2 Samiɛli 4:1-12
4 Kɛ Saili i wa Isi-Bosɛti*+ tili i kɛ Abnɛɛ wuli Ebrɔn+ lɔ’n, i sa sin bubuli i dan. Yɛ Izraɛlifuɛ’m be kwlaa be akunndan’n sanngannin.
2 Saili i wa sɔ’n i sonja wie’m be o lɛ’n, be junman yɛle sran’m be ninnge’m be wualɛ. Sonja sɔ’m be su kpɛn’m be ti nɲɔn. Be flɛ kun kɛ Baana, yɛ kun suan Rekabu. Rimɔn m’ɔ ti Beerɔtifuɛ’n i wa mun-ɔn. Bian sɔ’n fin Bɛnzamɛn akpasua’n nun. (Afin be ka Beerɔti+ klɔ’n be wlɛ i Bɛnzamɛn akpasua’n su klɔ’m be nun wie.
3 Beerɔtifuɛ’m be wanndi ɔli Gitaimun.+ Andɛ nin andɛ’n be ti aofuɛ lɔ.)
4 Saili i wa Zonatan+ i wa yasua kun o lɛ’n, i ja’n ti saciwa.*+ Be flɛ i kɛ Mefibosɛti.+ I nun m’ɔ le afuɛ nnun’n, be wa kɛnnin i Zizreɛli+ lɛ kɛ Saili nin Zonatan be wuli. Kɛ bla ng’ɔ nian ba sɔ’n su’n, ɔ mɛnnin i su m’ɔ́ wánndi’n, i wun m’ɔ usu i’n ti’n, ba’n tɔli. Kɛ ɔ fɛ i lɛ’n, i ja’n sacili, ɔ kwlá nantiman kun.
5 Cɛn kun wia klakla kpa’n nun’n, Rimɔn m’ɔ ti Beerɔtifuɛ’n i wa Rekabu nin Baana be wluli Isi-Bosɛti i sua’n nun lɔ. Kɛ ɔ́ yó sɔ’n, nn ɔ su lafi mindi su.
6 Kɛ Rekabu nin i niaan bian Baana+ bé wlú sua’n nun lɔ’n, be yoli kɛ be bali ble falɛ sa. Kpɛkun be fali tokofi be wɔli i ku’n nun. I sin’n, be wanndi ɔli blɛlɛlɛ.
7 Kɛ bé wlú sua’n nun lɔ’n, nn Isi-Bosɛti lɛ i sua ba’n nun lɔ bɛ’n su lɛ. Be fali tokofi’n be wɔli i naan b’a kun i. Kpɛkun be kpɛli i ti’n. Be fɛli i ti sɔ’n, kpɛkun be fa nantili Araba atin’n su kɔnguɛ wunmuan’n nun.
8 Be fali Isi-Bosɛti+ i ti’n ko mannin Davidi Ebrɔn lɔ. Kpɛkun be seli i kɛ: “Ɔ kpɔfuɛ Saili+ m’ɔ kunndɛli kɛ ɔ́ kún wɔ’n,+ i wa Isi-Bosɛti i ti’n yɛ. Famiɛn, tɛ nga Saili nin i osu’n nunfuɛ’m be waan bé yó wɔ’n, Zoova w’a yo maan w’a tu ɔ klunngbɔ be su andɛ.”
9 Sanngɛ Davidi tɛli Rekabu nin i niaan bian Baana mɔ be ti Rimɔn m’ɔ ti Beerɔtifuɛ’n i mma mun’n, be su kɛ: “N kan Zoova m’ɔ lafiman’n, m’ɔ deli min ɲrɛnnɛn kwlaa nun’n,+
10 kɛ sran kun wa seli min kɛ Saili wuli’n,+ ɔ buli i kɛ nn jasin fɛ yɛ w’a bo w’a kle min-ɔn. Sanngɛ n trɛli i, kpɛkun n kunnin i+ Ziklagi lɔ. Kalɛ nga n fa tuali sran sɔ’n yɛ ɔ o lɛ-ɔ.
11 ?Ɔ maan sɛ klunwifuɛ’m be jaso be ko kun sran m’ɔ wa yoman like fi’n i bɔbɔ i bɛ’n su i sua’n nun lɔ’n, ń yáci be lɛ? ?N su kleman amun ɲrɛnnɛn i mmoja nga amun guɛli i ase’n ti?+ ?N su yoman naan b’a boman amun dunman kun asiɛ’n su wa?”
12 I sin’n, Davidi seli i gbanflɛn’m be kɛ be kun be.+ Be kpɛkpɛli be sa’n nin be ja’n, kpɛkun be sendeli be saka’n+ nzue gble’n i wun lɛ Ebrɔn lɔ. Sanngɛ be fali Isi-Bosɛti i ti’n be ko sieli i Abnɛɛ i asieliɛ’n nun Ebrɔn lɔ.
