2 Samiɛli 3:1-39
3 Alɛ ng’ɔ o be nga be jran Saili i awlobo nunfuɛ’m be sin’n nin be nga be jran Davidi sin’n, ɔ wieman. Kɛ aliɛ’n cɛ́n m’ɔ́ sán’n, nn Davidi ɲán wunmiɛn kpa trá laa’n.+ Kɛ ɔ́ yó sɔ kusu’n, nn Saili i awlobo nunfuɛ’m be wunmiɛn’n kpɛ́ su.+
2 Blɛ sɔ’n nun mɔ Davidi o Ebrɔn+ lɔ’n, ɔ wuli ba yasua wie mun. I klikli’n yɛle Amnɔn.+ Ɔ nin Asinoamun+ m’ɔ fin Zizreɛli’n yɛ be wuli i-ɔ.
3 I nɲɔn su’n yɛle Kileabu. Ɔ nin Abigaili+ yɛ be wuli i-ɔ. Bla sɔ’n ti Nabali m’ɔ fin Kaamɛli’n i angbeti. I nsan su’n yɛle Absalɔmun.+ Talmai+ m’ɔ ti Gesuri famiɛn’n i wa bla Maaka i wa-ɔ.
4 I nnan su’n yɛle Adonia.+ Agiti i wa-ɔ. I nnun su’n yɛle Sefatia. Abitali i wa-ɔ.
5 I nsiɛn su’n yɛle Itreamun. Ɔ nin i yi Egla yɛ be wuli i-ɔ. Ba nga Davidi wuli be Ebrɔn lɔ’n, be yɛ be o lɛ-ɔ.
6 Kɛ be nga be jran Saili i awlobo nunfuɛ’m be sin’n be nin be nga be jran Davidi i awlobo nunfuɛ’m be sin’n, bé kún’n, nn Abnɛɛ+ kusu ɲán ɲrun dan Saili i awlo’n nun.
7 Be flɛ Saili i yi’m be nun kun kɛ Rizpa.+ Aya i wa bla-ɔ. Cɛn kun’n, Isi-Bosɛti+ seli Abnɛɛ kɛ: “?Ngue ti yɛ a nin min si i yi’n be lali-ɔ?”+
8 Ndɛ sɔ mɔ Isi-Bosɛti kannin’n ti’n, Abnɛɛ fali ya dan. Ɔ maan ɔ seli kɛ: “?Zidafuɛ’m be alua* yɛle min? Kɛ ɔ fɛ i laa lele andɛ’n, n kleli ɔ si Saili i awlobo nunfuɛ mun nin i niaan mun nin i janvuɛ’m be kɛ n klo be. Asa ekun’n, m’an faman wɔ m’an wlaman Davidi sa nun. Kpɛkun andɛ’n, a su man min ndɛ bla ti.
9 Nda nga Zoova tali Davidi’n,+ sɛ n bɔbɔ Abnɛɛ m’an yomɛn i nuan su like m’an mɛnmɛn i’n, maan Ɲanmiɛn kle min ɲrɛnnɛn.
10 Ɔ tɛli i nda kɛ ɔ́ dé famiɛn dilɛ’n Saili i awlobo nunfuɛ’m be sa nun. Kpɛkun ɔ́ fá Davidi síe i famiɛn bia’n su naan kɛ ɔ fɛ i Dan lele fa ju Beɛ-Seba’n,+ ɔ sie Izraɛli nin Zida.”
11 Isi-Bosɛti w’a kwlá kanman ndɛ ba kun sa w’a kleman Abnɛɛ, afin ɔ sro i.+
12 Be ja nun lɛ’n, Abnɛɛ sunmannin sran Davidi sin naan be ko se i kɛ: “?Wan liɛ yɛle nvle’n?” Ɔ seli ekun kɛ: “Maan e tra aenguɛ. I liɛ’n, ń yó like kwlaa nga n kwla yo naan Izraɛlifuɛ’m be ngba b’a jran ɔ sin’n.”+
13 Yɛ Davidi seli kɛ: “N tili, e nin wɔ é trá aenguɛ. Sanngɛ like kunngba cɛ nga á yó’n yɛ: Kɛ á tó min wa’n, a nin Saili i wa bla Mikali+ be bla. Sɛ w’a yoman sɔ’n, nán maan min ɲinma gua ɔ wun.”
14 I sin’n, Davidi sunmannin sran Saili i wa Isi-Bosɛti+ sin. Ɔ ko seli i kɛ: “Fa min yi Mikali man min. Filistifuɛ’m be yasua lika’n i ti kplo ya kun (100) yɛ n fa jɛli i-ɔ.”+
15 I sɔ’n ti’n, Isi-Bosɛti sunmannin sran kɛ be ko fa bla’n, i wun’n i sa nun. Laisi i wa Palitiɛli+ yɛle bian sɔ’n.
16 Sanngɛ kɛ bla’n nánti kɔ́’n, i wun’n suli i su. Kɛ ɔ́ sú i su’n, nn ɔ́ sún. Ɔ yoli sɔ lele be juli Baurimun.+ Yɛ Abnɛɛ seli i kɛ: “Sa ɔ sin, kɔ!” Yɛ bian’n sɛli i sin-ɔn.
17 Kɛ ɔ́ yó sɔ’n, nn Abnɛɛ w’a sunman sran Izraɛli kpɛnngbɛn’m be sin. Ɔ seli be kɛ: “Nán andɛ sa yɛ amun kunndɛ kɛ Davidi yo amun famiɛn-ɔn.
18 Siɛn’n, amun fɛ i wun ajalɛ. Afin Zoova seli Davidi kɛ: ‘Min sufuɛ Davidi+ yɛ ń fɛ́ i ń fá dé Izraɛli-ɔ. Ɔ maan min sran’m bé ɲán be ti Filistifuɛ mun nin be kpɔfuɛ’m be kwlaa be sa nun.’”
19 I sin’n, Abnɛɛ ko kannin ndɛ kleli Bɛnzamɛnfuɛ mun.+ Kpɛkun ɔ ɔli Ebrɔn lɔ ko wunnin Davidi wun aamiɛn. Ndɛ nga ɔ nin Izraɛlifuɛ mun nin Bɛnzamɛn akpasua nunfuɛ’m be kwlaa be nuan sɛli su’n, ɔ kannin kleli Davidi.
20 Kɛ Abnɛɛ nin sran ablaɔn (20) be ko toli Davidi Ebrɔn lɔ’n, Davidi tɔnnin aliɛ dan kpa fa sɔli be nun.
21 Yɛ Abnɛɛ seli Davidi kɛ: “Man min atin maan n wɔ n ko yiayia Izraɛlifuɛ’m be kwlaa naan be jran wɔ mɔ a ti famiɛn’n, ɔ sin. I liɛ’n, be nin wɔ bé trá aenguɛ kpɛkun á síe sran’m be kwlaa.” Davidi mannin Abnɛɛ i atin, yɛ ɔ ɔli wɛtɛɛ su-ɔ.
22 I osu w’a cɛman bɔbɔ, kpɛkun Davidi i sran mun be nin Zoabu be fin alɛ kunlɛ b’a ba. Be ninnge nga be ɲɛnnin i alɛ nun’n, ɔ sɔnnin kpa. Kɛ bé bá’n, nn Abnɛɛ nunman Davidi i wun lɛ Ebrɔn lɛ kun. Afin Davidi mɛnnin i atin maan ɔ ɔli wɛtɛɛ su.
23 Kɛ Zoabu+ nin i sonja’m be kwlaa be bali’n, sran’m be seli i kɛ: “Nɛɛ+ i wa Abnɛɛ+ bali famiɛn’n i wun wa. Yɛ famiɛn’n kusu yacili i nun maan ɔ ɔli wɛtɛɛ su.”
24 Yɛ Zoabu ko toli famiɛn’n i lɔ-ɔ, kpɛkun ɔ seli i kɛ: “?Ngue ti yɛ a yoli sɔ-ɔ? Abnɛɛ bɔbɔ toli ɔ wa. ?Yɛ ngue ti yɛ a yacili i nun maan ɔ ɔli wɛtɛɛ su-ɔ?
25 Ɔ bɔbɔ a si Nɛɛ i wa Abnɛɛ. Ɔ lakalɛ ti yɛ ɔ bali wa-ɔ. Ɔ bali naan ɔ́ sí lika kwlaa nga a tia ɔ ja lɛ’n nin like kwlaa nga a yo’n.”
26 Zoabu fin Davidi i wun lɛ fiteli. Kpɛkun ɔ sunmannin sran Abnɛɛ sin. Sran sɔ’m be ko toli i kunman dan* ng’ɔ o Sira lɔ’n i wun lɛ, naan b’a fɛ i b’a sa be sin. Sanngɛ Davidi siman kɛ be su yo i sɔ like’n.
27 Kɛ Abnɛɛ sɛli i sin Ebrɔn+ lɛ’n, Zoabu fɛ i ɔli klɔ’n i anuan’n nun lɔ aamiɛn naan ɔ́ kán ndɛ klé i. Sanngɛ kɛ be juli lɔ’n, ɔ fali tokofi wɔli Abnɛɛ i ku’n nun. Yɛ ɔ wuli-ɔ.+ Kunlɛ mɔ Abnɛɛ kunnin i niaan bian Azaɛli’n+ ti yɛ ɔ yoli sɔ-ɔ.
28 Kɛ i osu’n cɛli kan mɔ Davidi tili’n, ɔ seli kɛ: “Zoova bɔbɔ si kɛ e nin min Famiɛn Diwlɛ’n nun sran mun e sa nunman Nɛɛ i wa Abnɛɛ i wie’n nun+ mlɔnmlɔn.
29 Maan i sɔ sa liɛ’n ka Zoabu nin i si i awlobo nunfuɛ’m be kwlaa be ti su.+ Maan yasua nga be wun nzue fite’n,+ nin kokowefuɛ’n,+ nin yasua nga be tra lola mma nun’n,* nin yasua nga be fa tokofi kun be’n, nin yasua nga awe kun be’n,+ be tran Zoabu i awlo’n nun tititi.”
30 Zoabu nin i niaan bian Abisai+ be kunnin Abnɛɛ.+ Afin Gabaɔn alɛ’n nun’n, ɔ kunnin be niaan bian Azaɛli.+
31 I sin’n, Davidi seli Zoabu nin be kwlaa nga be o i wun lɛ’n be kɛ: “Amun titi amun tralɛ’m be nun naan amun wla bajɛ tralɛ, naan amun sun Abnɛɛ.” Kpɛkun famiɛn Davidi bɔbɔ suli Abnɛɛ i saka’n su yɛ be ɔli i sielɛ-ɔ.
32 Ebrɔn lɛ yɛ be sieli Abnɛɛ-ɔ. Yɛ famiɛn’n sunnin dan kpa Abnɛɛ i asieliɛ’n su lɔ. Sran’m be kwlaa be sunnin wie.
33 Kɛ ɔ yoli sɔ’n, famiɛn’n toli Abnɛɛ i ti jue. Ɔ seli kɛ:
“?Abnɛɛ i wulɛ ng’ɔ wuli kɛ sinnglinfuɛ’m be fa wu’n sa’n, ɔ ti su?
34 B’a ciciman ɔ sa mun.Asa kusu’n, b’a boman ɔ kpanwun.*
Sanngɛ a wuli kɛ sran wie m’ɔ tɔli sran kunfuɛ’m be sa nun’n sa.”+
Kɛ ɔ yoli sɔ’n, sran’m be kwlaa be sunnin Abnɛɛ ekun.
35 I sin’n, sran’m be kwlaa be blɛli Davidi i kpanwun naan ɔ di naan i wla gua ase. Kɛ ɔ́ yó sɔ’n, nn wia’n te o nun kpa. Sanngɛ Davidi seli kɛ: “Sɛ min nuan kan kpanwun annzɛ like uflɛ ka naan wia’n w’a tɔ’n, maan Ɲanmiɛn kle min ɲrɛnnɛn.”+
36 Sran’m be kwlaa be wunnin i sɔ liɛ’n. Yɛ i sɔ’n kusu yoli be fɛ. Afin like kwlaa nga famiɛn’n yo’n, ɔ yo be kwlaa be fɛ titi.
37 Ɔ maan cɛn sɔ’n nun’n, Davidi i sran mun nin Izraɛlifuɛ’m be kwlaa be wunnin i wlɛ kɛ nán famiɛn’n yɛ i waan be kun Nɛɛ i wa Abnɛɛ-ɔ.+
38 Famiɛn’n seli i sufuɛ’m be kɛ: “? Amun siman kɛ Izraɛli nvle’n nun kpɛnngbɛn kun mɔ i kunngba’n ti sran dan’n yɛ ɔ wuli andɛ-ɔ?+
39 Be sieli min famiɛn,+ sanngɛ andɛ’n n leman wunmiɛn. Zeruya+ i mma sɔ’m be klun yo wi dan.+ Maan Zoova nian klunwifuɛ’n i klunwi sa ng’ɔ yo’n su tuɛ i kalɛ.”+
Ja ngua lɔ ndɛ mun
^ Ebr., “alua’n i ti’n.”
^ Be fu kunman dan sɔ’n naan nzue ng’ɔ tɔ’n ɔ jran nun annzɛ nzue ti wie sonji gua nun.
^ Atrɛkpa’n, ɔ su kan yasua nga be ti bubuwafuɛ mɔ bla junman yɛ be kwla di’n, be ndɛ.
^ Ebr., “ɔ ja’m be nunman aaba nun.”
