Amɔsu 1:1-15
1 Amɔsu* m’ɔ ti Tekoa+ lɔ bua tafuɛ’m be nun kun’n i ndɛ mun yɛ. Famiɛn Oziasi+ m’ɔ sieli Zida mɛn’n, nin Zoasi+ i wa Zeroboamun+ m’ɔ yoli Izraɛli famiɛn’n be blɛ su’n, Izraɛli i su ndɛ nga be kan kleli i aolia nun’n yɛ. Kɛ ɔ tili ndɛ sɔ mɔ afuɛ nɲɔn sinnin’n, yɛ asiɛ’n kejeli-ɔ.+
2 Ɔ seli kɛ:
“Zoova kpán kɛ asɔmɔli wie sa Siɔn lɔ,yɛ ɔ́ mɛ́n i nɛn’n su Zerizalɛmun lɔ.
Nnɛn’m be didiwlɛ’m bé wú kee,yɛ Kaamɛli’n su lɔ like kwlaa wú kee.”+
3 “Ndɛ nga Zoova kan’n yɛ:‘“Ɲin kekle nga Damasi yoli* i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin ɔ boli Galaadi kɛ sran kun su fa blalɛ paplapa wie bo ble’n sa.+
4 I sɔ’n ti’n, ń fá sin ń yí i Azaɛli+ i sua’n nun,yɛ ɔ́ yrá Bɛnin-Adadi+ i fiawlɛ sua nga be ti fleiin’n mun.
5 Ninnge nga be fa tanndan Damasi+ lɔ anuan’m be sin’n ń búbú be nun.Ń kún Bikati-Avɛnin lɔfuɛ munɔ nin sran ng’ɔ sie* Bɛti-Edɛnin’n.Kpɛkun bé trá Sirifuɛ’m be lomuɛn bé kɔ́ Kii lɔ.”+ Zoova yɛ ɔ kan sɔ-ɔ.’
6 Ndɛ nga Zoova kan’n yɛ:‘“Ɲin kekle nga Gaza+ yoli i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin be fali be nga be trali be lomuɛn ɔli’n+ be akpasua wunmuan kun wlɛli i Edɔmun sa nun.
7 I sɔ’n ti’n, ń fá sin ń yí i Gaza+ i talɛ’n su,yɛ ɔ́ yrá lɔ fiawlɛ sua nga be ti fleiin’n mun.
8 Ń kún Asdɔdu+ lɔfuɛ munnin sran ng’ɔ sie* Askalɔn’n.+Ń fá min sa’n ń kán Ekrɔn,+yɛ Filistifuɛ nga be ka lɛ’n, bé núnnún sekeseke.”+ Miɛn Zoova m’ɔ Sie Like Kwlakwla’n yɛ ɔ kan sɔ-ɔ.’
9 Ndɛ nga Zoova kan’n yɛ:‘Ɲin kekle nga Tir+ yoli i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin be fali be nga be trali be lomuɛn ɔli’n be akpasua wunmuan kun wlɛli i Edɔmun sa nun.Yɛ be wla w’a kpɛnman aenguɛ ng’ɔ o be nin be niaan’m be afiɛn’n su.+
10 I sɔ’n ti’n, ń fá sin ń yí i Tir i talɛ’n su,yɛ ɔ́ yrá lɔ fiawlɛ sua nga be ti fleiin’n mun.’+
11 Ndɛ nga Zoova kan’n yɛ:‘Ɲin kekle nga Edɔmun+ yoli i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin ɔ fali tokofi fuɛnnin i bɔbɔ i niaan’n,+yɛ w’a simɛn i aunnvɔɛ.Ya ng’ɔ fali’n ti’n, ɔ titi be nun sa trilili,yɛ ɔ fali be wun ya sa tititi.+
12 I sɔ’n ti’n, ń fá sin ń yí i Teman+ su,yɛ ɔ́ yrá Bɔzra+ lɔ fiawlɛ sua nga be ti fleiin’n mun.’
13 Ndɛ nga Zoova kan’n yɛ:‘“Ɲin kekle nga Amɔnfuɛ’m+ be yoli i kpɛ nsan, ɔ nin kpɛ nnan’n ti’n, be wun ajalɛ nga n fali’n n su kacimɛn i,afin be kpacili Galaadi lɔ bla wunnzɛfuɛ’m be ku sɛ’n nun naan bé trɛ́ be bɔbɔ be mɛn’n nun.+
14 I sɔ’n ti’n, ń fá sin ń yí i Raba+ i talɛ’n su,yɛ ɔ́ yrá lɔ fiawlɛ sua nga be ti fleiin’n mun,cɛn sɔ’n nun mɔ alɛ’n tɔ́’n, sran’m bé kpán alɛ kunlɛ kpanlɛ,yɛ cɛn sɔ’n nun mɔ aunmuan’n wá fíta dan’n, nzue’n su tɔman blɛblɛ.
15 Kpɛkun bé trá be famiɛn’n nin i sran dandan mun bé kɔ́,”+ Zoova yɛ ɔ kan sɔ-ɔ.’
Ja ngua lɔ ndɛ mun
^ I bo’n yɛ: “Ɔ Ti Be Ti Su Trɔ” annzɛ “Ɔ Sua Trɔ.”
^ Annzɛ “i sran kunlɛ mun.”
^ Ebr., “sran ng’ɔ tra famiɛn dilɛ kpɔnman’n nun’n.”
^ Ebr., “sran ng’ɔ tra famiɛn dilɛ kpɔnman’n nun’n.”
