2 Samiɛli 15:1-37
15 Kɛ ɔ yoli sɔ’n, Absalɔmun ko kunndɛli i bɔbɔ i kakaklolo liɛ, nin nnɛn kpanngɔ mun. Kpɛkun ɔ fali sran ablenun (50) naan be wanndi dun mmua i ɲrun.+
2 Absalɔmun jaso nglɛmun ndɛ kpa’n. Kpɛkun akpɔ nga be fa su be kɔ klɔ’n i anuan nun lɔ’n,+ ɔ ko jrɛn i nuan lɛ. Sran kwlaa ng’ɔ le ndɛ m’ɔ su fa kɔ famiɛn’n i ja su’n,+ Absalɔmun flɛ i. Kpɛkun ɔ usɛ i kɛ: “?Klɔ benin su yɛ a fin-ɔn?” Yɛ sran’n kle i Izraɛli akpasua ng’ɔ fin su’n.
3 Absalɔmun se i kɛ: “Nian, ɔ ndɛ’n yo fɛ kpa, fiɛn kaan sa nunmɛn i sin. Sanngɛ famiɛn’n i sa nun sran fi nunman lɛ naan w’a tie ɔ ndɛ’n.”
4 Ɔ se ekun kɛ: “Sɛ ɔ ti kɛ be sieli min jɔlɛ difuɛ e nvle’n nun sa’n, nn sran kwlaa ng’ɔ le ndɛ’n, ɔ́ kwlá bá min ja su. Kpɛkun ń nían nun ń kɛ́n i ndɛ’n i kpa ń mɛ́n i.”
5 Sɛ sran kun wunnge Absalɔmun i wun lɔ naan ɔ́ kóto i bo’n, ɔ tinndin i sa’n, ɔ trɛ i. Kpɛkun ɔ fɛ i nuan’n fa bo i fuka’n su.+
6 Izraɛlifuɛ nga be waan bé fá be ndɛ’n bé kɔ́ famiɛn’n i ja su’n, kɛ Absalɔmun yo be kwlaa be sɔ-ɔ. Absalɔmun lakali Izraɛlifuɛ mun lele be awlɛn’n trɛnnin i su.*+
7 Kɛ afuɛ nnan* sinnin’n, Absalɔmun seli famiɛn’n kɛ: “Yaci, man min atin maan n wɔ Ebrɔn.+ Nda nga n tali Zoova’n, min waan ń kó fɛ́ i nuan like ń mɛ́n i.
8 Afin i nun mɔ n ko trannin Gesuri+ m’ɔ o Siri mɛn’n nun lɔ’n, n tali nda kun.+ N seli kɛ: ‘Sɛ Zoova fa min sa min sin Zerizalɛmun’n, ń mán Zoova like.’”*
9 Yɛ famiɛn’n seli i kɛ: “Atin o nun, kɔ.” Yɛ Absalɔmun ɔli Ebrɔn-ɔn.
10 Absalɔmun sunmannin kotiwase mun Izraɛli akpasua’m be kwlaa be su. Ɔ seli be kɛ: “Kɛ amun ko ti awɛ’n i ngan cɛ’n, amun bo i jɔ be sin kɛ: ‘Absalɔmun w’a yo famiɛn Ebrɔn lɔ.’”+
11 Absalɔmun fali Zerizalɛmun lɛ sran ya nɲɔn (200) ɔli. Ɔ seli sran sɔ mun kɛ be ko sunmɛn i. Sanngɛ be siman ndɛ’n nun, be suli i su sa ngbɛn.
12 Kɛ Absalɔmun yí tɛ’n, ɔ sunmannin sran Gilo+ lɔ naan be ko flɛ Aitofɛli+ m’ɔ ti Gilofuɛ’n. Bian sɔ’n ti Davidi i afɔtuɛ manfuɛ.+ Siɛn’n, Davidi i wun cicilɛ nga be su cici’n, ɔ timan blɛblɛ. Yɛ kɛ lika’n cɛ́n m’ɔ́ sán’n, nn sran nga be jran Absalɔmun sin’n, bé sɔ́n dan trá laa’n.+
13 I sin’n, be wa seli Davidi kɛ: “Sran’m be kwlaa be o Absalɔmun sin.”
14 Yɛ Davidi seli i sran nga be nin i be o Zerizalɛmun lɛ’n be kwlaa kɛ: “Maan e wanndi e wɔ.+ Sɛ y’a yoman sɔ naan Absalɔmun to e wa’n, e nun wie fi su fiteman nun. Maan e wɔ ndɛndɛ, afin é wún ɲrɛnnɛn. Absalɔmun tɔ́ e su ndɛndɛ kpa, kpɛkun ɔ́ fá tokofi kún klɔ’n nunfuɛ mun.”+
15 Famiɛn’n i sufuɛ’m be tɛli i su kɛ: “E ti ɔ sufuɛ. Famiɛn, like kwlaa nga a se e kɛ e yo’n, é yó.”+
16 Kɛ ɔ yoli sɔ’n, famiɛn’n nin i awlo’n nun sran’m be kwlaa be ɔli. Sanngɛ ɔ yacili i yi’m*+ be nun blu lɛ naan be nian awlo’n* i lika.
17 Kɛ famiɛn’n nin sran kwlaa nga be su i su’n be fin klɔ’n nun fiteli’n, be ko jrannin Bɛti-Meraki* lɛ kan.
18 Famiɛn’n fɛli i sufuɛ’m be kwlaa nga be suli i su’n, nin Kerɛtifuɛ’m be kwlaa, nin Pelɛtifuɛ’m+ be kwlaa, nin i sufuɛ ya nsiɛn (600) nga be fin Gati’n+ be kwlaa sinnin i ɲrun lɛ.
19 Yɛ famiɛn’n seli Itai+ m’ɔ fin Gati’n kɛ: “?Ngue ti yɛ á sú e su yɛ? Sa ɔ sin ko tran famiɛn uflɛ’n i wun lɔ. Afin a ti aofuɛ. Asa ekun’n, a wanndili ɔ mɛn’n nun lɔ yɛ a bali wa-ɔ.
20 Anunman yɛ a juli wa-ɔ. ?Kpɛkun andɛ’n ń fá ɔ wlánwlán daan? Fa ɔ niaan mun naan amun wɔ. Maan Zoova klo wɔ sɔ wie titi, yɛ maan ɔ nin wɔ nanti klanman sɔ wie.”+
21 Sanngɛ Itai tɛli famiɛn’n su kɛ: “Famiɛn, maan n di nanwlɛ Zoova m’ɔ lafiman’n ɔ nin ɔ bɔbɔ mɔ ɔ ɲin te o su yɛ’n, amun ɲrun. Lika kwlaa nga á kɔ́’n, ń sú wɔ su. Sɛ á wú-o, sɛ á ká nguan nun-o, e nin wɔ-ɔ.”+
22 Yɛ Davidi seli Itai kɛ:+ “Yoo, kpɛ kongo’n.” Itai m’ɔ fin Gati’n ɔ nin i sran’m be kwlaa nin be mma’m be kpɛli kongo’n.
23 Kɛ sran’m be kwlaa sɔ’m bé kpɛ́ Sedrɔn Kongo’n+ naan bé kó sín atin ng’ɔ kɔ aawlɛ flɛnnɛn’n nun lɔ’n su’n, nn sran kwlaa nga be o Zerizalɛmun asa’n su lɔ’n bé sún dan kpa. Kɛ ɔ́ yó sɔ’n, nn famiɛn’n jin kongo’n i nuan lɛ.
24 Zadɔku+ nin Levifuɛ kwlaa+ nga be sua Ɲanmiɛn Kpli i aenguɛ’n+ i alaka’n,+ be o lɛ wie. Be sikeli Ɲanmiɛn Kpli i Alaka’n be jinnin. Kɛ Abiataa+ bɛ́ i liɛ’n, nn sran’m be kwlaa nga be fin klɔ’n nun’n, be su wie kongo’n i kpɛ.
25 Sanngɛ famiɛn’n seli Zadɔku kɛ: “Fa Ɲanmiɛn Kpli i Alaka’n naan sa ɔ sin klɔ lɔ.+ Sɛ sakpasakpa naan Zoova i klun jɔ min wun’n, ɔ́ fá min sá min sin yɛ ń wún Alaka’n nin i sua’n ekun.+
26 Sanngɛ sɛ ɔ se kɛ i klun jɔman min wun’n, i liɛ’n, like kwlaa ng’ɔ klo kɛ ɔ́ fá yó min’n, maan ɔ yo.”
27 Famiɛn’n seli Zadɔku m’ɔ ti Ɲanmiɛn ɲrun jranfuɛ’n i ekun kɛ: “A ti jeliwafuɛ.+ ?Nɛ́n i-ɔ? A nin Abiataa, amun sa amun sin klɔ lɔ. Amun fa amun wa nɲɔn mun naan amun wɔ: Yɛle kɛ ɔ wa Aimaazi nin Abiataa i wa Zonatan.+ Maan amun liɛ yo ye.
28 Min liɛ’n, ń kó trán aawlɛ flɛnnɛn’n nun lɔ kan be kpɛ Zurdɛn’n be ja nun lɛ’n. Sɛ amun nuan ndɛ to min’n, yɛ ń tú min bo-ɔ.”+
29 Zadɔku nin Abiataa be fali Ɲanmiɛn Kpli i Alaka’n be sali be sin Zerizalɛmun, naan b’a ka lɔ.
30 Kɛ Davidi fú Olivie Oka’n+ nn ɔ́ sún. Tannin kɛtɛ i ti. Yɛ ɔ nanti i ja ngbɛn. Sran kwlaa nga be su i su’n, be katali be ti wie. Kɛ bé kɔ́’n, nn bé sún.
31 Cɛn kun’n, be wa seli Davidi kɛ: “Aitofɛli o be nga b’a cici ɔ wun’n be nun wie,+ ɔ o Absalɔmun+ sin.” Yɛ Davidi seli kɛ: “Ee Zoova,+ yaci, yo maan afɔtuɛ nga Aitofɛli mán’n, ɔ yo sinnzin ndɛ.”+
32 Kɛ Davidi jú oka’n i ti su lɔ’n, kan sran’m be ko utu be ɲin ase Ɲanmiɛn i ɲrun lɛ’n, nn Usai+ m’ɔ ti Aakifuɛ’n+ wo lɔ, ɔ su minndɛ i. I wun tralɛ’n ti titiwa, yɛ ndutre o i ti’n su.
33 Davidi seli i kɛ: “Sɛ a su min su’n, a su yoman min ye.
34 I sɔ’n ti’n, sa wɔ sin klɔ lɔ naan se Absalɔmun kɛ: ‘Nannan, n ti ɔ sufuɛ. N suli ɔ si laa. Sanngɛ siɛn’n, n ti ɔ sufuɛ.’+ I liɛ’n, a kwla yo naan b’a faman afɔtuɛ nga Aitofɛli mán’n su.+
35 Zadɔku nin Abiataa mɔ be ti Ɲanmiɛn ɲrun jranfuɛ’n be o lɔ wie. Ndɛ kwlaa nga a ti i famiɛn’n i awlo’n nun’n, ko kan kle be.+
36 Be nin be wa nɲɔn mun, yɛle kɛ Zadɔku i wa Aimaazi+ nin Abiataa i wa Zonatan,+ yɛ be o lɔ-ɔ. Ndɛ kwlaa nga a ti i lɔ’n, sunman be naan be wa kan kle min.”
37 Yɛ Usai m’ɔ ti Davidi i janvuɛ’n*+ ɔli Zerizalɛmun-ɔn. Kɛ ɔ́ jú lɔ’n, nn Absalɔmun su wlu klɔ’n nun lɔ.
Ja ngua lɔ ndɛ mun
^ Ebr., “ɔ wuali be awlɛn’n.”
^ Be kwla se ekun kɛ “afuɛ 40.”
^ Annzɛ “ń sú Zoova,” Ebr., “ń dí junman ń mán Zoova.”
^ Ebr., “soman mun.”
^ Annzɛ “famiɛn sua’n.”
^ I bo’n yɛ: “Sua ng’ɔ o Mmua’n.”
^ Annzɛ “sran ng’ɔ kɛn i klun ndɛ kle i’n.”
