Amɔsu 2:1-16
2 “Ndɛ nga Zoova kan’n yɛ:‘“Ɲin kekle* nga Moabu+ yoli i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin ɔ yrali Edɔmun famiɛn’n i owie’n lele ɔ kacili nzuɛn.
2 I sɔ’n ti’n, ń fá sin ń yí i Moabu mɛn’n nun,yɛ ɔ́ yrá Keriɔti+ lɔ fiawlɛ sua nga be ti fleiin’n mun.Moabu wú oyooyo’n nun,kɛ ɔ́ yó sɔ’n, nn sran’m bé kpán alɛ kpanlɛ, nn awɛ’n tɛ́.+
3 Ń tú siefuɛ* ng’ɔ o i afiɛn’nyɛ ń kún i bɔbɔ ɔ nin i sran dandan mun be kwlaa.”+ Zoova yɛ ɔ kan sɔ-ɔ.’
4 Ndɛ nga Zoova kan’n yɛ:‘Ɲin kekle nga Zida+ yoli i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin be yili Zoova i mmla’n* i blo,yɛ b’a dimɛn i ndɛ’n su kun.+Sanngɛ kɛ mɔ ato ninnge nga be si’m be lafili su’n, i kunngba’n yɛ be lafi su’n ti’n, b’a mlin.+
5 I sɔ’n ti’n, ń fá sin ń yí i Zida mɛn’n nun,yɛ ɔ́ yrá Zerizalɛmun lɔ fiawlɛ sua nga be ti fleiin’n mun.’+
6 Ndɛ nga Zoova kan’n yɛ:‘Ɲin kekle nga Izraɛli+ yoli i kpɛ nsan, ɔ nin kpɛ nnan’n ti’n, i wun ajalɛ nga n fali’n n su kacimɛn i,afin sika ti’n, be yo sran ng’ɔ yo sa i nuan su sɛsɛ’n i atɛ,yɛ ngbabua ti’n, be yo yalɛfuɛ’n i atɛ.+
7 Be tiatia be nga be leman wie’n be ti’n su ndutre’n nun,+yɛ be tannin atin’n naan wɛtɛɛfuɛ’m b’a sinman.+
Sran kun nin i si’n be nin talua kunngba’n be la,i sɔ’n saci min dunman m’ɔ ti sanwun’n.
8 Tralɛ nga sran’m be fa wlali aowa+ be sa nun’n, be la su be tɛ yiwlɛ’m+ be kwlaa be wun lɛ.Alamannin nga be fu sran mun’n, yɛ be fa to duvɛn nga be nɔn i be amuin sua’n nun’n niɔn.’
9 ‘Kusu nn Amɔɔfuɛ mɔ be ti tɛnndɛn kɛ sɛdri waka’n sa’n, mɔ be le wunmiɛn kɛ sɛnin waka’n sa’n,min yɛ n nunnunnin be be ɲrun lɛ-ɔ.+N sacili be ti su mma mun nin be bo olui mun.+
10 N fali amun Ezipti lɔ fiteli,+yɛ n fali amun nantili aawlɛ flɛnnɛn’n nun afuɛ ablanan (40),+naan amun ko fa Amɔɔfuɛ’m be mɛn’n.
11 N fali amun mma wie mun naan be ijɔ min nuan+ɔ nin amun gbanflɛn wie mun naan be yo Nazirifuɛ.+
?Izraɛlifuɛ mun, nɛ́n i-ɔ?’ Zoova yɛ ɔ kan sɔ-ɔ.
12 ‘Sanngɛ amun a yaciman Nazirifuɛ’m be duvɛn manlɛ,+yɛ amun seli min nuan ijɔfuɛ mun kɛ: “Nán amun ijɔ Ɲanmiɛn nuan.”+
13 I sɔ’n ti’n, ń má wɛtɛ amun, amun osu’n nun lɛ,kɛ kakaklolo kun mɔ ble* nga be kpɛli’n w’a yi i piɛ’n, ɔ sin like su m’ɔ wɛtɛ i piɛ’n sa.
14 Sran nga i wun kpɛ kpa’n, ɔ su ɲanman fiawlɛ,+sran ng’ɔ le wunmiɛn kpa’n, fanngan’n wíe i nun,yɛ alɛ kunfuɛ ba kun sa su fiteman nun.
15 Ta tofuɛ’n su ɲanman jranwlɛ,sran nga i ja’n bli i bo’n su fiteman nun,yɛ nnɛn kpanngɔ su fufuɛ’n su fiteman nun.
16 Alɛ kunfuɛ’m be nun yakpafuɛ’n* bɔbɔ’n,cɛn sɔ’n nun’n, ɔ́ fɛ́ i wun kplɛn wánndi.’+ Zoova yɛ ɔ kan sɔ-ɔ.”
Ja ngua lɔ ndɛ mun
^ Annzɛ “Sa tɛtɛ.”
^ Ebr., “jɔlɛ difuɛ.”
^ Annzɛ “i like ng’ɔ kle’n.”
^ Annzɛ “ɔɔzu.”
^ Annzɛ “be nga be awlɛn sɔ’n.”
