2 Samiɛli 22:1-51
22 Zoova deli Davidi i kpɔfuɛ’m be kwlaa be sa nun,+ yɛ ɔ deli i Saili i sa nun.+ Kɛ ɔ yoli sɔ’n, Davidi toli jue nga fa manmannin Zoova.+
2 Ɔ seli kɛ:
“Zoova ti min yɔbuɛ, ɔ ti min fiawlɛ,+ yɛ ɔ ti min defuɛ.+
3 Min Ɲanmiɛn’n ti min yɔbuɛ,+ i nun yɛ n fia-ɔ,ɔ ti min ɲrɛn,+ nin min wɛ* ng’ɔ de min’n,* nin min fiawlɛ kpa,+ɔ ti min lika nga n wanndi n kɔ nun’n,+ ɔ ti min defuɛ.+ Wɔ yɛ a deli min sran nga be yo wlɛ’n be sa nun-ɔn.
4 N bo flɛ Zoova m’ɔ nin manmanlɛ fata’n,yɛ ɔ́ dé min min kpɔfuɛ’m be sa nun.
5 Wie’n bo sin yiali min kɛ nzue wie yɛ ɔ su bo gua min su sa.+Finfinfuɛ wie mɔ be sɔnnin kpa kɛ nzue dan wie sa’n, be kunnin min srɛ dan.+
6 Ndia’n* i ɲanman’m be toto blali min,+wie’n w’a sua min wun aya.+
7 Kɛ ń wún ɲrɛnnɛn’n, n kpan flɛli Zoova,+m’an yaciman min Ɲanmiɛn’n i flɛlɛ.
I kusu, kɛ ɔ o i sua’n nun lɔ’n, ɔ tili min nɛn’n.Kpanlɛ nga n kpannin kɛ ɔ uka min’n, ɔ guɛli i su’n nun.+
8 Asiɛ’n kejeli dan kpa, ɔ keje kɔ wa, ɔ keje kɔ wa.+Ɲanmiɛn m’ɔ la nglo lɔ plaii’n i takatakawlɛ’m be kejeli,+be keje kɔ wa, be keje kɔ wa, ya dan mɔ Ɲanmiɛn fali’n ti.+
9 Sin wunsrɛn’n fin i bue’n nun fiteli,sin m’ɔ yra like kɔlikɔli’n fin i nuan’n nun fiteli.+Sɛnmlɛn ɲannglaan be fin i wun lɔ fiteli.
10 Kɛ ɔ́ jrá’n, ɔ kannin ɲanmiɛn m’ɔ la nglo lɔ plaii’n i ase.+Like wie kɛ ɲanmiɛn ble tritritri kpa sa’n wo i ja bo.+
11 Ɔ fuli seribɛn kun su,+ ɔ tu bali.
Be wunnin i aolia nun sran kun* i ndɛwa’m be su.+
12 Ɔ fali aosin’n fa yoli kɛ tannin sua wie sa,+ɔ fali nzue mɔ w’a mlan tritritri’n, ɔ nin ɲanmiɛn ble tuun’n fa kɛtɛli i wun.
13 I ɲrun lɛ lika m’ɔ kpaja wauun’n nun’n, sɛnmlɛn ɲannglaan fin lɔ fite.
14 I sin’n, Zoova kpannin kplannankplannan ɲanmiɛn su lɔ,+Ɲanmiɛn m’ɔ o Like Kwlaa Ti Su’n yoli maan be tili i nɛn’n.+
15 Ɔ toli i ta mma mun,+ kpɛkun be bo sanndili.Ɔ yoli maan ɲanmiɛn’n kpali sin, yɛ ɔ sanngannin be nun.+
16 Fɔ mɔ Zoova tuli be kekle’n ti’n, nin aunmuan ng’ɔ fin i bue’n nun fiteli’n+ ti’n,be wunnin jenvie’n i bo lɔ’n,+yɛ asiɛ’n i bo ng’ɔ wla ase’n fiteli su weiin.
17 Kɛ ɔ o nglo lɔ’n, ɔ toli i sa’n.Ɔ trali min naan w’a yi min nzue bunman’n nun w’a fite.+
18 Ɔ deli min min kpɔfuɛ m’ɔ le wunmiɛn’n i sa nun,+ɔ deli min be nga be kpɔ min mɔ be wunmiɛn’n tra min liɛ’n, be sa nun.
19 Kɛ ɲrɛnnɛn tɔli min su’n, be bali min su,+sanngɛ Zoova suannin min bo.
20 Ɔ fali min ɔli lika kun mɔ sa fi su ɲanman minlɔ’n* nun.+Ɔ klo min sa ti yɛ ɔ deli min-ɔn.+
21 Sa nuan su sɛsɛ mɔ n yo’n i nuan like yɛ Zoova fa man min-ɔn.+Sa tɛ mɔ n yoman’n i nuan like yɛ ɔ fa man min-ɔn.+
22 Afin n nantili Zoova i atin’n su titi,yɛ m’an kpɔciman Ɲanmiɛn, afin i sɔ’n ti klunwi ayeliɛ.
23 I mmla’m be kwlaa+ be o min klun.N su yacimɛn i mmla’m be su falɛ.+
24 N su yoman sa tɛ kaan sa+ i ɲrun,ń nían min wun su naan m’an fɔnman.+
25 Maan Zoova nian sa nuan su sɛsɛ mɔ n yo’n su ɔ tua min kalɛ,+maan ɔ nian sa tɛ mɔ n yomɛn i ɲrun’n su ɔ tua min kalɛ.+
26 Sran ng’ɔ nin wɔ be nanti klanman’n, a nin i be nanti klanman.+Sran* ng’ɔ nanti seiin, ɔ kusu a kle kɛ a nanti seiin.+
27 Sran ng’ɔ ti sanwun’n, a kle i kɛ a ti sanwun,+sanngɛ sran ng’ɔ ti gblɛfuɛ’n, a kle i kɛ a si ngwlɛlɛ.*+
28 Afin a de be nga be kan be wun ase’n.+Sanngɛ ɔ klun jɔman wun tufuɛ’m be wun kaan sa, yɛ a kan be ase.+
29 Zoova, a ti min kannin.+Zoova yo maan aosin tritri nga n wo nun’n, ɔ kpaja.+
30 Ɔ fanngan nun’n, n kwla fuan awiefuɛ mun.Ɲanmiɛn i fanngan nun’n, n kwla fu klɔ’n i wun talɛ’n su n jra lɔ.+
31 Ɲanmiɛn Kpli i atin’n ti kpa lelele.+Ndɛ nga Zoova kan’n, fiɛn kaan sa nunmɛn i sin.+
Be kwlaa nga be fiɛ i sin’n, ɔ sasa be kɛ ɲrɛn sa.+
32 ?Sɛ nán Zoova kunngba cɛ’n, wan yɛ ɔ ti Ɲanmiɛn ekun-ɔn?+?Sɛ w’a yoman kɛ e Ɲanmiɛn’n sa’n, yɔbuɛ uflɛ o lɛ?+
33 Ɲanmiɛn Kpli ti min fiawlɛ kpa sakpa,+ɔ́ yó maan min ɲrun atin’n yó seiin.+
34 Ɔ yo maan min ja nun’n bli kɛ flete sa.Ɔ fa min jran lika nga be ti nglonglo kpa’n be su.+
35 Ɔ kle min alɛ kunlɛ,n kwla cuɛn ta nga be fali aaba be yoli’n nun.
36 A fa ɔ ɲrɛn’n man min naan ɔ sasa min,ɔ wun ase mɔ a kan’n ti’n, n ɲan ɲrun.+
37 A trɛli atin’n nun mannin min,ɔ maan min ja’m be su seliman.+
38 Ń fúan min kpɔfuɛ mun lele ń wíe be núnnún.Sɛ be nin-a nunnunman sekeseke’n, nn n nin-a saman min sin.
39 Ń núnnún be sekeseke, ń núnkun be. Ɔ maan be su kwlá jasoman kun.+Ń tíatía be su.
40 Á mán min wunmiɛn naan m’an kwla kun alɛ,+á yó maan min ɲrun tanndanfuɛ’m bé tɔ́min bo lɛ.+
41 Á yó maan min kpɔfuɛ’m bé wánndi min bo.+Ń núnnún be nga be kpɔ min’n.+
42 Be kpan kunndɛ ukalɛ, sanngɛ sran fi nunman lɛ naan w’a de be.I kpa bɔbɔ’n be kpan flɛ Zoova, sanngɛ ɔ tɛmanbe su.+
43 Ń núnkun be, bé yó kɛ asiɛ wun ndutre’n sa.Ń yó maan be osu’n núnnún yɛ ń tíatía be su kɛ akpɔ su nnɔtiɛ sa.
44 Á dé min min nvle’n nunfuɛ mɔ be kan min wun ndɛ’n be sa nun.+
Á sásá min naan n yo nvlenvle’m be su kpɛn.+Nvle nga n simɛn i laa bɔbɔ’n, i nunfuɛ’m bésú min.+
45 Aofuɛ’m bé bá bé wá kóto min bo.+Min su ndɛ nga bé tí’n ti’n, be ɲin yí min.*
46 Aofuɛ’m be sa sin búbú be.*Kɛ bé fín be fiawlɛ’m be nun bé fíte’n, bé úsu sa tututu.
47 Zoova lafiman! Maan be yi min Yɔbuɛ’n i ayɛ!+
Maan manmanlɛ’n yo min Ɲanmiɛn’n, yɔbuɛ m’ɔ de min’n, i liɛ.+
48 Ɲanmiɛn Kpli yɛ ɔ tu min klunngbɔ-ɔ.+Ɔ yo maan nvlenvle’m be lo be wun man min.+
49 Ɔ de min min kpɔfuɛ’m be sa nun.
A fa min sie be nga be nin min kun’n be ti sunglo kpa.+
A de min sran wlɛfuɛ’n isa nun.+
50 I sɔ’n ti’n, Zoova, ń lá ɔ ase nvlenvle’m be nun,+yɛ ń tó jue* ń mánmán ɔ dunman’n:+
51 Ɔ yo sa dandan mun fa de i famiɛn’n.+Ɔ kle sran ng’ɔ kpɛli i’n kɛ ɔ klo i dan.Ɔ kle Davidi nin i osu’n nunfuɛ’m be kɛ ɔ su yaciman be klolɛ le.”+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “min defuɛ m’ɔ le wunmiɛn kpa’n.”
^ Nian Ndɛ’m be bo tulɛ lika’n nun lɔ.
^ Annzɛ “aunmuan’n.”
^ Annzɛ “lika gbawun kun.”
^ Ebr., “Wunmiɛnfuɛ.”
^ Be kwla se ekun kɛ “a nin i be yo kɛ sinnglinfuɛ wie sa.”
^ Ebr., “kɛ be su’n tí ndɛ’n, be ɲin yí min.”
^ Annzɛ “bé mlín.”
^ Annzɛ “ń bó miziki.”