛ be yoli. Kpɛkun famiɛn’n i mma onga’m be kwlaa be jasoli, be fuli be milɛ’n* be su sɛsɛsɛ, yɛ be wanndili-ɔ.
30 Sanngɛ kɛ bé kɔ́’n, Davidi tili i lɔ kɛ: “Absalɔmun w’a kun famiɛn’n i mma’m be kwlaa, be nun kun sa w’a kaman lɛ.”
31 Yɛ famiɛn’n jasoli-ɔ, ɔ titili i wun tralɛ’n nun, kpɛkun ɔ lali asiɛ wun lɛ. I sufuɛ’m be kwlaa be mɛntɛnnin i lɔ, be wun tralɛ’m be ti titiwa wie.
32 Sanngɛ Davidi i niaan bian Simea+ i wa Zonadabu+ seli kɛ: “Famiɛn, nán bu i kɛ be kunnin ɔ mma’m be ngba. Amnɔn kunngba yɛ ɔ wuli-ɔ.+ Absalɔmun yɛ i waan be kun i-ɔ.+ Kɛ ɔ fin cɛn mɔ Amnɔn kuɛkuɛli i niaan bla+ Tamaa’n,+ yɛ ɔ buli akunndan sɔ’n niɔn.
33 I sɔ’n ti’n, famiɛn, nán fa bewanbewan ndɛ sɔ’n su.* Nán ɔ mma yasua’m be kwlaa yɛ be wuli-ɔ. Amnɔn kunngba cɛ yɛ ɔ wuli-ɔ.”
34 Kɛ Absalɔmun kusu yoli sɔ’n, ɔ wanndili.+ Kɛ i osu cɛli kan mɔ klɔ’n i sasafuɛ’n mɛnnin i ti’n su’n, ɔ wunnin sran kpanngban kpa atin ng’ɔ mantan kpɔlɛ’n i su lɔ, be su ba.
35 Yɛ Zonadabu+ seli famiɛn’n kɛ: “Famiɛn, nian! Ɔ mma mun yɛ bé bá yɛ. Ndɛ nga n kannin’n, ɔ ti nanwlɛ.”
36 Kɛ i nuan tɔli cɛ’n, yɛ famiɛn’n i mma’m be boli nun-ɔn. Kɛ bé bá’n, nn bé sún kpa liɛ su. Famiɛn’n kusu nin i sufuɛ’m be kwlaa be sunnin lelele.
37 Absalɔmun liɛ’n, ɔ wanndi ko taloli Amiidi i wa Talmai+ m’ɔ ti Gesuri famiɛn’n. Davidi sunnin i wa’n cɛn kpanngban kpa.
38 Kɛ Absalɔmun wanndi ɔli Gesuri’n,+ ɔ trannin lɔ afuɛ nsan.
39 Kɛ Amnɔn i wie’n yoli Famiɛn Davidi i ya lele’n, i sin’n, i wla wa fili i wun.* Kpɛkun ɔ kunndɛli kɛ ɔ́ kó nían Absalɔmun osu, i wla m’ɔ lo i’n ti.
Ja ngua lɔ ndɛ mun
^ Annzɛ “kpanwun nga be fa fɔnvɔ sran’n.”
^ Ebr., “gato nga be yo i kukluku kɛ awlɛn ba sa’n.”
^ Annzɛ “kpanwun nga be fa fɔnvɔ sran’n.”
^ Ebr., “gato nga be yo i kukluku kɛ awlɛn ba sa’n.”
^ Annzɛ “kpanwun nga be fa fɔnvɔ sran’n.”
^ Annzɛ “tralɛ kun mɔ ninnge nglanmannglanman be o nun’n.”
^ Ebre nun ndɛ mma nga e kacili i kɛ milɛ’n, ɔ ti nnɛn kun i dunman. Kɛ aflunmun yasua kun fu nnɛn kpanngɔ bla kun’n, ba nga be wu i’n, yɛ be flɛ i sɔ-ɔ.
^ Ebr., “nán fa ɔ awlɛn’n sie su.”
^ Annzɛ “ɔ ɲannin fɔnvɔlɛ.”
