2 Samiɛli 14:1-33
14 Zeruya+ i wa Zoabu tili i kɛ famiɛn’n i wla lo Absalɔmun+ kpa.
2 I sɔ’n ti’n, Zoabu sunmannin sran Tekoa+ lɔ naan be ko flɛ bla ngwlɛlɛfuɛ kun. Kɛ bla’n bali’n, ɔ seli i kɛ: “Yaci, yo kɛ a o sɛ nun sa, wla sɛ tralɛ, yɛ nán kpakpa ngo.+ Yo ɔ wun kɛ ɔ sran wuli w’a cɛ kpa naan a te sun i sa.
3 I sin’n, kɔ ko kan ndɛ nga kle famiɛn’n.” Yɛ Zoabu fali ndɛ ng’ɔ fata kɛ bla’n kan’n wlɛli i nuan-ɔn.*
4 Kɛ Tekoa bla’n toli famiɛn’n i awlo lɔ’n, ɔ utuli i ɲin ase, kpɛkun ɔ kotoli i bo. Ɔ seli kɛ: “Ee nannan, uka min!”
5 Yɛ famiɛn’n usɛli i kɛ: “?Ngue ndɛ-ɔ?” Bla’n tɛli i su kɛ: “N ti angbeti, min wun’n wuli.
6 Famiɛn, nian, n le ba yasua nɲɔn. Le kun’n, be nɲɔn’n be dili utre fie su lɔ. Kɛ ɔ́ yó sɔ’n, nn sran fi nunman lɛ naan w’a titi be nun. Yɛ be nun kun finnin i niaan’n i like naan w’a kun i.
7 Siɛn’n, awlo’n nunfuɛ’m be jin min wun. Be se min kɛ: ‘Fa ba ng’ɔ kunnin i niaan’n wla e sa nun. I niaan ng’ɔ kunnin i’n ti’n, é kún i wie.+ Sɛ aja difuɛ nunman lɛ kun bɔbɔ’n, e ndɛ nunman nun.’ Be waan bé núan yiendre ba kunngba cɛ ng’ɔ ka min sa nun’n.* Ɔ maan min wun’n i osu’n nin i dunman’n bé mlín mlɔnmlɔnmlɔn asiɛ’n su.”
8 Yɛ famiɛn’n seli bla’n kɛ: “Kɔ ɔ awlo. Ń wá síesíe ndɛ sɔ’n ń mán wɔ.”
9 Kɛ ɔ yoli sɔ’n, Tekoa bla’n seli famiɛn’n kɛ: “Famiɛn, nán maan sa tɛ sɔ’n ka wɔ nin ɔ famiɛn diwlɛ’n* su. Sanngɛ maan ɔ ka e nin min si i awlo’n nunfuɛ mun e su.”
10 Famiɛn’n seli ekun kɛ: “Sɛ sran kun kan ndɛ sɔ’n kle wɔ ekun’n, fɛ i blɛ min. Ɔ su kleman ɔ yalɛ kun mlɔnmlɔnmlɔn.”
11 Sanngɛ bla’n seli kɛ: “Famiɛn, yaci, maan ɔ wla kpɛn Zoova m’ɔ ti ɔ Ɲanmiɛn’n su naan klunngbɔ tufuɛ’n+ w’a kunman min wa’n, naan w’a yoman min abɔlɛ.” Ɔ tɛli bla’n su kɛ: “N kan Zoova m’ɔ lafiman’n,+ ɔ wa’n i ti ndrɛ ba kun sa su tɔman asiɛ wun.”
12 Bla’n seli ekun kɛ: “Famiɛn, yaci, maan n kan ndɛ kun ekun n kle wɔ.” Yɛ ɔ seli kɛ: “Kan!”
13 Bla’n seli kɛ: “?Ngue ti yɛ ɔ waan á yó Ɲanmiɛn i nvle’n nunfuɛ’m be tɛ kɛ ngalɛ’n sa-ɔ?+ Ndɛ nga a kɛnnin i lɛ’n ti’n, w’a bu ɔ bɔbɔ ɔ wun fɔ. Afin ɔ klun ba m’ɔ wanndili’n, w’a ko fɛmɛn i w’a baman.+
14 E ngba é wú. É káci kɛ nzue m’ɔ utu asiɛ wun mɔ be kwlá isɛmɛn i kun’n sa. Sanngɛ Ɲanmiɛn liɛ’n, ɔ su kunman sran ba kun sa. Yɛ sɛ sran kun wanndi ɔli nvle uflɛ nun’n, sa nga ti yɛ ɔ fataman kɛ ɔ ka lɔ sa trilili’n, Ɲanmiɛn wun i wlɛ.
15 Sran’m be wlali min srɛ. Famiɛn, i ti yɛ n bali naan ń wá kán ndɛ sɔ’n ń klé wɔ-ɔ. N seli min wun kɛ: ‘Maan n ko kan kle famiɛn’n ke. Atrɛkpa’n, ɔ́ búa min klanman.
16 Atrɛkpa’n, famiɛn’n síe i su min nuan bo. Kpɛkun sran ng’ɔ kunndɛ kɛ ɔ́ núnnún e nin min wa kunngba cɛ’n, naan y’a ɲanman e aja like liɛ nga Ɲanmiɛn mannin e’n, ɔ́ dé e i sa nun.’+
17 N seli min wun ekun kɛ: ‘N lafi su kɛ ndɛ nga min famiɛn’n kán’n, ɔ́ yó maan min wla gúa ase.’ Afin min famiɛn’n ti kɛ Ɲanmiɛn Kpli i anzi kun sa. Yɛle kɛ ɔ si like ng’ɔ ti kpa’n nin like ng’ɔ ti tɛ’n be ngbaciɛ’n. Maan Zoova m’ɔ ti ɔ Ɲanmiɛn’n jran ɔ sin.”
18 Famiɛn’n tɛli bla’n su kɛ: “Yaci, min waan ń wá úsa ɔ sa kun. Sanngɛ nán fia ndɛ ba kun sa su.” Yɛ bla’n tɛli su kɛ: “Min famiɛn, yaci, usa.”
19 Famiɛn’n usɛli i kɛ: “?Zoabu yɛ ɔ sunmannin wɔ kɛ a wa kan ndɛ kwlaa sɔ mun-ɔn?”+ Bla’n tɛli su kɛ: “Min famiɛn, maan n di wɔ nanwlɛ. Kɛ nga a fa kɛnnin i lɛ’n sa’n, ɔ sufuɛ Zoabu yɛ ɔ seli min kɛ n kɛn i sɔ-ɔ. I yɛ ɔ fali ndɛ kwlaa sɔ mun wlali min nuan-ɔn.
20 Ɔ sufuɛ Zoabu yoli sɔ naan ndɛ’n i ɲin fia kan. Sanngɛ min min, a si ngwlɛlɛ kɛ Ɲanmiɛn Kpli i anzi’n sa. Yɛ a si sa kwlaa nga be ju nvle’n nun’n.”
21 I sin’n, famiɛn’n seli Zoabu kɛ: “N tili, ń má yó sɔ.+ Ko fa Absalɔmun bla.”+
22 Kɛ ɔ yoli sɔ’n, Zoabu utuli i ɲin ase, ɔ kotoli famiɛn’n i bo naan w’a yo i mo. Zoabu seli kɛ: “Min min, andɛ’n, m’an wun i wlɛ kɛ a klo min sa sakpa. Afin famiɛn, a fali ndɛ nga n kan kleli wɔ’n su.”
23 Kpɛkun Zoabu jaso ɔli Gesuri+ naan w’a ko fa Absalɔmun w’a ba Zerizalɛmun lɛ.
24 Sanngɛ famiɛn’n seli kɛ: “Maan ɔ sɛ i sin i bɔbɔ i awlo lɔ, nán maan i ɲinma gua min wun.” Ɔ maan Absalɔmun ɔli i awlo, yɛ i ɲinma w’a guaman famiɛn’n i wun.
25 Izraɛli nvle wunmuan’n nun’n, yasua uflɛ fi nunman lɛ mɔ i klanman’n ti’n, be yi i ayɛ dan kɛ Absalɔmun sa-ɔ. Kɛ ɔ fɛ i ja bo lele m’ɔ́ fá jú i ti afiɛn’n, lɛ fi nunmɛn i wun.
26 Afuɛ nuan kwlaa’n, ɔ fata kɛ ɔ yi i ti ndrɛ’n, afin ɔ yo nɔnnin dan i ti su. Kɛ ɔ yi i ti ndrɛ mɔ be sunnzun’n, i nɔnnin’n ti sikli ya nɲɔn (200).* Famiɛn’n i toe yɔbuɛ’n* yɛ be fa sunnzun-ɔn.
27 Absalɔmun wuli ba yasua nsan+ nin ba bla kun. Be flɛ i wa bla’n kɛ Tamaa, yɛ ɔ ti klanman kpa.
28 Absalɔmun trannin Zerizalɛmun lɛ afuɛ klonglo nɲɔn, sanngɛ i ɲinma w’a guaman famiɛn’n i wun le.+
29 I sɔ’n ti’n, Absalɔmun seli Zoabu kɛ ɔ bla naan ɔ́ súnmɛn i famiɛn’n i sin. Sanngɛ Zoabu w’a baman. Ɔ flɛli i kpɛ nɲɔn, sanngɛ i waan ɔ baman.
30 Kasiɛn su’n, ɔ seli i sufuɛ’m be kɛ: “Zoabu i fie’n mantan min liɛ’n, yɛ ɔ luali ɔɔzu fie sɔ’n su. Amun ko wɔ nun.” Yɛ Absalɔmun i sufuɛ’m be ko wɔli Zoabu i fie’n nun-ɔn.
31 Kɛ ɔ yoli sɔ’n, Zoabu ko toli Absalɔmun i awlo lɔ naan w’a se i kɛ: “?Ngue ti yɛ ɔ sufuɛ’m be ko wɔli min fie’n nun-ɔn?”
32 Yɛ Absalɔmun tɛli Zoabu su kɛ: “N sunmannin sran naan be ko se wɔ kɛ a bla naan ń súnman wɔ famiɛn’n i sin, naan a ko se i kɛ min waan yoo: ‘?Ngue ti yɛ n fin Gesuri lɔ n bali-ɔ?+ Sɛ ɔ ti kɛ n kali lɔ’n, nn ɔ flunman. Siɛn’n, famiɛn, man min atin naan n ko wun ɔ wun. Yɛ sɛ n yoli sa tɛ wie’n, kun min.’”
33 Yɛ Zoabu ko kannin ndɛ sɔ’n kleli famiɛn’n niɔn. I sin’n, ɔ seli Absalɔmun kɛ ɔ bla. Kɛ ɔ bali’n, ɔ kotoli famiɛn’n i bo naan w’a utu i ɲin ase i ɲrun lɛ. Kpɛkun famiɛn’n tɔli i nun.+
Ja ngua lɔ ndɛ mun
^ Annzɛ “ndɛ ng’ɔ fata kɛ bla’n kan’n, ɔ kan kleli i.”
^ Yɛle kɛ, sran ng’ɔ ka lɛ mɔ n lafi su kɛ ɔ́ wú ba mán min wun’n.
^ Ebr., “famiɛn bia’n.”
^ Atrɛkpa’n, toe yɔbuɛ nga sran’m be fa sunnzun ninnge mun titi’n, m’ɔ o famiɛn’n i awlo lɔ’n niɔn. Annzɛ ɔ kwla yo “famiɛn’n” i sikli liɛ m’ɔ nin sikli nga be di su titi’n timan kun’n.
