2 Samiɛli 5:1-25
5 Kɛ ɔ yoli sɔ’n, Izraɛli akpasua’m be kwlaa be ko toli Davidi Ebrɔn lɔ,+ yɛ be seli i kɛ: “Nian! E nin wɔ e ti kun, e kpaciman.*+
2 I nun mɔ Saili ti e famiɛn’n, wɔ yɛ a dun mmua Izraɛlifuɛ’m be ɲrun alɛ kunlɛ’n nun-ɔn.*+ Asa ekun’n, Zoova seli ɔ kɛ: ‘Á wá nían Izraɛlifuɛ mɔ be ti min nvle’n nunfuɛ’n be lika, yɛ á yó be su kpɛn.’”+
3 Ɔ maan Izraɛli kpɛnngbɛn’m be kwlaa be toli Famiɛn Davidi Ebrɔn lɛ. Kpɛkun famiɛn’n nin be trali aenguɛ+ Zoova ɲrun, Ebrɔn lɛ. I sin’n, be sieli Davidi i famiɛn Izraɛli nvle’n su.+
4 Kɛ Davidi yó famiɛn’n, nn ɔ le afuɛ ablasan (30). Yɛ ɔ yoli famiɛn afuɛ ablanan (40).+
5 I nun m’ɔ o Ebrɔn lɔ’n, ɔ yoli Zida akpasua’n su famiɛn afuɛ nso nin anglo nsiɛn. Yɛ kɛ ɔ trannin Zerizalɛmun+ lɔ’n, ɔ yoli Zida akpasua’n nin Izraɛli nvle wunmuan’n su famiɛn afuɛ ablasan-nin-nsan (33).
6 Davidi nin i sran’m be fali Zerizalɛmun atin’n naan be nin Zebisifuɛ+ mɔ be tran lɔ’n, bé kó kún. Sanngɛ be yoli Davidi i finfin. Be seli kɛ: “A su kwlá wluman wa le! Aɲinsifuɛ mun nin be nga be ja’n sacili bɔbɔ’n, be yɛ bé kán ɔ bo-ɔ.” Be buli i kɛ Davidi su kwlá faman be klɔ’n le.+
7 Sanngɛ Davidi fali be fiawlɛ lika ng’ɔ o Siɔn’n. Lika sɔ’n yɛ andɛ’n be flɛ i kɛ Davidi Klɔ’n niɔn.+
8 Ɔ maan cɛn sɔ’n nun’n, Davidi seli kɛ: “Maan sonja’m be fa nzue sinwlɛ’n su naan be nin Zebisifuɛ’m be ko kun. Yɛ maan be ko kun ‘aɲinsifuɛ mun nin be nga be ja’n ti saciwa’n’ mɔ n kpɔ be’n.” Kɛ ɔ fɛ i lɛ’n, kɛ bé kán ndɛ’n, be se kɛ: “Aɲinsifuɛ mun nin be nga be ja’n ti saciwa’n be su wluman sua’n nun le.”
9 Kɛ ɔ yoli sɔ’n, Davidi ko trannin fiawlɛ lika sɔ’n nun. Be wa flɛli* lika sɔ’n kɛ Davidi Klɔ. Ɔ kplannin talɛ nin sua wie mun lele bo sin yiali nun. Ɔ fɛli i Milo Cenjeʼn*+ su lɛ lele fa wluli lika sɔ’n i klun lɔ.+
10 Kɛ aliɛ cɛ́n m’ɔ́ sán’n, nn Davidi i kwlalɛ’n yó dan trá laa’n.+ Yɛ Ɲanmiɛn Zoova m’ɔ ti sonja’m be su kpɛn’n jin i sin.+
11 Iramun+ m’ɔ ti Tir famiɛn’n sunmannin sran Davidi i sin. Asa ekun’n, ɔ ko mɛnnin i sɛdri waka,+ nin waka sɛfuɛ mun, nin be nga be fa yɔbuɛ be kplan sua’n. Kpɛkun be boli sua kun i kplanlɛ bo naan bé fá mán Davidi.+
12 Davidi wunnin i wlɛ kɛ Zoova yoli maan i famiɛn dilɛ’n takali kpa Izraɛli nvle’n su,+ naan Izraɛli m’ɔ ti i nvle’n ti’n,+ ɔ yoli maan i bɔbɔ Davidi i famiɛn diwlɛ’n ɲannin ɲrun.+
13 Kɛ Davidi jasoli Ebrɔn m’ɔ ɔli Zerizalɛmun’n, ɔ boli bla wie mun ekun be soman,+ yɛ ɔ jali bla wie mun ekun. Yɛ ɔ wuli ba yasua nin ba bla wie mun ekun.+
14 Ba ng’ɔ wuli be Zerizalɛmun lɔ’n, be dunman mun yɛ: Samia, Sobabu, Natan,+ Salomɔn,+
15 Ibaa, Elisia, Nefɛgi, Zafia,
16 Elisama, Eliada, yɛ Elifelɛti.
17 Kɛ Filistifuɛ’m be tili i kɛ b’a sie Davidi i famiɛn Izraɛli nvle’n su’n,+ be kwlaa be ɔli Davidi i kunndɛlɛ.+ Kɛ Davidi kusu tili i sɔ’n, ɔ ɔli fiawlɛ lika’n nun lɔ.+
18 Kɛ Filistifuɛ’m be bali’n, be wa guali Refafuɛ’m be Kongo’n nun lɛ.+
19 Yɛ Davidi usali Zoova+ kɛ: “?N wɔ naan e nin Filistifuɛ mun e ko kun? ?Á fá be wlá min sa nun?” Zoova tɛli Davidi su kɛ: “Kɔ, afin ń fá Filistifuɛ mun ń wlá ɔ sa nun sakpasakpa.”+
20 Ɔ maan Davidi ɔli Baali-Perazimun lɔ naan w’a ko kun Filistifuɛ mun lɛ. Kɛ ɔ yoli sɔ’n, ɔ seli kɛ: “Zoova w’a yi atin min kpɔfuɛ’m be afiɛn+ w’a man min kɛ nzue m’ɔ bu talɛ’n naan w’a sin’n sa.” I sɔ’n ti yɛ ɔ tɔnnin lika sɔ’n i dunman kɛ Baali-Perazimun’n*+ niɔn.
21 Filistifuɛ’m be yacili be amuin’m be lɛ be wanndili. Kpɛkun Davidi nin i sran’m be isali be ɔli.
22 Kɛ i osu cɛli kan’n, Filistifuɛ’m be bali be wa guali Refafuɛ’m be Kongo’n+ nun lɛ ekun.
23 Davidi usali Zoova i sa, sanngɛ ɔ tɛli i su kɛ: “Kɛ á kɔ́’n, nán kɔ be ɲrun ndɛnman su. Sanngɛ bu be sin lɔ naan kɛ a ju bo’n* i ɲrun lɛ’n, fa alɛ wla be sin.
24 Yɛ kɛ a ko ti like wie i ngan kɛ be su nanti baka waka’m be ti su lɔ sa’n, nán sisi ɔ bo, fa alɛ wla be sin. Afin Zoova dún mmua ɔ ɲrun naan ɔ́ kó kún Filistifuɛ’m be sonja mun.”
25 Davidi fali Zoova i ndɛ’n su sɛsɛsɛ. Ɔ maan ɔ kwlali Filistifuɛ mun+ Geba+ lɔ lele fa juli Gezɛɛ.+
Ja ngua lɔ ndɛ mun
^ Ebr., “e ti ɔ owie nin ɔ wunnɛn ba’n.”
^ Ebr., “a fa Izraɛli fite yɛ a fɛ i wlu.”
^ Be kwla se ekun kɛ “Yɛ ɔ flɛli i.”
^ Nian Ndɛʼm be bo tulɛ likaʼn nun lɔ.
^ I bo’n yɛ: “Atin Yifuɛ’m be Min’n.”
^ Ebr., “baka bo’n.”
