2 Samiɛli 9:1-13
-
Davidi kloli Mefibosɛti i tankaan kpa (1-13)
9 Cɛn kun’n, Davidi seli kɛ: “?Saili i awlofuɛ benin yɛ ɔ te o lɛ mɔ Zonatan dunman nun ti’n, n kwla yo i ye-ɔ?”*+
2 Saili i awlo’n nun junman difuɛ kun o lɛ’n, be flɛ i kɛ Ziba.+ Be ko fɛli i blɛli Davidi. Yɛ Davidi usɛli i kɛ: “?Wɔ yɛ a suan Ziba’n niɔn?” Bian’n tɛli su kɛ: “Min min, ɛɛn, min-ɔn.”
3 Famiɛn’n usɛli i ekun kɛ: “?Saili i awlo’n nun sran kun te o lɛ mɔ n kwla klo i titi kɛ Ɲanmiɛn fa klo sran’n sa-ɔ?” Ziba tɛli famiɛn’n su kɛ: “Ɛɛn, Zonatan i wa kun te o lɛ. I ja nɲɔn’m be ti saciwa.”*+
4 Yɛ famiɛn’n usɛli i kɛ: “?Ɔ o nin?” Ziba tɛli i su kɛ: “Ɔ o Lo-Debaa, Amiɛli i wa Makii+ i awlo lɔ.”
5 Be ja nun lɛ’n, famiɛn Davidi sunmannin sran Lo-Debaa naan ɔ ko fɛ i Amiɛli i wa Makii i awlo lɔ bla.
6 Kɛ Mefibosɛti m’ɔ ti Zonatan i wa mɔ i kusu ti Saili i wa’n wa toli Davidi’n, ɔ kotoli kpɛkun ɔ utuli i ɲin ase. Yɛ Davidi seli i kɛ: “Mefibosɛti!” I kusu tɛli su kɛ: “Famiɛn, min yɛ.”
7 Davidi seli i kɛ: “Nán srɛ kun wɔ. Afin ɔ si Zonatan dunman nun ti’n, ń má yó ɔ ye.*+ Ń fá ɔ nannan Saili i asiɛ’n kwlaa ń mán wɔ. Asa ekun’n, min tabli’n su yɛ á dí like* tititi-ɔ.”+
8 Yɛ Mefibosɛti utuli i ɲin ase-ɔ. Kpɛkun ɔ seli kɛ: “?Famiɛn, alua fuɛn+ kɛ min sa’n yɛ min ndɛ lo ɔ dan sɔ-ɔ?”
9 Famiɛn’n flɛli Ziba m’ɔ ti Saili i sufuɛ’n naan w’a se i kɛ: “M’an fa ɔ min Saili nin i osufuɛ’m be bo ninnge kwlaa m’an mɛn i anunman’n.+
10 A nin ɔ mma mun nin ɔ junman difuɛ mun, amun di fie be mɛn i. Kɛ amun ti fie’m be su ninnge mun’n, amun fa bla naan ɔ min’n i anunman’n i awlofuɛ’m b’a ɲan aliɛ b’a di. Sanngɛ Mefibosɛti m’ɔ ti ɔ min’n i anunman’n, i liɛ’n ɔ́ dí like min tabli’n su tititi.”+
Ziba sɔ’n le ba blu-nin-nnun (15) yɛ i junman difuɛ’m be ti ablaɔn (20).+
11 Yɛ Ziba seli famiɛn’n kɛ: “Min min, like kwlaa nga a seli min kɛ n yo’n, ń yó.” Ɔ maan Mefibosɛti dili like Davidi i* tabli’n su kɛ ɔ ti famiɛn’n i wa wie sa.
12 Ziba i awlo’n nun sran’m be kwlaa be kacili Mefibosɛti i sufuɛ. Mefibosɛti i mma’m be nun kun ti gbanflɛn kan, yɛ be flɛ i kɛ Mise.+
13 Mefibosɛti ko trannin Zerizalɛmun lɔ. Afin ɔ di like famiɛn’n i tabli’n su titi.+ I ja nɲɔn’m be ti saciwa.+
Ja ngua lɔ ndɛ mun
^ Annzɛ “ń yí klolɛ dan’n i nglo i lika-ɔ.”
^ Annzɛ “ɔ kiti.”
^ Annzɛ “Ń yí klɔlɛ mɔ n klo sran titi’n i nglo.”
^ Ebr., “á dí kpanwun.”
^ Be kwla se ekun kɛ “min.”
